திருநெல்வேலி, தூத்துக்குடி சேர்ந்தவர்களுக்கு வெளிநாட்டு வேலைவாய்ப்பிற்கான சிறப்பு பதிவு முகாம்

தமிழக அரசின் அயல்நாட்டு வேலைவாய்ப்பு நிறுவனத்தில் பதிவு செய்ய திருச்சி மற்றும் சேலத்தில் சிறப்பு முகாம்கள் 4 நாள்கள் நடைபெறவுள்ளன. இதில்,திருநெல்வேலி, தூத்துக்குடி, கன்னியாகுமரி மாவட்டங்களைச் சேர்ந்தவர்களும் கலந்து கொண்டு பதிவு செய்து கொள்ளலாம் என அறிவிக்கப்பட்டுள்ளது.

இது தொடர்பாக இந்நிறுவனத்தின் தலைவர் மற்றும் நிர்வாக இயக்குநர் குத்சியா காந்தி வெளியிட்டுள்ள செய்திக் குறிப்பு:

தமிழக அரசு நிறுவனமான அயல்நாட்டு வேலைவாய்ப்பு நிறுவனம் தொடங்கிய நாள் முதல் பல்வேறு வேலைப் பிரிவுகளில் படித்தவர்கள் முதல் படிக்காதவர்கள் வரை ஆயிரக்கணக்கான மனுதாரர்களை பணியமர்த்தியுள்ளது.

மேலும், வெளிநாட்டு வேலையளிப்போரிடம் இருந்து பணியாளர்களின் தேவை நாளுக்கு நாள் அதிகரித்து வருவதாலும், சென்னையில் உள்ள அலுவலகத்திற்கு வந்து பதிவு செய்வதால் பயனாளிகளின் நேரம், பயணம் மற்றும் செலவினை போக்கும் பொருட்டும் அவர்கள் பகுதிக்கே வந்து நேரடியாக பதிவு செய்து கொள்வதற்கு ஏதுவாக தமிழக அரசின் அயல்நாட்டு வேலைவாய்ப்பு நிறுவனம் திருச்சி மற்றும் சேலத்தில் சிறப்பு முகாம்களை நடத்த முடிவு செய்துள்ளது.

வரும் 23 மற்றும் 24 தேதிகளில் (சனி, ஞாயிறு) திருச்சி மாவட்ட வேலைவாய்ப்பு அலுவலகத்திலும், 30 மற்றும் 31 தேதிகளில் (சனி, ஞாயிறு) சேலம் மாவட்ட வேலைவாய்ப்பு அலுவலகத்திலும் காலை 9 மணி முதல் மாலை 5 மணி வரை முகாம் நடைபெறும்.

வெளிநாட்டு வேலைவாய்ப்பிற்கான சிறப்பு பதிவு முகாம்களில் தங்களின் கல்வி, அனுபவம், பாஸ்போர்ட் ஆகியவற்றின் மூன்று நகல்கள் மற்றும் 4 புகைப்படத்துடன் வந்து கலந்து கொள்ளலாம். அனுபவம் மற்றும் பாஸ்போர்ட் இல்லாதவர்களும், கல்வி அல்லாத தொழில் அனுபவம் உள்ளவர்களும் கலந்து கொள்ளலாம்.

பதிவு கட்டணமாக லேபர், கொத்தனார், கார்பெண்டர், ஸ்டீல் பிட்டர், பிளம்பர், பெயிண்டர் முதல் ஐ.டி.ஐ. டிப்ளமோ, தொழில் அனுபவம் பெற்றவர்கள், ஹோட்டல் பணியாளர்கள், பட்டப் படிப்பு படித்தவர்கள் வரையிலான பணியிடங்களுக்கு ரூ. 442-ம், நர்ஸ், பாரா மெடிக்கல் டெக்னீஷியன்கள் மற்றும் அனைத்து மருத்துவப் பணியாளர்கள், பொறியியல் பட்டப்படிப்பு, முதல் நிலை இன்ஜினீயரிங், முதுநிலை கணக்காளர், முதுநிலை பட்டதாரிகள், முதுநிலை மேலாண்மை படித்தவர்கள், கணினி பட்டப் படிப்பு வரை ரூ. 772-ம், டாக்டர்கள் ரூ. 995-ம் செலுத்தி விண்ணப்பப் படிவத்தை பெற்று பதிவு செய்து கொள்ளலாம்.

தமிழக அரசு நிறுவனத்தின் இந்த சிறப்பு பதிவு முகாமின் வாய்ப்பை தவறாமல் பயன்படுத்திக் கொள்ள வேண்டும். இது தொடர்பாக மேலும் விவரங்களுக்கு 9444690026, 9381800181, 9940276356 ஆகிய செல்போன் எண்களிலும், 044- 24464268 என்ற தொலைபேசி எண்ணிலும் தொடர்பு கொள்ளலாம்.

செய்தி: தினமணி

அனிதா ராதாகிருஷ்ணன் அமோக வெற்றி: திமுகவினர் கொண்டாட்டம்

திருச்செந்தூர் இடைத் தேர்தலில் அதிமுக வேட்பாளர் அம்மன் டி நாராயணனை விட 46,861 வாக்குகள் அதிகம் பெற்று, திமுக வேட்பாளர் அனிதா ராதாகிருஷ்ணன் வெற்றி பெற்றுள்ளார். திமுகவினர் இந்த வெற்றியை பட்டாசு வெடித்தும் இனிப்பு வழங்கியும் கொண்டாடி வருகின்றனர்.

திருச்செந்தூர் தொகுதியில் இதுவரை அதிமுக வேட்பாளராக வெற்றி பெற்று தமிழகத்தில் அமைச்சராக வலம் வந்தவர் அனிதா ராதாகிருஷ்ணன். அதிமுக தலைமைக்கும் அனிதா ராதாகிருஷ்ணனுக்கும் ஏற்பட்ட மோதலில் அக்கட்சியிலிருந்து அவர் நீக்கப்பட்டார். பின்னர் தனது தொண்டர்கள் 10 ஆயிரம் பேருடன் அதிரடியாக திமுகவில் இணைந்தார்.

திமுக தலைவர் கருணாநிதி, அனிதாவிற்கு திருச்செந்தூர் தொகுதியையும் அமைச்சர் பதவியும் தருவதாக வாக்குறுதி அளித்தார். அதன் அடிப்படையில் அனிதா தனது எம்எல்ஏ பதவியை ராஜினாமா செய்தார். இதனையடுத்து திருச்செந்தூர் தொகுதயில் போட்டியிட அவருக்கு வாய்ப்பளிக்கப்பட்டது.

