"ஜாக்கி'கள் மூலம் வீட்டை அப்படியே தூக்கி உயர்த்தி கட்டும் அதிசய தொழில்நுட்பம்

சென்னை:மழைக்காலத்தில் ஏற்படும் பிரச்னைகளுக்கு தீர்வு காணும் வகையில் 60 டன் எடை கொண்ட ஒரு அடுக்குமாடி வீட்டை பெயர்த்து, 260 "ஜாக்கி'கள் மூலம் அப்படியே தூக்கி, நான்கு அடி உயர்த்தும் புதிய கட்டட தொழில்நுட்ப பணிகள், தமிழகத்தில் முதல் முறையாக வேளச்சேரியில் நடந்து வருகிறது.

மழைக்காலம் என்றால் வேளச்சேரி, வெள்ளக் காடாகிவிடும். குடியிருப்பு பகுதிகளில் இடுப்பளவு மழைநீர் தேங்கும். படகுகள் மூலம் தான் பயணிக்க முடியும். இப்பிரச்னை தொடர்ந்து கொண்டே இருக்கிறது. அப்பகுதியை சேர்ந்த ராமன் என்ற ஆடிட்டர் ஒருவர், நவீன தொழில்நுட்பம் மூலம் தனது வீட்டை பெயர்த்து, வாகனங்களுக்கு பயன்படுத்தும் "ஜாக்கி'கள் மூலம் நான்கு அடி உயரம் தூக்கி, கட்டும் முயற்சியில் ஈடுபட்டுள்ளார்.
ராமன் மனைவி லட்சுமி கூறியதாவது: நாங்கள் வேளச்சேரி, பேபி நகர், பட்டுக்கோட்டை முத்துக்குமாரசாமி சாலையில் 2001ம் ஆண்டு இடத்துடன் புதியதாக கட்டப்பட்ட வீட்டை வாங்கினோம். கீழ் தளம், மேல் தளம் 2,600 சதுர அடியில் கட்டப்பட்டது. குடிவந்த சில மாதங்களில் மழைக்காலம் துவங்கியது. அப்போது, வேளச்சேரி பகுதியில் ஏற்பட்ட வெள்ளப்பெருக்கை கண்டு அதிர்ச்சியடைந்தோம். எங்கள் வீட்டிற்குள் இடுப்பளவு தண்ணீர் புகுந்தது. ஒவ்வொரு ஆண்டும் மழைக்காலத்தில் எங்களுக்கு இதே நிலைதான். விமோசனம் கேட்டு மாநகராட்சியை அனுகினோம். பலரிடம் ஆலோசனை கேட்டோம். அப்போது, முகப்பு பகுதியில் தடுப்பு கட்டுங்கள்; வீட்டின் தரைத்தளத்தை உயர்த்துங்கள்; கீழ்தளத்தில் உள்ள அறைகளை அகற்றிவிட்டு கார் "பார்க்கிங்' ஆக்கிவிடுங்கள் என தங்களின் கருத்துக்களை தெரிவித்தனர்.

வீடு கட்டும் கான்ட்ராக்டர் ஒருவரிடம் ஆலோசனை கேட்டபோது,"உங்கள் வீட்டை இடித்துவிட்டு அடுக்குமாடி வீடுகள் கட்டி விடலாம். அதில், எனக்கு 60 சதவீதமும்; உங்களுக்கு 40 சதவீதம்' என பங்குபோட ஆரம்பித்தார். இதனால், நாங்கள் குழம்பிப் போனோம். இறுதியில், என் கணவர் டில்லியில் உள்ள தனது நண்பர் ஒருவரிடம் ஆலோசனை கேட்டார். அப்போது, வீட்டை இடிக்காமல் பெயர்த்து, வாகனங்களுக்கு டயர் மாற்றப் பயன்படுத்தும் "ஜாக்கி'களை பயன்படுத்தி தேவையான உயரத்திற்கு மாற்றியமைக்கும் தொழில்நுட்பம் குறித்து கூறினார். அவ்வாறு உயரமாக்கப்பட்ட, கட்டப்படும் சில வீடுகளையும் நேரில் கண்டு அதிசயித்தோம். தற்போது, எங்கள் வீட்டையும் அதே தொழில்நுட்பம் மூலம் பெயர்த்து நான்கு அடிக்கு உயர்த்தி வருகிறோம். இவ்வாறு லட்சுமி கூறினார்.

இந்த புதிய தொழில்நுட்பத்தை செயல்படுத்தி வரும் அரியானாவை சேர்ந்த அர்கேஷ் குமார் சவுகான் கூறுகையில்,""ஜாக்கி'கள் மூலம் பழைய வீடுகளை தரைமட்டத்தில் இருந்து பெயர்த்து,தேவையான அளவு உயர்த்தும் கட்டட தொழில்நுட்ப முறையை நாங்கள் கடந்த 1991ம் ஆண்டு முதல் செய்து வருகிறோம். முதன் முதலில் அரியானா பகுதியில் இருந்த பாலத்தை பெயர்த்து உயர்த்தினோம். அதன் பிறகு பல மாநிலங்களில் நூற்றுக்கணக்கான வீடுகளை இடிக்காமல், பெயர்த்து தேவையான உயரத்திற்கு உயர்த்திக் கொடுத்து வருகிறோம். தமிழகத்தில் முதல் முறையாக ராமனின் வீட்டை எங்கள் தொழில்நுட்பத்தில் உயர்த்தி வருகிறோம். கடந்த மாதம் 16ம் தேதி பணிகளை துவக்கினோம். இன்னும் சில நாட்களில் பணிகள் முடிந்து விடும். இந்த தொழில்நுட்ப முறையை நாங்கள் அரசிடம் முறைப்படி பதிவு செய்துள்ளோம். பல முறை லிம்கா சாதனை புத்தகத்தில் எங்கள் தொழில்நுட்பம் இடம் பெற்றுள்ளது. கின்னஸ் புத்தகத்திலும் பதிவு செய்துள்ளோம்' என்றார்.