கடந்த 19ம் தேதி நடந்த திருச்செந்தூர் இடைத் தேர்தலின் வாக்கு எண்ணும் பணி இன்று காலை துவங்கியது. துவங்கியதிலிருந்தே அனிதா ராதாகிருஷ்ணன் முன்னிலை வகித்து வந்தார். மொத்தம் 14 சுற்றுகளாக வாக்கு எண்ணிக்கை நடந்தது. இதில் 14வது சுற்றின் முடிவில் திமுக 75,223 வாக்குகளும், அதிமுக 28,362 வாக்குகளும், தேமுதிக 4186 வாக்குகளும் பெற்றன.

இதனையடுத்து அனிதா ராதாகிருஷ்ணன், அதிமுக வேட்பாளரை விட 46,861 வாக்குகள் அதிகம் பெற்று வெற்றிபெற்றுள்ளார். திருச்செந்தூர், உடன்குடி, ஆறுமுகநேரி, காயல்பட்டினம் ஆகிய பகுதிகளில் திமுக நிர்வாகிகளும், அனிதா ஆதரவாளர்களும் பட்டாசு வெடித்தும் , இனிப்பு வழங்கியும் தங்களது வெற்றியை கொண்டாடி வருகின்றனர்.

செய்தி : தூத்துக்குடி வெப்சைட்

தூத்துக்குடி மாவட்ட பள்ளிகளில் பத்து ஆண்டுகள் கனரக வாகனம் ஓட்டியவரை டிரைவராக வைக்க வேண்டும்.கலெக்டர் அறிவிப்பு

கல்லூரி முதல்வர்கள், தலைமையாசிரியர்கள் ஆலோசனை கூட்டம் கலெக்டர் பிரகாஷ் தலைமையில் நடந்தது.

இக்கூட்டத்தில் தூத்துக்குடி வட்டார போக்குவரத்து அதிகாரி தங்கவேல், முதன்மை கல்வி அதிகாரி பிறைட்சேவியர், ஆர்.டி.ஓ குருதேவி, மோட்டார் வாகன ஆய்வாளர்கள் சந்திரசேகர், சத்தியமூர்த்தி மற்றும் அரசுத்துறை அதிகாரிகள், பள்ளி, கல்லூரி முதல்வர்கள், தலைமையாசிரியர்கள் கலந்து கொண்டனர்.

கூட்டத்தில் கலெக்டர் பேசியதாவது;

1. பள்ளி,கல்லூரி வாகனங்களில் முன் பக்கம் மற்றும் பின் பக்கத்தில் பள்ளி குழந்தைகள் ஏற்றிச் செல்லப்படுகிறார்கள் என்பதை தெளிவாக எழுத வேண்டும்.

2. வாடகை வாகனம் என்றால் பள்ளி அல்லது கல்லூரி பணி என்று தெளிவாக எழுதிகாட்ட வேண்டும்.

3 கல்வி நிலையத்திற்கு சொந்தமான எந்த ஒரு பஸ்சும் அனுமதிக்கப்பட்ட இருக்கைக்கு மேலாக குழந்தைகளை ஏற்றிச் செல்லக் கூடாது.

4. முதலுதவிப் பெட்டி கண்டிப்பாக பள்ளி வாகனங்களில் வைக்க வேண்டும். பஸ்களின் ஜன்னல்களில் நீளவாட்டில் கிரீல் கம்பிகள் பொறுத்த வேண்டும்.

5. தீ அணைப்பான் கருவியும் கண்டிப்பாக வைத்திருக்க வேண்டும். பள்ளி, கல்லூரியின் பெயர், போன் எண் போன்றவை அதில் எழுதியிருக்க வேண்டும்.

6. கனரக வாகனம் பத்து ஆண்டுகள் ஓட்டிய, போக்குவரத்து தண்டனை முந்தைய காலத்தில் இல்லாதவரை மட்டுமே டிரைவாக பள்ளி வாகனத்திற்கு நியமிக்க வேண்டும்.

7. டிரைவர் எந்த காரணம் கொண்டும் செல்போன் பேசக் கூடாது.

இவ்வாறு கலெக்டர் பேசினார். வாகனங்கள் அனைத்தையும் வரும் 18ம் தேதிக்குள் ஆர்.டி.ஓ ஆபிசிற்கு கொண்டு வந்து ஆய்வு செய்து கொள்ள வேண்டும் என்று கூட்டத்தில் தெரிவிக்கப்பட்டது.

ஸ்ரீவை, எம்.எல்.ஏ., தமிழக துணைமுதல்வர் ஸ்டாலினிடம் மனு கொடுத்தார்,

ஸ்ரீவை அருகேயுள்ள தோழப்பண்பண்ணையில் புதியதாக மணல்குவாரிகள் அமைப்பதற்கு எதிர்ப்பு தெரிவித்து தமிழக துணைமுதல்வருக்கு ஸ்ரீவைகுண்டம் தொகுதி எம்.எல்.ஏ.,சுடலையாண்டி கோரிக்கை விடுத்து மனு கொடுத்தார்.

தூத்துக்குடியில் நேற்று நடந்த அரசு நலத்திட்ட உதவிகள் வழங்கும் விழாவில் தமிழக துணைமுதல்வர் ஸ்டாலின் பங்கேற்று நலத்திட்ட உதவிகளை வழங்கிப்பேசினார். விழாவில் ஸ்ரீவைகுண்டம் தொகுதி எம்.எல்.ஏ.,சுடலையாண்டி கலந்துகொண்டு பேசினார்.