வீட்டை தூக்கும் நவீன தொழில்நுட்ப முறை: வேளச்சேரியில் உள்ள ராமன் வீட்டில் 16 பேர் கொண்ட குழுவினர் பணி புரிந்து வருகின்றனர். 2,600 சதுர அடி, 60 டன் எடை கொண்ட அவரின் வீட்டை தரை மட்டத்தில் இருந்து நான்கு அடி உயர்த்தி வருகின்றனர். முதலில் சுவர்களின் இருபுறமும் தோண்டி அதன் கீழ் ஒவ்வொரு பக்கமாக "ஜாக்கி'கள் வைக்கின்றனர். அந்த வீட்டிற்கு 260 "ஜாக்கி'கள் பயன்படுத்தப்பட்டுள்ளன. தேவையான உயரத்திற்கு 16 பேரும் ஒரே நேரத்தில் "ஜாக்கி'களை இயக்கி உயர்த்துகின்றனர். பின், பிரத்யேகமாக தயாரிக்கப்பட்ட சிமென்ட் செங்கற்களை வைத்து கட்டுகின்றனர். இந்த முறையில் வீட்டின் தரைத்தளம் மட்டும் சேதமடைகிறது. சுவர்களில் விரிசல் கூட விழுவதில்லை. மூன்று அடி வரை உயர்த்துவதற்கு, சதுர அடிக்கு 225 ரூபாய் கூலி மட்டும் வசூலிக்கின்றனர். அதன் பிறகு ஒவ்வொரு சதுர அடிக்கும் ரூ.80, ரூ.100 என வசூலிக்கின்றனர். ஒரு மாதத்திற்குள் வீட்டை உயர்த்தும் பணிகள் முடிக்கப்படுகின்றன.

செய்தி : தினமலர்

2010க்கான ஹஜ் பயணத்திற்கு சர்வதேச பாஸ்போர்ட்: தமிழக அரசு வேண்டுகோள்

சென்னை: ஹஜ் பயணம் மேற்கொள்ள இருக்கும் பயணிகள் உடனடியாக சர்வதேச பாஸ்போர்ட் பெற விண்ணப்பிக்குமாறு தமிழக அரசு அறிவித்துள்ளது.

தமிழக அரசு வெளியிட்டுள்ள செய்திக்குறிப்பு:

ஹஜ் விசா பெறுவதற்கு பயணிகள் சர்வதேச பாஸ்போர்ட் வைத்திருக்க வேண்டியது அவசியம் என சவூதி அரேபிய அரசு முடிவு செய்துள்ளதாக மும்பை, இந்திய ஹஜ் குழுவின் முதன்மைச் செயல் அலுவலர் தெரிவித்துள்ளார்.

இதனால், ஹஜ் 2010க்கு புனித பயணம் மேற்கொள்ள உள்ளவர்கள் விண்ணப்பிக்கும்போது பன்னாட்டு பாஸ்போர்ட்களை தங்களுடன் வைத்திருக்க வேண்டும்.

ஹஜ் 2010க்கு புனிதப் பயணம் மேற்கொள்ள விரும்புவோர் தங்களிடம் பன்னாட்டு பாஸ்போர்ட் தற்போது இல்லாதிருப்பின் அதற்காக இப்போதே விண்ணப்பிக்க தயாராக வேண்டும்.

ஹஜ் 2010க்கான அறிவிப்பு வரும் பிப்ரவரி, மார்ச் மாதத்தில் அறிவிக்கப்படலாம். இந்தக்கால அவகாசத்தைப் பயன்படுத்தி சர்வதேச பாஸ்போர்ட் பெற்றுக்கொள்ள வேண்டும்' என கூறப்பட்டுள்ளது.

நன்றி- ThatsTamil

முஸ்லிம் பெண்கள் பர்தா அணிவது...விஜய் டிவி அலுவலக முற்றுகை

அளவற்ற அருளாளனும் நிகரற்ற அன்புடையோனுமாகிய ஏக இறைவனின் திருப்பெயரால்...



முஸ்லிம் பெண்கள் பர்தா அணிவது மிகவும் கேவலமானது, ஒவ்வொரு பெண்களையும் நிர்பந்தபடுத்தி தான் பர்தா அணிய வைக்கின்றார்கள் என்று வக்கிரச் செய்தியை முஸ்லிம்கள் என்று தங்களை சொல்லக் கூடிய ஒழுங்கீனமான பெண்களை வைத்து நிகழ்ச்சி தயாரித்து ஒளிபரப்பத் துடிக்கும் விஜய் டிவியே! முஸ்லிம்களுக்கு எதிரான மதத்துவேச நிகழ்ச்சியை ஒளிபரப்பாதே. ஒளிபரப்பமாட்டோம் என்ற உறுதிமொழியை வருகின்ற வியாழன் இரவுக்குள் (14-1-2010) வழங்கவில்லையானால் 15-1-2010 மாலை 4 மணிக்கு விஜய் டிவி அலுவலகம் முஸ்லிம்களால் முற்றுகையிடப்படும் இன்ஷா அல்லாஹ்!

விஜய் டிவியின் இந்த வக்கிரச் செய்தியை ஒளிபரப்பாமல் நிறுத்தக் கோரி சென்னை மாநகர காவல்துறை கமிஷனிரிடம் தவ்ஹீத் ஜமாஅத் சார்பாக நேற்று (11-1-2010) புகார் மனு அளிக்கப்பட்டுள்ளது.

மேலும் இந்த ஒளிரப்பப்பட்டால் முஸ்லிம் சமுதாயம் மிகுந்த கொந்தளிப்பு ஆளாகும் எனவே மத துவேசத்தை பரப்பும் இந்த நிகழ்;சி தடை செய்யப்பட வேண்டும் விஜய் டிவிக்கும் எச்சரிக்கை கடிதம் நேற்று (11-1-2010) நேரடியாக தவ்ஹீத் ஜமாத் நிர்வாகிகளால் வழங்கப்பட்டுள்ளது.

உலகத் தமிழ் தொலைக்காட்சி வரலாற்றில் முதல் முறையாக ஸ்டார் விஜய் டிவிக்கு நேரடி விவாதத்திற்கு பகிரங்க அழைப்பு:

போலிமதவாதிகளை வைத்து இஸ்லாத்தை கொச்சைபடுத்தும் இந்த போக்கை கைவிட்டு விட்டு பர்தா அணிவது தான் பெண்ணினத்திற்கு பாதுகாப்பானதும் கண்ணியமானது என்பதை நிருபீக்க நேரடி விவாதத்திற்கு தமிழ்நாடு தவ்ஹீத் ஜமாஅத் தயாராக இருக்கின்றது என்ற பகிரங்க விவாத நேரடி விவாத அழைப்பும் கொடுக்கப்பட்டுள்ளது.

சென்னை மாநகர காவல்துறை கமிஷனர் மற்றும் விஜய் டிவிக்கு கொடுக்கப்பட்ட கடிதம்





ஈமெயில் உதவி : Mr. நெல்லை சிந்தா, கத்தார்

புகையை கக்கும் வாகனம் ஓட்டினால் அபராதம்: நாளை முதல் அமல்!

சென்னையில் புகையை அதிகளவில் வெளியிடும் வாகனங்களை ஓட்டினால் நாளை (18ம் தேதி) முதல் ரூ.50 அபராதம் வசூலிக்க போக்குவரத்து போலீசார் முடிவு செய்துள்ளனர்.