தூத்துக்குடி மாவட்டத்திற்குட்பட்ட ஸ்ரீவைகுண்டம் தொகுதியில் தாமிரபரணி ஆற்றை நம்பியே விவசாயப்பணிகள் அனைத்தும் நடந்து வருகிறது. ஸ்ரீவை அருகேயுள்ள தோழப்பண்பண்ணை கிராமப்பகுதியில் தாமிரபரணி ஆற்றில் புதியதாக மணல்குவாரி அமைப்பதற்கு அரசிடம் சிலர் கோரிக்கை விடுத்து முயற்சிகள் மேற்கொண்டு வருகின்றனர்

புதியதாக மணல்குவாரிகள் அமைக்கப்பட்டால் ஸ்ரீவையை சுற்றி உள்ள சுமார் 83 கிராமங்களை சேர்ந்த மக்களுக்கு தேவையான குடிநீரை பெறமுடியாமல் கடுமையான குடிநீர் தட்டுப்பாடு ஏற்படும் சூழ்நிலையும் ஏற்பட்டுவிடும். எனவே தமிழக அரசு தாமிரபரணி ஆற்றில் புதியதாக மணல்குவாரிகள் எதுவும் அமைப்பதற்கு எக்காரணம் கொண்டும் அனுமதி வழங்ககூடாது என்று ஸ்ரீவைகுண்டம் தொகுதி மக்கள் சார்பில் தங்களிடம் கேட்டுகொள்கிறேன் என்று பேசினார்.

பின்னர் ஸ்ரீவை எம்.எல்.ஏ., தனது கோரிக்கை தொடர்பான மனுவை தமிழக துணைமுதல்வர் ஸ்டாலினிடம் கொடுத்தார்.

த.மு.மு.க.,சார்பில் ஏரலில் ரத்தப்பிரிவு கண்டறியும் முகாம்

ஏரலில் த.மு.மு.க.,சார்பில் ரத்த பிரிவு கண்டறியும் முகாம் நடந்தது.

ஏரலில் த.மு.மு.க.,சார்பில் நடந்த ரத்த பிரிவு கண்டறியும் முகாமிற்கு கிளை தலைவர் அன்சார் அலி தலைமை வகித்தார். துணைத் தலைவர் பைசர்தின் தொடங்கி வைத்தார்.

செயலாளர் அப்துல் காதர், பொருளாளர் ஆவுல்பாதுஷா, மருத்துவ அணி செயலாளர் பீர் முகம்மது, ஏரல் கிளை உறுப்பினர்கள் ஆகியோர் கலந்து கொண்டனர்.

முகாமில் 50க்கும் மேற்பட்டோர் ரத்ததானம் செய்ய தீர்மானித்துள்ளனர்.மேலும் பலர் ரத்த பிரிவு சோதனை செய்து கொண்டனர்

ஸ்ரீவைகுண்டத்தில் நேற்று நல்ல மழை

ஸ்ரீவைகுண்டத்தில் நேற்று காலை 8 மணி நிலவரப்படி 32மில்லி மீட்டர் மழை பெய்துள்ளது.

தூத்துக்குடி மாவட்டத்தில் இந்த மழை காரணமாக பல இடங்களில் வீடுகள் இடிந்து விழுந்துள்ளது.ஸ்ரீவைகுண்டம் பகுதியில் 2 வீடுகள் இடிந்துள்ளது.

ஸ்ரீவை.அணை நீரை சாத்தான்குளம், உடன்குடிக்கு திருப்பிவிட விவசாயிகள் கோரிக்கை:-

ஸ்ரீவைகுண்டம் அணையிலிருந்து வீணாகக் கடலுக்குச் செல்லும் வெள்ள நீரை சாத்தான்குளம், உடன்குடி பகுதிகளுக்கு திருப்பிவிட வேண்டும் என தென்பகுதி விவசாய சங்கத்தினர் கோரிக்கை விடுத்துள்ளனர்

ஏரல் தரைப்பாலம் மூழ்கியது:-

தாமிரபரணி ஆற்றில் ஏற்பட்ட காட்டாற்று வெள்ளம் காரணமாக நேற்றுஏரல் தரைப்பாலம் மூழ்கியதால், அவ்வழியாக போக்குவரத்து துண்டிக்கப்பட்டது.நேற்று முன்தினம் இரவு முதல் நேற்றிரவு வரை அவ்வழியாக போக்குவரத்து துண்டிக்கப்பட்டது. வாகனங்கள் மாற்றுப்பாதையில் திருப்பிவிடப்பட்டன. ஆத்தூர் தாமிரபரணி மேம்பாலத்தை தெடும் அளவிற்கு வெள்ள நீர் சென்றது

தாமிரபரணி ஆற்று வெள்ளத்தால் ஏரல் பாலம் தண்ணீரில் மூழ்கியது

தாமிரபரணி ஆற்றில் வரும் அதிகப்படியான வெள்ளநீரால் ஏரல் ஆற்றுப்பாலம் நீரில் மூழ்கியுள்ளது. இதனால் குரும்பூர், ஏரல் இடையே வாகனப்போக்குவரத்தில் பாதிப்பு ஏற்பட்டுள்ளது.

ஏரல் பாலம் தண்ணீரில் மூழ்கியுள்ள காரணத்தினால் வாகனங்கள் மாற்றுப்பாதையில் திருப்பி விடப்பட்டுள்ளது. ஏரல் சுற்றுவட்டர பகுதிகளில் கடந்த சிலநாட்களாக கொட்டி வரும் கனமழையால் வாழை, வெற்றிலை பயிர்கள் தண்ணீரில் மூழ்கியுள்ளது. இதனால் விவசாயிகள் கவலை அடைந்துள்ளனர்.

கனமழை தூத்துக்குடி மாவட்ட அனைத்து பள்ளி, கல்லூரிகளுக்கு இன்று விடுமுறை

தூத்துக்குடி மாவட்டத்தில் உள்ள அனைத்து பள்ளிகள் மற்றும் கல்லூரிகளுக்கு இன்று விடுமுறை அளிக்கப்பட்டுள்ளது.

வங்கக் கடலில் ஏற்பட்டுள்ள குறைந்த காற்றழுத்தத் தாழ்வு நிலை தமிழகத்தை நோக்கி நகரத் தொடங்கியுள்ளது. தற்போது குமரிக் கடலில் நிலை கொண்டுள்ள இதன் காரணமாக, அனைத்து மாவட்டங்களிலும் கன மழை பெய்யும் என வானிலை ஆய்வு மையம் தெரிவித்துள்ளது.

இந்நிலையில், தூத்துக்குடி மாவட்டத்தில் உள்ள அனைத்து பள்ளிகள் மற்றும் கல்லூரிகளுக்கு இன்று விடுமுறை அளிக்கப்படுவதாக மாவட்ட ஆட்சியர் கோ.பிரகாஷ் பிரகாஷ் அறிவித்துள்ளார்.

இதேபோல த‌மிழக‌ம் முழுவது‌ம் பெ‌ய்து வரு‌ம் கனமழை‌க்கு செ‌ன்னை, கா‌‌ஞ்‌சிபுர‌ம், திருவ‌ள்ளூ‌ர், புது‌க்கோ‌ட்டை, திரு‌ச்‌சி, திருநெ‌ல்வே‌லி, ராமநாதபுர‌ம் உ‌ள்‌ளி‌ட்ட மாவ‌ட்‌ட‌ங்க‌ளி‌ல் உ‌ள்ள ப‌ள்‌ளி, க‌ல்லூ‌ரிகளு‌க்கு இ‌ன்று ‌விடுமுறை அ‌றி‌வி‌க்க‌ப்ப‌ட்டு‌ள்ளது

நன்றி : செல்வா, திருநெல்வேலி

தூத்துக்குடி மாவட்டத்தில் தேசிய அடையாள அட்டை: புள்ளி விபரங்கள் சேகரிப்பு பணிகள் துவக்கம்!

ஓட்டப்பிடாரம் தாலுகாவில் கடற்கரை கிராமங்களில் தேசிய அடையாள அட்டை வழங்குவதற்காக புள்ளி விபரங்கள் சேகரிக்கும் பணி நடைபெறுகிறது. இதில், பொது மக்கள் தங்கள் விபரங்களை வழங்கி பயனடையும்படி தாசில்தார் அறிவுறுத்தியுள்ளார்.

இதுகுறித்து ஓட்டப்பிடாரம் தாசில்தார் தமிழ்மணி வெளியிட்டுள்ள செய்திகுறிப்பில் தெரிவித்துள்ளதாவது, தூத்துக்குடி மாவட்டம், ஓட்டப்பிடாரம் தாலுகாக கடற்கரை கிராமங்களில் தேசிய அடையாள அட்டை வழங்குவது தொடர்பாக புள்ளி விபரங்கள் சேகரிக்கும் பணியில் அரசு அலுவலர்கள் ஈடுபட்டு வருகின்றனர். இந்த பணி இன்று (நவ.5)துவங்கி, வரும் 10ம் தேதி வரை நடைபெறுகிறது.

ஓட்டப்பிடாரம் வட்டத்தில் உள்ள கடற்கரை கிராமங்களான பட்டணமருதூர், தருவைக்குளம் மற்றும் கீழஅரசடி ஆகிய கிராமங்களில் வசிக்கும் பொது மக்கள் தங்களது பெயர் மற்றும் வயதிற்கான ஆதாரங்களை கொண்டு எடுக்கப்படுகிறது. மேலும், இந்த விபரங்களை வீடு, வீடாக லேப் டாப் கம்ப்யுட்டர் மூலம் புள்ளி விபரங்கள் சேகரிக்கும் கணக்கீட்டாளரிடம் வழங்கி பொது மக்கள் பயன்பெறலாம் என அந்த அறிக்கையில் தெரிவிக்கப்பட்டுள்ளது.

News by Tuticorin Web Site

ஜனவரி 15ல் 108 ஆண்டுகளுக்கு பின் அரிய சூரிய கிரகணம்

108 வருடத்திற்கு பிறகு வரும் 'கங்கண சூரிய கிரகணம்' வரும் ஜனவரி 15ம் தேதி நிகழ்க்கிறது.

அரிய நிகழ்வாக 2010 ஜனவரி மாதம் இரண்டு கிரகணங்கள் நிகழவுள்ளன. புத்தாண்டு அன்று முதல்நாள் சந்திர கிரகணம் ஏற்படவுள்ளது.

ஜனவரி 15ம் தேதி சூரிய கிரகணம் ஏற்படுகிறது. இக்கிரகணம் தமிழகத்தில் கன்னியாகுமரி , நெல்லை , தூததுக்குடி, விருதுநகர், நாகப்பட்டிணம், கடலூர், ராம்நாடு, சிவகங்கை, திருச்சி , புதுகோட்டை,தஞ்சாவூர் உள்பட 12 மாவட்டங்களில் தெளிவாகத் தெரியும்.

இதுகுறித்து கலெக்டர் ராஜேந்திர ரத்னு நிருபர்களிடம் கூறுகையில்,

இந்த சூரிய கிரகணம் மிகவும் சிறப்பானது. இதற்குப் பெயர் கங்கண சூரிய கிரகணம். இதற்கு முன்னர் 1901ம் ஆண்டு நவம்பர் 11ம் நாள் கங்கண சூரிய கிரகணம் நிகழ்ந்துள்ளது.

மீண்டும் 2019 டிசம்பர் அன்றுதான் கங்கண சூரியகிரகணம் தமிழத்தில் தெரியும். புவியை நிலவு ஒரு நீள்வட்டப் பாதையில் சுற்றி வருகிறது. இதனால் புவிக்கு அருகே வரும்போது 3 லட்சத்து 57 ஆயிரத்து 200 கிலோ மீட்டர் தொலைவிலும், புவியை விட்டு விலகி செல்கையில் 4 லட்சத்து 7 ஆயிரத்து 100 கிலோமீட்டர் தொலைவிலும் நிலவு இருக்கும்.

தொலைவில் இருக்கும் போது நிலவின் தோற்றம் சிறியதாக இருக்கும். எனவே புவியை விட்டு விலகிச் செல்கையில் சூரிய கிரகணம் நடந்தால் சந்திரனால் சூரியனை முழுமையாக மறைக்க முடியாது. இதனையே கங்க சூரிய கிரகணம் என்கிறோம்.

ஜனவரி முதல் நாள் நிகழும் சந்திர கிரகணம் அதிகாலை 12.21க்குத் துவங்கி சுமார் 1.24 மணிக்கு முடிகிறது என்றார் ராஜேந்திர ரத்னு.

ஸ்ரீவைகுண்டம் ஊராட்சி ஒன்றிய அளவிலான கிராமிய விளையாட்டுப் போட்டிகள் இன்று தொடக்கம்

ஸ்ரீவைகுண்டம் ஊராட்சி ஒன்றிய அளவிலான கிராமிய விளையாட்டுப் போட்டிகள் திங்கள்கிழமை (நவ. 2) தொடங்கி, செவ்வாய்க்கிழமையும் நடைபெறுகிறது.

சாயர்புரம் போப் மேல்நிலைப் பள்ளி மைதானத்தில் ஆண்கள் மற்றும் பெண்களுக்கான குழுப் போட்டிகளும், தடகளப் போட்டிகளும் நடைபெறுகின்றன.