தற்போது வாகன பெருக்கம் அதிகரித்து வரும் சூழலில், அதில் இருந்து வரும் புகையினாலும் அதிக அளவில் மாசு ஏற்படுவது தெரிய வந்துள்ளதால், அதை கட்டுப்படுத்த நடவடிக்கை எடுக்க வேண்டும் என்று மத்திய அரசு, மாநில அரசுகளுக்கு உத்தரவிட்டுள்ளது.

அதைத்தொடர்ந்து, மாசு ஏற்படுத்தும் வாகனங்கள் மீது நடவடிக்கை எடுக்க, சென்னை போலீசாருக்கு தமிழக அரசு உத்தரவிட்டுள்ளது. அதனால், இப்போது புதிதாக 16 பொலைரோ கார்கள் வாங்கப்பட்டுள்ளன. ஒவ்வொரு காரும் ரூ.9 லட்சம் மதிப்புடையவை. ஒவ்வொரு காரிலும் புகையை கண்டறியும் இயந்திரம், கம்ப்யூட்டர், யு.பி.எஸ்., வெப்கேமரா ஆகியவை ரூ.2 லட்சம் செலவில் பொருத்தப்பட்டுள்ளது.

மேலும் 8 கார்கள் பெட்ரோல் வாகனத்தையும், 8 கார்கள் டீசல் வாகனத்தையும் கண்டறியும் வகையில் மாற்றி அமைக்கப்பட்டுள்ளது. நாளை (18ம் தேதி) முதல் நகர் முழுவதும் இந்த கார்களை முக்கியமான சாலை ஓரமாக நிறுத்தி, வாகனங்களை சோதனையிட சென்னை போக்குவரத்து போலீசார் திட்டமிட்டுள்ளனர்.

புகையை அதிக அளவில் வெளியிடும் வாகனம் ஓட்டினால் ரூ.50 அபராதம் விதிக்க உத்தரவிடப்பட்டுள்ளது. இந்த புதிய வாகனங்கள் மூலம் சோதனை நடத்துவதால், பெருமளவில் வாயுவை வெளியிடும் வாகனங்களை கட்டுப்படுத்த முடியும் என்று போலீசார் கருதுகின்றனர். மேலும், புகை சோதனை நடத்தும் கம்ப்யூட்டரே அபராதத்துக்கான பில்லை கொடுக்கும்.

நாளை முதல் சோதனை நடத்த உத்தரவிடப்படும். நகர் முழுவதும் முக்கியமான சாலைகளில் இந்த கார்களை நிறுத்த சோதனை நடத்தப்படும் என்று போலீஸ் உயர் அதிகாரி ஒருவர் தெரிவித்தார்.

துபாய் தமிழக பொறியாளர் இக்பாலுக்கு சமுதாயச் சுடர் விருது-ஆளுநர் வழங்கினார்

சென்னை: துபாயில் வசிக்கும் தமிழ் பொறியாளரான எம்.ஜே.முஹம்மது இக்பாலுக்கு ஆளுநர் சுர்ஜித் சிங் பர்னாலா சமுதாயச்சுடர் விருது வழங்கி கெளரவித்தார்.

முஹம்மது சதக் கலை மற்றும் அறிவியல் கல்லூரியின் சமுதாய கூடத்தில் நடந்த இஸ்லாமிய இலக்கிய இரண்டாம் மாநில மாநாட்டில் இலக்கிய ஆய்வுகள், பட்டின்றம், நூலாய்வுகள், நூல் வெளியீடுகள் நடந்தன.

நிறைவு விழாவில் பலருக்கு இலக்கியமாமணி விருதுகளும், மூன்று பேருக்கு வாழ்நாள் சாதனையாளர் விருதுகளும், 7 பேருக்கு சமுதாய சுடர் விருதுகளும் வழங்கப்பட்டன.

தஞ்சை மாவட்டம், வழுத்தூரைச் சேர்ந்தவரும் தற்போது துபாயில் வசிப்பவருமான எம்.ஜே.முஹம்மது இக்பாலுக்கு ஆளுநர் சுர்ஜித் சிங் பர்னாலா சமுதாயச்சுடர் விருது வழங்கி கெளரவித்தார்.

பி.இ, எம்.பி.ஏ. பட்டதாரியான இக்பால் 1986ம் ஆண்டு துபாய் ETA MELCO Elevator நிறுவனத்தில் பயிற்சி என்ஜினீயராக தனது பணியை தொடங்கியவர்.

தனது கடின உழைப்பால் பொது மேலாளர் ஆனார். துபாயில் உருவான முக்கிய கட்டிடங்கள், விமான நிலைய லிப்ட்டுகள் மற்றும் எலிவேட்டர்கள் அமைக்கும் பணியை வெற்றிகரமாக செய்து முடித்து பாராட்டு பெற்றவர்.

ஜப்பானின் மிட்சுபிஸி நிறுவனத்தின் "தங்கச் சான்றிதழை" தொடர்ந்து 3 முறை வென்றவர்.

ஜப்பான் மற்றும் பன்னாட்டு கல்வி நிறுவனங்களில் பல்வேறு மேலாண்மை பட்டயம் மற்றும் சான்றிதழ் கல்வியில் தேர்ச்சி பெற்றவர்.

அமெரிக்காவின் முன்னணி தொழில்முறை அமைப்பான I.E.E.E (Institute of Electrical and Electronics Engineer) அமைப்பின் மூத்த உறுப்பினராகவும் உள்ளார்.

துபாய் என்ஜினீயர்கள் சங்கத் தலைவராகவும், ஆலோசகராகவும் உள்ள இவர் அகில இந்திய மேலாண்மை சங்கத்தின் ஆயுட்கால உறுப்பினர் ஆவார்.

இது தவிர பல்வேறு இந்திய, வளைகுடா மற்றும் சர்வதேச அமைப்புகளில் முக்கிய பொறுப்புகளில் இருந்து வருகிறார். பிரபலங்களின் விபரங்கள் அடங்கிய உலகப்புகழ் பெற்ற புத்தகமான மார்குயூஸ் கூ இஸ் கூ புத்தகத்தில் பொதுப்பிரிவிலும் அறிவியல் மற்றும் பொறியியல் பிரிவிலும் இவரது பெயர் இடம் பெற்றுள்ளது.

துபாயில் இருந்து வெளிவரும் ஆங்கில நாளிதழ்களில் தனது துறை சார்ந்த கட்டுரைகளையும், ரமலான் காலங்களில் நோன்பின் பெருமைகள் குறித்த கட்டுரைகளையும், சமய ஒற்றுமை நல்லிணக்கத்திற்கான கட்டுரைகளையும் எழுதி வருபவர்.

இது தவிர அமெரிக்காவில் இருந்து வெளிவரும் எலிவேட்டர் வோர்ல்டு மாத இதழின் ஆசிய நாடுகளின் நிருபராகவும் உள்ளார்.

பல்வேறு சர்வதேச கருத்தரங்குகள், மாநாடுகள், கூட்டங்களில் பொறியியல், தொழில்நுட்பம், அறிவியல் வளர்ச்சி, சமுதாய முன்னேற்றம், இளைய தலைமுறையினருக்கான வழிகாட்டல் குறித்து ஆய்வு கட்டுரைகளை சமர்பித்துள்ளார்.

வெளிநாடுகளிலும், இந்தியாவிலும் இளைய தலைமுறையினர் வேலை வாய்ப்பு பெற தேவையான ஆலோசனைகளையும், உதவிகளையும் அளித்து வருகிறார்.

மேலும் பள்ளி-கல்லூரி மாணவ, மாணவிகளுக்கு உயர் கல்வி குறித்த ஆலோசனைகளையும் வழங்கி வரும் இக்பால், தனக்கு வழங்கப்பட்ட சமுதாயச் சுடர் விருதை தனக்கு தொழில் வழிகாட்டியாக விளங்கும் தொழிலதிபர் செய்யது முஹம்மது ஸலாஹுத்தீன் மற்றும் தன் பெற்றோருக்கு அர்ப்பணிப்பதாகக் கூறுகிறார்.

விழாவில், தமிழ்நாடு வக்ப் வாரிய தலைவர் டாக்டர். கவிக்கோ அப்துல் ரஹ்மான், தமிழக காங்கிரஸ் சிறுபான்மை பிரிவு தலைவர் எஸ்.எம். ஹிதாயத்துல்லாஹ், கேப்டன் அமீர் அலி மற்றும் பலரும் பங்கேற்றனர்.

நிகழ்ச்சியில் உமர் புலவர் விருது கவிஞர் மு.மேத்தாவுக்கும், கவிக்கோ அப்துல் ரஹ்மான் அறக்கொடை நிதியை துபாஷ் தாஜுதீனும், சமுதாயச் சுடர் விருதுகள் ஜமால் முஹம்மது கல்லூரியின் செயலாளர் M.J.M. அப்துல் கபூர், A.M.S. என்ஜினீயரிங் கல்லூரியின் தாளாளர் S.N.M. ஷேக் நூருத்தீன், பத்திரிக்கையாளர் சையத் முஹம்மத், தமிழ்நாடு ஜமாஅத்துல் உலமா தலைவர் மெளலவி TJM. ஸலாஹுத்தீன் ரியாஜி, நோபல் மரைன் ஷாஹுல் ஹமீது ஆகியோருக்கும் வழங்கப்பட்டன.

நிகழ்ச்சியில் ஆயிரக்கணக்கானோர் கலந்து கொண்டனர்.

சென்னையில் இஸ்லாமிய தமிழ் இலக்கிய மாநில மாநாடு

இஸ்லாமிய தமிழ் இலக்கிய மாநில மாநாடு சோழிங்கநல்லூரில் நாளை நடக்கிறது.

இஸ்லாமிய இலக்கிய கழகம் சார்பில் இஸ்லாமிய தமிழ் இலக்கிய 2வது மாநில மாநாடு சென்னை அருகே சோழிங்கநல்லூரில் உள்ள முகமது சதக் கலை அறிவியல் கல்லூரியில் நாளை நடைபெறவுள்ளது.

கேப்டன் அமீர் அலி தலைமையில் நடக்கும் இம் மாநாட்டில் பீட்டர் அல்போன்ஸ் எம்.எல்.ஏ. ஆய்வுக் கோவைகளை வெளியிடுகிறார். எல்.கே.எஸ்.சையது அகமது அதைப் பெற்றுக் கொள்கிறார்.

நெல்லை மனோன்மணியம் சுந்தரனார் பல்கலைக்கழக துணைவேந்தர் சபாபதி மோகன் இலக்கிய சுடர் விருதை வழங்குகிறார்.

மாலை நடக்கும் நிறைவு விழாவுக்கு இஸ்லாமிய இலக்கிய கழக பொதுச்செயலாளர் எஸ்.எம்.இதயதுல்லா தலைமை தாங்குகிறார். கவர்னர் சுர்ஜித் சிங் பர்னாலா கலந்து கொண்டு ரூ.1 லட்சம் பொற்கிழியுடன் கூடிய உமறுப் புலவர் விருதை கவிஞர் மு.மேத்தாவுக்கு வழங்குகிறார்.

மத்திய செய்தித்துறை இணையமைச்சர் ஜெகத்ரட்சகன் வாழ்நாள் சாதனையாளர் விருதுகளை நெல்லை சதக் அப்துல்லா கல்லூரி தலைவர் டி.இ.எஸ்.பத்ஹூர் ரப்பானிக்கும், சதக் கல்லூரி தலைவர் எஸ்.எம்.ஹமீது அப்துல்காதருக்கும் வழங்குகிறார்.

11 பேருக்கு சமுதாய சுடர் விருதுகளை சபாநாயகர் ஆவுடையப்பன் வழங்குகிறார்.

கவிக்கோ அறக்கொடை நிதியை துபாஷ் தாஜூதீனுக்கு நீதிபதி ஜி.எம்.அக்பர் அலி வழங்குகிறார். 15பேருக்கு இலக்கிய சுடர் விருது வழங்கப்படுகிறது.

விழாவில் இஸ்லாமிய இலக்கிய கழக துணைத்தலைவர் பிரசிடென்ட் அபுபக்கர் எஸ்.ஐ.இ.டி. கல்லூரிக்கு ரூ.1 லட்சம் வழங்குவார். அதைக் கொண்டு அவரது பெயரில் தமிழ் ஆய்வுக்காக அறக்கட்டளை தொடங்கப்படுகிறது.

நாளை சென்ட்ரல் ரயில் நிலையம் மூடல்

நாளை சென்னை சென்ட்ரல் ரயில் நிலையம் மூடப்படவுள்ளது.

சென்ட்ரல் ரயில் நிலையத்தில் பிளாட்பாரம் விரிவாக்கம், கிராசிங் மற்றும் சிக்னல் பராமரிக்கும் பணி 4 கட்டமாக நடக்கிறது.

நாளை இறுதிக் கட்டப்பணிகள் நடைபெற இருப்பதால் காலை 9 மணி முதல் இரவு 9 மணி வரை சென்ட்ரல் நிலையத்துக்கு எந்த ரயில்களும் வராது.

அங்கிருந்து எந்த ரயிலும் புறப்பட்டுச் செல்லாது.