நெல்லை, தூத்துக்குடியில் பரவலாக மழை

நெல்லை, தூத்துக்குடியில் பரவலாக மழை பெய்ததால் விவசாயிகள் மகிழ்ச்சி அடைந்துள்ளனர். தமிழகத்தில் வட கிழக்கு பருவமழை காரணமாக பரவலாக மழை பெய்து வருகிறது. நெல்லை, தூத்துக்குடி மாவட்டங்களில் மழை பெய்து வருவதால் கார் பருவ சாகுபடி செய்யும் விவசாயிகள் மகிழ்ச்சி அடைந்துள்ளனர்.

மலைப் பகுதியில் அணைகளின் நீர் பிடிப்பு இடங்களிலும் மிதமான மழை பெய்து வருகிறது. தொடர்ந்து இப்பகுதியில் மழை நீடித்தால் அணைகளுக்கு நீர்வரத்து அதிகரிக்கும்

நேற்று ஸ்ரீவைகுண்டத்தில் 36 மில்லி மீட்டர் மழை பெய்துள்ளது.இதனால் ஸ்ரீவைகுண்டம் அணை நீர்மட்டம் உயர்ந்துள்ளது.

காயல்பட்டினத்தில் ஓய்வு பெற்ற இமாம் கெüரவிப்பு

காயல்பட்டினத்தில் ஓய்வு பெற்ற இமாம் பணமுடிப்பு வழங்கி கெüரவிக்கப்பட்டார்.

காயல்பட்டினம் செய்து ஸலாஹூத்தீன் பள்ளி என்ற மேலப் பள்ளிவாசலில் கடந்த 20 ஆண்டுகளாக பணியாற்றி ஓய்வு பெற்ற இமாம் தாழையூத்தைச் சேர்ந்த முஹம்மத் கானுக்கு பண முடிப்பு வழங்கி கெüரவிக்கப்பட்டது.

விழாவிற்கு பாளையங்கோட்டை சதக்கத்துல்லா அப்பா கல்லூரி தலைவர் பி.எஸ்.ஏ.பல்லாக்கு லெப்பை தலைமை வகித்தார்.

பள்ளியின் முன்னாள் முத்தவல்லி பி.எம்.ஏ.முஹ்யித்தீன் அப்துல் காதிர் இமாமுக்கு பொன்னாடை போர்த்தி கெüரவித்தார். நிர்வாகக் குழு உறுப்பினர் எம்.எஸ். ஸதக்கத்துல்லாஹ் வாழ்த்திப் பேசினார்.

பள்ளித் துணைத் தலைவர் எஸ்.எஸ்.எம்.புஹாரி பள்ளி சார்பில் இமாமுக்கு பணமுடிப்பை வழங்கினார்.

விழாவில் நிர்வாகக் குழு உறுப்பினர் இல்யாஸ், மழ்ஹருல் ஆபிதீன் சன்மார்க்க சபைச் செயலர் பாளையம் இப்ராகிம், இலங்கை கொழும்பு அல்ஜாமி உல் அள்ஃபர் பி.எம்.ஏ.பல்லாக் லெப்பை, முஹியத்தீன் டிவி இயக்குநர் ஜே.எம்.அப்துர் ரஹீம் மற்றும் ஜமா அத்தினர் கலந்து கொண்டனர்.

தூத்துக்குடி மாவட்டத்துக்கு வரும் அக்டோபர் 23ஆம் தேதி உள்ளூர் விடுமுறை

கந்த சஷ்டி விழாவை முன்னிட்டு இம் மாதம் 23-ம் தேதி தூத்துக்குடி மாவட்டத்துக்கு உள்ளூர் விடுமுறை அறிவிக்கப்பட்டுள்ளது.

இது தொடர்பாக ஆட்சியர் (பொறுப்பு) துரை. ரவிச்சந்திரன் வெளியிட்ட செய்திக் குறிப்பு:

திருச்செந்தூர் அருள்மிகு சுப்பிரமணிய சுவாமி கோயிலில் இவ்வாண்டு கந்த சஷ்டி விழா இம் மாதம் 18-ம் தேதி தொடங்குகிறது.

6-ம் நாளான 23-ம் தேதி அன்று முக்கிய நிகழ்ச்சியான சூரசம்ஹாரம் நடைபெறும்.

எனவே, அன்றைய தினம் மாவட்டத்தில் உள்ள அனைத்து

அரசு அலுவலகங்களுக்கும் உள்ளூர் விடுமுறை அளித்து இதன் மூலம் ஆணை பிறப்பிக்கப்படுகிறது.

மாவட்ட கருவூலம் மற்றும் சார்நிலை கருவூலங்கள் குறைந்த எண்ணிக்கையிலான பணியாளர்களுடன் செயல்படும்.

இது செலாவணி முறிவு சட்டத்தின்படி பொது விடுமுறை நாளல்ல எனவும் அறிவிக்கப்படுகிறது.

இந்த விடுமுறைப் பதிலாக நவ. 14-ம் தேதி 2-வது சனிக்கிழமை வேலை நாளாக அறிவிக்கப்படுகிறது என்றார் ஆட்சியர்.

வேலைவாய்ப்பற்றோர் உதவித் தொகை பெற தூத்துக்குடி மாவட்டத்தில் விண்ணப்பிக்கலாம் : வேலைவாய்ப்பு அதிகாரி அழைப்பு

தூத்துக்குடி மாவட்டத்தில் வேலைவாய்ப்பற்றோர் உதவித் தொகை பெறுவதற்கு விண்ணப்பம் செய்யலாம்.

இது குறித்து மாவட்ட வேலைவாய்ப்பு அதிகாரி கலைச்செல்வன் விடுத்துள்ள அறிக்கையில் கூறியிருப்பதாவது; வேலைவாய்ப்பு அலுவலகத்தில் பதிவு செய்து ஐந்து ஆண்டுகள் முடிவுற்ற பதிவுதாரர்களுக்கு பத்தாம் வகுப்பு கல்வித் தகுதிக்கு 150 ரூபாயும், 12ம் வகுப்பு கல்வித்தகுதிக்கு 200 ரூபாயும், பட்டதாரிகளுக்கு 300 ரூபாயும் மாதாந்திர உதவித்தொகை வழங்கப்படுகிறது.