சென்ட்ரலுக்கு வர வேண்டிய ரயில்கள் எழும்பூர், பெரம்பூர், அரக்கோணம் நிலையங்களில் நிறுத்தப்படும்.

பயணிகளுக்கு ஏதாவது சந்தேகங்கள் இருந்தால் கீ்ழ்கண்ட எண்களை தொடர்பு கொள்ளலாம் என தென்னக ரயில்வே அறிவித்துள்ளது.

அந்த ஹெல்ப் லைன் எண்கள்:

29015209, 29015210, 29015211, 25330710, 25330717, 28190216

பக்ரீத் பண்டிகை : குர்பானிக்கு 18 ஒட்டகங்கள் வந்தன

தண்டையார்பேட்டை: பக்ரீத் பண்டிகைக்கு குர்பானி கொடுப்பதற்காக 18 ஒட்டகங்கள் வண்ணாரப்பேட்டைக்கு கொண்டு வரப்பட்டுள்ளன.

முஸ்லிம்களின் புனித பண்டிகைகளில் ஒன்றான பக்ரீத், வரும் 28-ம் தேதி கொண்டாடப்படுகிறது. இந்த பண்டிகையின்போது ஆடு, மாடு, ஒட்டகம் போன்றவற்றை வாங்கி வெட்டி இறைவனுக்கு படைப்பார்கள். பின்னர் அவற்றை உறவினர்கள், ஏழைகளுக்கு வழங்குவார்கள். கடந்த சில ஆண்டுகளாக சென்னையில் ஒட்டகங்களை முஸ்லிம்கள் குர்பானி கொடுத்து வருகின்றனர். ஒட்டகத்தின் விலை அதிகமாக இருப்பதால், சிலர் கூட்டாக சேர்ந்து வாங்கி வெட்டி பங்கு போட்டுக் கொள்கின்றனர்.

இந்த ஆண்டு பக்ரீத் பண்டிகைக்கு குர்பானி கொடுக்க வண்ணாரப்பேட்டை சிமெண்ட்ரி சாலையில் உள்ள தர்காவுக்கு ஆந்திர மாநிலம் கடப்பாவில் இருந்து லாரிகள் மூலம் 18 ஒட்டகங்கள் வந்து இறங்கின. அவற்றை தர்காவில் உள்ள வளாகத்தில் விட்டுள்ளனர். இந்த ஒட்டகம் ஒவ்வொன்றும் 250 முதல் 300 கிலோ வரை எடை கொண்டது. ஒரு ஒட்டகத்தின் விலை ரூ.35 ஆயிரம் முதல் ரூ.40 ஆயிரம் வரை.

தமுமுகவை சேர்ந்த ஏ.என்.தாஹா மற்றும் அமீது ஆகியோர் இந்த ஒட்டகங்களை குர்பானி கொடுப்பதற்காக வாங்கியுள்ளனர்.

செய்தி : தினகரன்

சென்னையில் இருத்து ஹஜ் பயணிகளின் முதல் விமானம் நேற்று புறப்பட்டது

சென்னையிலிருந்து 417 ஹஜ் யாத்ரீகர்கள் நேற்று காலை மதீனாவுக்குப் புறப்பட்டுச் சென்றனர்.

ஹஜ் புனித பயணம் மேற்கொள்ள விரும்பும் பயணிகளுக்கு தமிழக அரசின் ஹஜ் கமிட்டி, ஆண்டுதோறும் தேவையான ஏற்பாடுகளை செய்து வருகிறது.

புனிதப் பயணம் மேற்கொள்ள இருக்கும் பயணிகளின் முதல் குழுவில் 417 பேர் உள்ளனர். இவர்கள் நேற்று அதிகாலை 4 மணிக்கு சென்னை சர்வதேச விமான நிலையத்தில் இருந்து மதீனாவுக்கு புனிதப் பயணம் கிளம்பினர்.

இவர்களை வக்பு வாரியம் மற்றும் சுற்றுச்சூழல் துறை அமைச்சர் டி.பி.எம்.மைதீன்கான் வழியனுப்பி வைத்தார். தமிழ்நாடு ஹஜ் கமிட்டித் தலைவரும் எம்.பி.யுமான ஜே.எம்.ஆரூண் ரஷீத், துணைத்தலைவர் பிரசிடெண்ட் அபுபக்கர் உறுப்பினர் செயலாளர் கே.அலாவுதீன் உட்பட பலர் இந்த நிகழ்ச்சியில் கலந்து கொண்டனர்.

இந்த ஆண்டுக்கான புனித பயணத்தில் சில மாறுபாடுகள் செய்யப்பட்டு உள்ளன. பன்றிக் காய்ச்சலால் பாதிக்கப்பட்ட பயணிகளை தவிர்ப்பதற்காக, சவூதி அரேபியா அரசு சில கட்டுப்பாடுகளை விதித்தது. பன்றிக் காய்ச்சல் நோய்க்கான அறிகுறி இல்லை என்ற மருத்துவ சான்றிதழைப் பெற வேண்டும் என்று வலியுறுத்தப்பட்டது.

இந்தியாவில் இருந்து செல்லும் அனைத்து ஹஜ் பயணிகளும் சர்வதேச பாஸ்போர்ட்டு வைத்திருக்க வேண்டும் என்றும் கட்டுப்பாடு விதிக்கப்பட்டது. எனவே, அனைத்து ஹஜ் பயணிகளுக்கும் 8 மாதத்துக்கு மட்டுமே பயன்படுத்தக் கூடிய சர்வதேச பாஸ்போர்ட்டுகளை மத்திய அரசு வழங்கியது. .

இந்த பாஸ்போர்ட்டை ஒருமுறைதான் பயன்படுத்த முடியும். மேற்கொண்டு அதை புதுப்பிக்க இயலாது. இதுவரை பொதுவான பாஸ்போர்ட் மூலம் ஹஜ் பயணிகள், புனிதப் பயணம் மேற்கொண்டு வந்தனர். ஆனால் சவுதி அரேபியா அரசு விதித்த சில நிபந்தனைகளால், சர்வதேச பாஸ்போர்ட்டுகளுடன் பயணம் செல்லும் நிலை ஏற்பட்டு உள்ளது. அந்த வகையில் இந்தியாவில் இருந்து சர்வதேச பாஸ்போர்ட் மூலம் பயணிகள் ஹஜ் பயணம் செல்வது இதுதான் முதன்முறை.

இந்தியாவில் இருந்து செல்லும் ஹஜ் பயணிகளுக்கு தேவைப்படும் மருத்துவ சிகிச்சை அளிப்பதற்காக மருத்துவக் குழுவும் ஏற்கனவே சவூதி அரேபியாவுக்கு அனுப்பப்பட்டுள்ளது.

இந்த ஆண்டு இந்தியாவிலிருந்து 1 லட்சத்து 60 ஆயிரத்திற்கும் மேற்பட்ட யாத்ரீகர்கள் ஹஜ் செல்கின்றனர் என்பது குறிப்பிடத்தக்கது.

அழகுபடுத்தப்பட்டுள்ள மெரீனாவுக்கு 24 மணி நேர தனியார் பாதுகாப்பு

சென்னை: பெரும் பொருட் செலவில் அழகுபடுத்தப்பட்டு வரும் மெரீனா கடற்கரைக்கு 24 மணி நேர தனியார் பாதுகாப்பை வழங்குவது குறித்து சென்னை மாநகராட்சி நிர்வாகம் யோசித்து வருகிறது.

தனியார் செக்யூரிட்டி ஏஜென்சி மூலம் 24 மணி நேரமும் இங்கு பாதுகாவலர்கள் நியமிக்கப்படவுள்ளனர். ரூ. 17 கோடி செலவில் தொடங்கப்பட்ட மெரீனா கடற்கரை அழகுபடுத்தும் திட்டம் தற்போது முடியும் தருவாயை நெருங்கி விட்டது.

நவம்பர் மாதம் இந்தத் திட்டம் முடிவடையும். இந்த நிலையில் அங்கு அமைக்கப்பட்டுள்ள புல்வெளிகள், நீரூற்றுகள், பளபள நடைபாதைககள், தடுப்புக் கம்பிகள் என உள்ளிட்டவற்றைப் பாதுகாப்பது இப்போது முக்கியமாகியுள்ளது.

மாநகராட்சியில் ஊழியர் பற்றாக்குறை இருப்பதால், இந்தப் பணிக்கு தனியார் பாதுகாவலர்களைப் பயன்படுத்த மாநகராட்சி முடிவு செய்துள்ளது.

இதுகுறித்து மாநகராட்சி ஆணையர் ராஜேஷ் லக்கோனி கூறுகையில், பாதுகாப்பு ஏற்பாடுகளை வெளியிலிருந்து பெறத் திட்டமிட்டுள்ளோம். குறைந்துத 10 பாதுகாவலர்கள் நியமிக்கப்படுவார்கள். 24 மணி நேரமும் இவர்கள் பணியில் இருப்பார்கள். இதற்கான டெண்டர் விரைவில் இறுதி செய்யப்படும்.

மேலும், அழகுபடுத்தப்பட்ட மெரீனாவை பராமரிக்கும் பணிக்காக இளநிலைப் பொறியாளர் தலைமையில் ஒரு தனிப் பிரிவையும் மாநகராட்சி அமைக்கவுள்ளது. இதில் கன்சர்வன்சி இன்ஸ்பெக்டர், பணியாளர்கள் இருப்பார்கள். 2 ஷிப்டுகளாக இவர்கள் செயல்படுவார்கள்.

விரைவில் இந்தத் திட்டத்திற்கு மாநகராட்சி மாமன்றக் கூட்டத்தில் ஒப்புதல் அளிக்கப்படவுள்ளதாக லக்கோனி தெரிவித்தார்.

இந்தநிலையில் கடற்கரையில் அமைக்கப்பட்டுள்ள புல்வெளிகளை பராமரிக்கும் பணியில் மாநகராட்சி ஊழியர்கள் ஈடுபடுத்தப்பட்டுள்ளனர். கிட்டத்தட்ட 70 ஊழியர்கள் அங்குள்ள பூங்காக்களைப் பராமரிப்பது, சுத்தப்படுத்துவது உள்ளிட்ட பணிகளில் ஈடுபட்டு வருகின்றனர்.

இதுதவிர அவ்வப்போது கடற்கரையை சுத்தப்படுத்தும் பணியையும் மாநகராட்சி மேற்கொள்ளவுள்ளது. இதற்காக தலா ரூ. 3 லட்சம் மதிப்பிலான தூய்மைப்படுத்தும் எந்திரம் வாங்கப்படவுள்ளது. மொத்தம் நான்கு எந்திரங்கள் இதுபோல வாங்கப்படும்.

இதன் மூலம் நடைபாதைகள் சுத்தப்படுத்தப்படும். அதேபோல, புல்வெளிகளும் சிறப்பாக பராமரிக்கப்படும்.

மேலும் கடற்கரைக்கு வருவோருக்கு நல்ல தண்ணீர் கொடுப்பதற்காக ஆர்.ஓ அமைப்பும் ஏற்படுத்தப்படவுள்ளது. இதற்காக தொண்டு நிறுவனங்களை மாநகராட்சி தொடர்பு கொண்டுள்ளது.

தீபாவளி நெரிசல் - சென்னையில் இரவு விடிய விடிய பஸ்கள்

தீபாவளிப் பண்டிகைக்காக ஜவுளி உள்ளிட்ட பொருட்களை வாங்க வரும் மக்கள் கூடடம் அலை மோதுவதால் சென்னை கோயம்பேடு பஸ் நிலையம் மற்றும் தி.நகருக்கு விடிய விடிய டவுன் பஸ்கள் இயக்கப்படுகின்றன. கிட்டத்தட்ட 100 பஸ்களை மாநகரப் போக்குவரத்துக் கழகம் இயக்கவுள்ளது.

சென்னை நகரில் தீபாவளி வெப்பம் அதிகரித்துள்ளது. ஜவுளிப் பொருட்கள், வீட்டு உபயோகப் பொருட்கள் உள்ளிட்டவற்றை வாங்கும் மும்முரத்தில் மக்கள் பெருமளவில் நகரின் முக்கியப் பகுதிகளில் குவிந்து கொண்டிருக்கின்றனர்.

இவ்வாறு பொருட்கள் வாங்கும் பயணிகளின் வசதிக்காக மாநகர போக்குவரத்துக் கழகம் சிறப்பு பேருந்து வசதிகளை செய்து வருகிறது.

பிராட்வேயில் இருந்து கோயம்பேடு புறநகர் பஸ் நிலையத்திற்கு சிறப்பு பஸ்கள் விடப்படுகின்றன.

வழக்கமாக ஓடும் பஸ்களை விட கூடுதலாக 100-க்கும் மேலான பஸ்களை இயக்க மாநகர போக்குவரத்து கழகம் முடிவு செய்துள்ளது.

தியாகராயநகர், வட பழனி உள்ளிட்ட பல பகுதிகளுக்கு கூடுதல் சேவை இயக்கப்படுகிறது. கூட்டம் எங்கு அதிகமாக இருக்கிறது என்பதை பார்த்து அதற்கேற்ப பஸ்களை விடவுள்ளனர்.