இந்த திட்டத்தின் கீழ் உதவித் தொகை பெற விரும்புபவர்கள் 30.9.2004 க்கு முன்பாக தங்களது கல்வித்தகுதியை மாவட்ட வேலைவாய்ப்பு அலுவலகத்தில் பதிவு செய்து, நாளது தேதி வரை பதிவினை புதுப்பித்துள்ள மனுதாரர்கள் 30.11.2009 வரை மாவட்ட வேலைவாய்ப்பு அலுவலகத்தில் விண்ணப்பம் அளிக்கலாம். விண்ணப்ப படிவம் மாவட்ட வேலைவாய்ப்பு அலுவலகத்தில் இலவசமாக வழங்கப்படுகிறது. மனுதாரர் அனைத்து ஆவணங்களுடன் விண்ணப்ப படிவத்தினை அனைத்து அலுவலக வேலைநாட்களிலும் காலை 10 மணி முதல் மதியம் 2 மணி வரை பெற்றுக் கொள்ளலாம்.

விண்ணப்பபடிவத்துடன் வருவாய் ஆய்வாளரிடம் பெறப்பட்ட தகுதிச்சான்று, அரசுடைமையாக்கப்பட்ட பாங்குகளில் புதியதாக துவக்கப்பட்ட பாங்கு கணக்கு புத்தகம், வேலைவாய்ப்பு அலுவலக பதிவு அட்டை ஆகியவற்றை இணைக்க வேண்டும்.

1.10.2007 முதல் 31.12.2007 வரை மற்றும் 1.10.2008 முதல் 31.12.2008 வரையும் வேலைவாய்ப்பற்றோர் உதவித் தொகை பெற விண்ணப்பம் மாவட்ட வேலைவாய்ப்பு அலுவலகத்தில் சமர்பித்தவர்கள் சுய உறுதிமொழி ஆவணத்தை 30.11.2009க்குள் சமர்பிக்க வேண்டும். சமர்பிக்காதவர்களுக்கு தொடர்ந்து உதவித் தொகை வழங்க இயலாது.
பயனாளிகள் அனைவருக்கும் நடப்பு காலாண்டிற்கான உதவித் தொகை அவர்களது பாங்கு கணக்கில் வரவு வைக்கப்பட்டுள்ளது. இதுவரை விண்ணப்பம் சமர்பித்து உதவித் தொகை கிடைக்காதவர்கள் தங்களது வேலைவாய்ப்பு அலுவலக பதிவு அட்டை, பாங்கு கணக்கு புத்தகத்தில் நாளது தேதி வரையிலான குறிப்புகளுடன் மாவட்ட வேலைவாய்ப்பு அலுவலகத்தை உடனடியாக தொடர்பு கொள்ள வேண்டும்.

எனவே இந்த திட்டத்தில் பயன்பெற தகுதியும், விருப்பமும் உடைய பதிவுதாரர்கள் வரும் 30ம் தேதிக்கு முன்பாக விண்ணப்பிக்க வேண்டும். இவ்வாறு அதில் தெரிவிக்கப்பட்டுள்ளது.

பி.எஸ்.என்.எல். புதிய டெலிபோன் டைரக்டரி இன்று முதல் விநியோகம்

தூத்துக்குடி மாவட்டத்தில் பி.எஸ்.என்.எல். சார்பில் புதிய டெலிபோன் டைரக்டரி வியாழக்கிழமை (செப். 24) முதல் விநியோகம் செய்யப்படுகிறது.

இது தொடர்பாக மாவட்ட பி.எஸ்.என்.எல். தொலைத் தொடர்பு பொதுமேலாளர் என்.ஆர். நடராஜன் வெளியிட்ட செய்திக் குறிப்பு:

தூத்துக்குடி மாவட்டத்தில் உள்ள பி.எஸ்.என்.எல். தரைவழி, வில்போன் வாடிக்கையாளர்களுக்கான புதிய டெலிபோன் டைரக்டரி 24.9.2009 முதல் விநியோகம் செய்யப்படுகிறது.

அந்தந்த தொலைபேசி நிலையத்தை சேர்ந்த வாடிக்கையாளர்கள் அந்தந்த தொலைபேசி நிலையங்களில் பணம் செலுத்திய 7.8.2009 அல்லது 7.9.2009 பில்லை காண்பித்து,

டைரக்டரியை பெற்றுக் கொள்ளலாம்.

துண்டிக்கப்பட்ட தரைவழி மற்றும் வில்போன் இணைப்புகளுக்கு அதன் துண்டிக்கப்பட்ட மாத கட்டணங்கள் முற்றிலும் தள்ளுபடி செய்யப்படுவதுடன், நிலுவைத் தொகையினை ஆறுமாத கால தவணைகளில் செலுத்தும் வசதியும் வழங்கப்படுகிறது.

எனவே, வாடிக்கையாளர்கள் சேவை மையம் மற்றும் மேளா நடைபெறும் இடங்களில் அதற்கான விண்ணப்பத்தை கொடுத்து மறுபடியும் தங்களது இணைப்பை பொற்றுக்கொள்ளலாம்.

புதிய தரைவழி மற்றும் வில் இணைப்புகளுக்கு இப்போது அமைப்புக் கட்டணம் ரூ. 500 தள்ளுபடி செய்யப்பட்டுள்ளது.

புதிய தரைவழி மற்றும் வில் இணைப்புகள் வேண்டுவோர் ரூ. 100 மட்டும் செலுத்தி புதிய இணைப்புகளை பெற்றுக் கொள்ளலாம்.

மீதமுள்ள வைப்புத் தொகையை நான்கு தவணைகளில் செலுத்தலாம். இந்த சலுகை 21.10.2009 வரை நீடிக்கப்பட்டுள்ளது என்றார் அவர்

வறட்சி மாவட்டமாக அறிவிக்கப்படுமா தூத்துக்குடி?

தென்மேற்குப் பருவமழை பொய்த்ததால் தூத்துக்குடி மாவட்டத்தில் விவசாயம் கடுமையாகப் பாதிக்கப்பட்டுள்ளது. எனவே, இம் மாவட்டத்தை வறட்சி மாவட்டமாக அறிவிக்க வேண்டும் என விவசாயிகள் கோரிக்கை விடுத்துள்ளனர்.