15 மற்றும் 16 ஆகிய இரு நாட்களும் இந்த சிறப்பு பேருந்துகள் இயக்கப்படும்.

சென்னை போக்குவரத்துக் கழகத்திற்கு மேலும் 100 வோல்வோ பஸ்கள்

சென்னை: எம்.டி.சி என அழைக்கப்படும் சென்னைப் பெருநகரபோக்குவரத்து் கழகம், மேலும் 100 வோல்வோ சொகுசுப் பேருந்துகளை வாங்கத் திட்டமிட்டுள்ளது.

ஏற்கனவே 30 வோல்வோ பஸ்களை எம்டிசி புழக்கத்தில் விட்டுள்ளது. இந்த வகைப் பேருந்துகளுக்கு பயணிகளிடம் நல்லாதரவும், நல்ல வசூலும் கிடைத்திருப்பதால் பஸ்களின் எண்ணிக்கையை அதிகரிக்கும் வகையில் மேலும் 100 பஸ்களுக்கு தற்போது ஆர்டர் கொடுக்கப்பட்டுள்ளதாம்.

கடந்த 2007ம் ஆண்டு சென்னை மாநகரில் முதல் முறையாக வோல்வோ பேருந்துகள் அறிமுகப்படுத்தப்பட்டன.

வோல்வோவுக்குக் குறையாத கிராக்கி...

பொருளாதார மந்த நிலை காணப்பட்ட நிலையிலும் கூட இந்தியாவில் வோல்வோ பேருந்துகளுக்கு கிராக்கி குறையவில்லை. இதனால் வோல்வோ நிறுவனம் நஷ்டத்தை சந்திக்காமல் வண்டியை ஓட்டிக் கொண்டிருக்கிறது. இந்த ஆண்டு வோல்வோ நிறுவனம் 600 பேருந்துகளை டெலிவரி செய்யவுள்ளது. இது கடந்த ஆண்டை விட 50 சதவீதம் அதிகமாகும்.

பெங்களூரில் உள்ள வோல்வோ பஸ் தொழிலகம் எந்தவித ஆள் குறைப்பும் இன்றி சிறப்பான முறையில் செயல்பட்டு வருவது குறிப்பிடத்தக்கது.

மக்களுக்கு மிகவும் செளகரியமாக இருப்பதால் வோல்வோ பஸ்களுக்கு கிராக்கி அதிகரித்த வண்ணம் உள்ளது. குறிப்பாக டவுன் பஸ்களாக இவை தற்போது இயக்கப்பட ஆரம்பித்த பின்னர் இந்த வகை பஸ்களில் அதிக அளவிலான பயணிகள் பயணம் செய்ய ஆரம்பித்துள்ளனர்.

ஏசி வசதியுடன், செளகரியமாக,போக்குவரத்துசிக்கலைச் சந்திக்காமல் செல்ல முடிவதால் இந்த வகை பஸ்களுக்கு நல்ல கிராக்கி ஏற்பட்டுள்ளது.

வோல்வோ டவுன் பஸ்களின் எண்ணிக்கை தமிழகத்தில் மட்டுமல்லாமல் பிற மாநிலங்களிலும் நாளுக்கு நாள் அதிகரித்து வருவதால் விரைவில் மிகப் பெரிய அளவில் வோல்வோ டவுன் பஸ்கள் சாலைகளில் ஓடும் நிலை உருவாகும் என வோல்வோ நிறுவனம் நம்பிக்கை தெரிவித்துள்ளது.

இந்தியாவில் ஓடும் வோல்வோ பஸ்கள் அனைத்துமே பெங்களூர் தொழிற்சாலையில்தான் தயாரிக்கப்பட்டு விற்பனைக்கு அனுப்பப்படுகின்றன.

பஸ்களுக்கு இன்சூரன்ஸ்...

இந் நிலையி்ல் சென்னையில் நடந்த கலெக்டர்கள் மாநாட்டில் பேசிய முதல்வர் கருணாநிதி,

தமிழகத்தில் அரசுப்போக்குவரத்து் கழகங்களால் 20,000 பேருந்துகள் இயக்கப்படுகின்றன. இப்பேருந்துகளுக்குக் காப்பீடு செய்யப்படுவதில்லை.

அரசுப் போக்குவரத்து க் கழக பேருந்துகளால் ஏற்படும் விபத்துக்களில் பாதிக்கப்படுபவர்களுக்கு இழப்பீடு வழங்குவதில் மிகுந்த கால தாமதமும், அதிக செலவும் ஏற்படுவதால், விபத்து தொடர்பான இழப்பீடுகளை பாதிக்கப் பட்டவர்கள் உடனடியாக பெறும்வகையில் அரசுப் போக்குவரத்துக் கழகங்களுக்குச் சொந்தமான பேருந்துகளைக் காப்பீடு செய்து கொள்ள அரசு முடிவு செய்துள்ளது என்றார்.

தீபாவளிக்கு 500 சிறப்பு விரைவு பேரு‌ந்துகள்: நாளை முன்பதிவு துவக்கம்

தீபாவளிப் பண்டிகைக்காக சென்னையில் இருந்து 500 சிறப்பு பேரு‌ந்துகளை இயக்க, அரசு விரைவு போக்குவரத்துக் கழகம் திட்டமிட்டுள்ளது. இதற்கான முன்பதிவு நாளை தொடங்குகிறது.

சென்னையில் இருந்து மட்டும் தினமும் 900 விரைவு பேரு‌ந்துகள் பல்வேறு இடங்களுக்கு இயக்கப்படுகின்றன. இதுதவிர தீபாவளியை முன்னிட்டு சென்னையில் இருந்து பல்வேறு இடங்களுக்கு இதர போக்குவரத்துக் கழகங்களிடம் இருந்து சுமார் 300 "அல்ட்ரா டீலக்ஸ்' பேரு‌ந்துகளை பெற்று இயக்கவும் முடிவு செய்யப்பட்டுள்ளது.

சென்னையில் கோயம்பேடு, தியாகராயநகர், தாம்பரம், பிராட்வே பேரு‌ந்து நிலையம் ஆகிய இடங்களில் விரைவு பேரு‌ந்துகளுக்கு முன்பதிவு செய்யலாம்.

இதற்கான தொலைபே‌சி எண்- 24794709, 24794705.

இதே போல தமிழகத்தின் பல்வேறு முக்கிய இடங்களில் உள்ள 33 மையங்களிலும் முன்பதிவு செய்யலாம். 43 அங்கீகரிக்கப்பட்ட முகவர்களிடம் முன்பதிவு செய்யும் வசதியும் ஏற்படுத்தப்பட்டுள்ளது.