தூத்துக்குடி மாவட்டத்தின் பிரதான நீராதாரம் தாமிரபரணி ஆறுதான். இம் மாவட்டத்தில் தாமிரபரணி பாசனத்தில் 46,107 ஏக்கர் நன்செய் நிலங்கள் பிசானம், கார் என இருபோக சாகுபடி முறையில் இருந்து வருகின்றன.

தாமிரபரணி ஆற்றின் பாபநாசம், மணிமுத்தாறு ஆகிய இரு அணைகள் மூலம் இந்த நன்செய் நிலங்களுக்கு தண்ணீர் வழங்கப்பட்டு வருகிறது.

தூத்துக்குடி மாவட்டத்தில் தாமிரபரணி பாசனத்தில் நெற்பயிரே முழுமையாகப் பயிரிடப்பட்டு வந்தது. கடந்த சில ஆண்டுகளாக போதுமான தண்ணீர் இல்லாத காரணத்தால், வாழையும் பல இடங்களில் பயிரிடப்பட்டு வருகிறது.

இந் நிலையில், நிகழாண்டில் தென்மேற்குப் பருவமழை பொய்த்ததால், மாவட்டத்தில் உள்ள 46,107 ஏக்கர் நிலங்களுக்கும் கார் சாகுபடிக்கு அனுமதி வழங்கி தண்ணீர் விடப்படவில்லை.

வாழைப்பயிர் உள்ள இடங்கள் தவிர, இந்த ஆண்டு சுமார் 30 ஆயிரம் ஏக்கரில் நெற்பயிர் சாகுபடி செய்ய தயாராக இருந்த நிலையில், கார் சாகுபடிக்கு அனுமதி வழங்கப்படாததால், நெல் சாகுபடி நடைபெறவில்லை. இதன் காரணமாக விவசாயிகளுக்கு சுமார் ரூ.400 கோடி அளவுக்கு நஷ்டம் ஏற்பட்டுள்ளது என்கிறார், தூத்துக்குடி மாவட்ட தாமிரபரணி நதிநீர் பாதுகாப்புப் பேரவைத் தலைவர் எஸ். நயினார் குலசேகரன்.

இதேபோன்று, மாவட்டத்தில் அத்திமரப்பட்டி, காலாங்கரை, ஸ்ரீவைகுண்டம், சாயர்புரம் பகுதியில் சுமார் ஒரு கோடி வாழைகள் பயிரிடப்பட்டுள்ளன. இவற்றில் பல லட்சம் வாழைகள் தண்ணீர் இல்லாமல் கருகியுள்ளன. மேலும், ஏராளமான வாழைகள் கருகும் நிலையில் உள்ளன. இதன்மூலம் விவசாயிகளுக்கு சுமார் ரூ. 100 கோடி அளவுக்கு நஷ்டம் ஏற்பட்டுள்ளதாகவும் அவர் சுட்டிக் காட்டினார்.

எனவே, தூத்துக்குடி மாவட்டத்தை வறட்சி மாவட்டமாக அறிவித்து, அதற்கான

நிவாரணப் பணிகளைத் தொடங்க மத்திய, மாநில அரசுகள் நடவடிக்கை எடுக்க வேண்டும் என்றார் அவர்.

இதே கருத்தையே வலியுறுத்தினார் தமிழ்நாடு விவசாயிகள் சங்கத்தின் தூத்துக்குடி மாவட்டப் பொருளாளர் எஸ். சங்கரசுப்பு.

இது தொடர்பாக அரசுக்கு, தமிழ்நாடு விவசாயிகள் சங்கம் சார்பில் ஏற்கனவே மனு அனுப்பப்பட்டுள்ளதாகக் கூறிய சங்கரசுப்பு, மாவட்டத்தில் இந்த ஆண்டிற்கான நிலவரியை ரத்து செய்ய வேண்டும் என்றார்.

வடகிழக்குப் பருவமழையும் இந்த ஆண்டு எதிர்பார்த்த அளவு இருக்காது என்ற தகவல்களால் விவசாயிகள் மிகவும் வேதனை அடைந்துள்ளனர். மாவட்டத்தில் ஓட்டப்பிடாரம், விளாத்திகுளம், எட்டையபுரம், கோவில்பட்டி, கயத்தாறு,

புதூர் உள்ளிட்ட பகுதிகளில் மானாவாரி பயிர் சாகுபடி செய்ய விவசாயிகள் வடகிழக்குப் பருவமழையை எதிர்பார்த்துக் காத்திருக்கின்றனர்.

இஸ்லாமிய சமூக சேவை மையம் சார்பில் நலத்திட்ட உதவிகள்

தூத்துக்குடியில் இஸ்லாமிய சமூக சேவை மையம் சார்பில், நலத்திட்ட உதவிகள் வழங்கும் விழா நடைபெற்றது.

தூத்துக்குடி லூர்தம்மாள்புரம் தாஃவா மையத்தில் நடைபெற்ற நிகழ்ச்சிக்கு அல்- இஸ்லாஹ் டிரஸ்ட் மற்றும் இஸ்லாமிய சமூக சேவை மையத்தின் தலைவர் எச்.எம். அஹமத் இக்பால் தலைமை வகித்தார்.

நிர்வாகிகள் பொருளாளர் சுலைமான், துணைத் தலைவர் அண்ணல் மைதீன் ஆகியோர் முன்னிலை வகித்தனர்.

முகமது அலி என்பவரின் தாய்க்கு கர்ப்பப்பை அறுவை சிகிச்சைக்காக ரூ. 10 ஆயிரம், ரஹ்மத்துல்லா என்பவரின் மகளுக்கு மருத்துவ உதவியாக ரூ. 5 ஆயிரம் வழங்கப்பட்டது.

இதைத் தொடர்ந்து, குவைத் ஐ.ஜி.சி. மற்றும் அல்-இஸ்லாஹ் டிரஸ்ட் மற்றும் இஸ்லாமிய சமூக சேவை மையம் இணைந்து ரூ.30 ஆயிரம் மதிப்புள்ள அரிசி மற்றும் மசாலா பொருள்கள் சுமார் 200 பேருக்கு பித்ரா எனும் பெருநாள் உதவியாக வழங்கப்பட்டது.

இஸ்லாமிய சமூக சேவை மைய செயலர் சம்சுதீன் மற்றும் நிர்வாகக் குழு உறுப்பினர்கள் கலந்துகொண்டனர்.

உலமாக்கள் நலவாரிய உறுப்பினர் சேர்க்கை

தூத்துக்குடி மாவட்டத்தில் உலமாக்கள் நலவாரியத்தில் உறுப்பினராக சேர விரும்புவோர் விண்ணப்பிக்கலாம் என, மாவட்ட ஆட்சியர் கோ. பிரகாஷ் கேட்டுக் கொண்டுள்ளார்.

தமிழ்நாட்டில் உலமாக்கள் மற்றும் பணியாளர்களுக்கான சமூக, பொருளாதார மற்றும் கல்வி நிலைகளில் திட்டமிட்ட உறுதியான முன்னேற்றத்தை அடைவதற்கென உலமாக்கள் மற்றும் பணியாளர்கள் நல வாரியம் அமைக்கப்பட்டுள்ளது.

அதில், பதிவு செய்யப்படும் உறுப்பினர்களுக்கு அமைப்பு சாரா தொழிலாளர் நல வாரியங்களில் பின்பற்றப்படும் பல்வேறு நலத்திட்ட உதவிகளும் வழங்குவதற்கான விதிமுறைகள் குறித்த அரசாணை வெளியிடப்பட்டுள்ளது.

இந்நல வாரியத்தில் தமிழ்நாட்டில் உள்ள பள்ளிவாசல்கள் மற்றும் மதரஸôக்களில் பணிபுரியும் ஆலிம்கள், பேஷ் இமாம்கள், அரபி ஆசிரியர்கள், ஆசிரியைகள், மோதினார்கள், பிலால்கள் மற்றும் இதர பணியாளர்கள், தர்காக்கள் மற்றும் அடக்க ஸ்தலங்கள், தைக்காக்கள், ஆஷீர்கானாக்கள் மற்றும் முஸ்லீம் அனாதை இல்லங்கள் ஆகியவைகளில் பணிபுரியும் முஜாவர் உள்ளிட்ட பணியாளர்கள் உறுப்பினர்களாக சேரலாம்.

இவ்வாறான நிலையங்களில் பணிபுரியும் 18 வயது நிரம்பிய 60 வயதுக்கு மேற்படாத பணியாளர்கள் பதிவு பெற தகுதியுடையவர்கள்.

உலமாக்கள் மற்றும் பணியாளர்கள் நல வாரியத்தில் உறுப்பினர்களாக பதிவு செய்து கொள்பவர்களுக்கு, விபத்தில் மரணம் ஏற்பட்டால் ரூ. 1 லட்சம் உதவித் தொகை, ஊனம் ஏற்பட்டால் ரூ. 10 ஆயிரம் முதல் ரூ. 1 லட்சம் வரை உதவித் தொகை, இயற்கை மரணத்திற்கு உள்ளானவர் குடும்பத்திற்கு ரூ. 15 ஆயிரம் உதவித் தொகை, குழந்தைகளுக்கு கல்வி உதவித் தொகை, திருமண உதவித் தொகை உள்ளிட்ட பல்வேறு உதவித் தொகைகள் வழங்கப்படும்.

தற்போது நடைமுறையில் உள்ள உலமா ஓய்வூதியத் திட்டத்தின் கீழ் ஓய்வூதியம் பெறுபவர்கள் இந்நல வாரியத்தில் முதியோர் ஓய்வூதியம் பெறத் தகுதியற்றவராவர்.

அரசு அல்லது அரசு சார்ந்த மற்றும் அமைப்பு சார்ந்த நிறுவனங்களில் பணிபுரிந்து, அந்நிறுவனங்களில் வழங்கப்படும் அனைத்து சலுகைகளையும் பெறும் உலமாக்கள் மற்றும் பணியாளர்கள் இத்திட்டத்தின் கீழ் பயன்களை பெற இயலாது.

வேறு நலவாரியங்களில் உறுப்பினராக உள்ள உலமாக்கள் மற்றும் பணியாளர்கள் ஏதேனும் ஒரு நல வாரியத்தின் மூலம் மட்டும்தான் நலத்திட்ட உதவிகளைப் பெற தகுதியுடையவர் ஆவார்.

பதிவு பெற்ற உறுப்பினர்களுக்கு அடையாள அட்டை இலவசமாக வாரியத்தால் வழங்கப்படும். உலமாக்கள் மற்றும் பணியாளர்கள் நல வாரியத்தில் உறுப்பினராகப் பதிவு செய்வதற்கு, தூத்துக்குடி மாவட்ட ஆட்சியர் அலுவலக வளாகத்தில் உள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலரை அணுகலாம் என்றார் ஆட்சியர்.

ஸ்டேட் பாங்க் தேர்வு வேலைவாய்ப்பு அலுவலகத்தில் இலவச பயிற்சி

ஸ்டேட் பாங்கில் நாடுமுழுவதும் 11 ஆயிரம் எழுத்தர் பணியிடங்களுக்கான எழுத்துதேர்வுகள், 8-11-09 மற்றும் 15-11-09 ஆகிய நாட்களில் நடக்கிறது.இதற்கான இலவசபயிற்சிவகுப்புகள் தூத்துக்குடி மாவட்ட வேலைவாய்ப்பு அலுவலகத்தில் நடக்கிறது.

தூத்துக்குடி மாவட்ட வேலைவாய்ப்பு அலுவலகத்தில் செயல்படும் தன்னார்வ பயிலும் வட்டம் மூலமாக வரும் 19ம் தேதி காலை 10 மணிக்கு ஸ்டேட் பாங்க் எழுத்துதேர்வுக்கான இலவச பயிற்சிவகுப்புகள் துவங்குகின்றன. திருச்செந்தூர், உடன்குடி பகுதியை சேர்ந்தவர்கள் இளம் முன்னோடிசங்கம் இணைந்து ஆறுமுகநேரியில் நடத்தும் பயிற்சிவகுப்புகளிலும் விளாத்திகுளம் கோவில்பட்டி பகுதியை சேர்ந்தவர்கள் விளாத்திகுளம் வேம்பு மக்கள் சக்தி இயக்கத்தில் நடத்தும் பயிற்சியில் கலந்துகொள்ளலாம்.

பயிற்சி வகுப்புகள் வரும் 19 முதல் துவங்கி தேர்வுநாள் வரை அனைத்து சனி,ஞாயிறு விடுமுறை நாட்களில் நடக்கும். இவ்வாறு மாவட்ட வேலைவாய்ப்பு அலுவலர் வெளியிட்டுள்ள செய்திகுறிப்பில் தெரிவிக்கப்பட்டுள்ளது.