அமெரிக்க விண்வெளி மையத்துக்கு பள்ளி மாணவர்கள் சுற்றுலா

அமெரிக்காவில் உள்ள கென்னடி விண்வெளி மையத்துக்கு பள்ளி மாணவர்கள் சுற்றுலா அழைத்து செல்லப்பட உள்ளனர்.

இது குறித்து "வேர்ல்ட் டிராவல் கிளப்'பின் நிர்வாக இயக்குநர் ஸ்ரீமதி, "டூர் அமெரிக்கா'வின் நிர்வாகி குளோரியா லாம், அமெரிக்க "புளோரிடா ஸ்பேஸ் கோஸ்ட்'டின் நிர்வாகி கலீனா ஆகியோர் சென்னையில் திங்கள்கிழமை கூட்டாக கூறியதாவது:

8 வயது முதல் 17 வயது வரை உள்ள பள்ளிக்கூட மாணவர்களை "வேர்ல் டிராவல் கிளப்' மூலம் அமெரிக்காவுக்கு சுற்றுலா அழைத்துச் செல்ல உள்ளோம். மொத்தம் 12 நாட்கள் சுற்றுலாவில் முதலில் கலிபோர்னியாவுக்கும், அடுத்தது வாஷிங்டனுக்கும் அழைத்து செல்லப்படுவர். அங்குள்ள கலாசாரம், வரலாறு தொடர்பான அருங்காட்சியகங்களை அவர்கள் பார்வையிடலாம்.

அதன்பிறகு கென்னடி விண்வெளி மையத்துக்கு அழைத்துச் செல்லப்பட உள்ளனர். இங்கு விண்கலம், ராக்கெட் ஏவுதளம், ராக்கெட் கட்டப்படுதல் குறித்து மாணவர்களுக்கு, விண்வெளி வீரர்கள் விளக்கம் அளிப்பர். அவர்களுடன் உரையாடவும் வாய்ப்பு கிடைக்கும்.

இந்தச் சுற்றுலாவுக்கு சுமார் ரூ. 1. 2 லட்சம் வரை செலவாகும். உணவு, தங்குமிடம் இதில் அடங்கும். தென்னிந்தியாவில் மட்டும் மொத்தம் 200 பேரை சுற்றுலாவுக்கு அழைத்துச் செல்ல திட்டமிட்டுள்ளோம். வரும் டிசம்பரில் சுற்றுலா செல்வதற்கான முன்பதிவு நடைபெறும்.

ஊரக மாணவர்களும்...: அத்துடன் ஊரகப் பகுதிகளைச் சேர்ந்த, படிப்பில் சிறந்த மாணவர்களையும் அழைத்துச் செல்ல திட்டமிட்டுள்ளோம். இதற்காகத் தமிழக அரசின் உதவியை நாட உள்ளோம் என்றனர்.

சம்ஸ்கிருதம் பேச வாய்ப்பு!

சம்ஸ்கிருதம் பேசிப் பழகும் வாய்ப்பை ஏற்படுத்திக் கொடுக்கும் நிகழ்ச்சியை சுரபாரதி சமிதி என்ற அமைப்பு நடத்தி வருகிறது.

ஒரு மாதம் முன்பே தேர்ந்தெடுக்கப்பட்ட ஒரு தலைப்பில் விருப்பமுள்ளவர்கள் சம்ஸ்கிருதத்தில் பேசலாம். இதற்கு அங்கத்தினர் சந்தா கிடையாது.

மாதாந்திர நிகழ்ச்சி புரசைவாக்கம், கங்காதீஸ்வரர் கோயில் தெருவில் உள்ள அழகப்பா மேல்நிலைப் பள்ளியில் நடைபெறும்.

மாதத்தின் மூன்றாவது வெள்ளிக்கிழமை மாலை 6 மணிக்கு நிகழ்ச்சி தொடங்கும்.

மேலும் விவரங்களுக்கு: பி. எஸ். ராமமூர்த்தி, 75/ 15. வெள்ளாளர் தெரு, புரசைவாக்கம், சென்னை - 84.
044 - 2642 4721, 4202 7151

மெட்ராஸ் நல்ல மெட்ராஸ்

1940 ஆம் ஆண்டில் இன்றைய சென்னை மெட்றாசாக இருந்தது.

அந்தக் கால மதராஸின் பகுதிகள் ஜார்ஜ் டவுன், பார்க் டவுன் என்றெல்லாம் அழைக்கப்பட்டன. மவுண்ட் ரோட்டில் இப்போது போல மக்கள் நடமாட்டம், நெருக்கடிகள், போக்குவரத்து நெரிசல்கள் அப்போது இல்லை. குறுக்கும் நெடுக்குமாக யார் வேண்டுமானாலும் போகலாம். பஸ்கள் கூட எப்போதாவதுதான் வரும்.

1940களில் பெட்ரோல் பஞ்சம் சில காலம் இருந்து வந்தது. பஸ்கள் பின்னால் ஒரு பெட்டியை நிறுவி அதற்குள் கரி நிரப்பி தீ மூட்டி புகை கக்கும்படி செய்து வந்தார்கள். அந்த சூட்டில் பஸ்கள் செல்லும். பஸ் கண்டக்டர் கரிப் பெட்டியை சுழற்றுவார். "சுந்தரம் மோட்டார்ஸ்' நிறுவனம் மட்டுமே பஸ்களை இயக்கி வந்தது. அரசு பஸ்கள் அப்போது இல்லை

இதுதவிர ட்ராம் போக்குவரத்து இருந்தது. மிக மெதுவாக செல்லும் இந்த வண்டிகளில் நடந்து கொண்டே ஏறி போகும்போதே இறங்கி பயணிப்பது மதராஸ்வாசிகளுக்கு ஒரு தனி சுகம். எழும்பூரில் இருந்து ஐகோர்ட் செல்ல டிராம்மில் கட்டணம் 2 அணா. இரு பக்கமும் கண்டக்டர் இருப்பார்.

மாம்பலம், தியாகராய நகர் போன்ற பகுதிகளில் வசதியானவர்கள் குடியிருப்பார்கள். இப்போதும் இருக்கும் சில பெரிய பழங்கால கட்டிடங்கள் அன்றைய நாகரிகத்தின் சின்னமாக இருந்தன. பிரபல சினிமா நடிக நடிகையர் தி.நகர், அடையாறு போன்ற இடங்களில்தான் வசித்து வந்தனர். பிற பகுதிகளில் ஓடு போட்ட வீடுகள், கூரை வீடுகள் அதிகம் இருக்கும். பல பகுதிகளில் தெருக்கள் முள் செடிகள் முளைத்து குண்டும் குழியுமாகவே இருக்கும்.

உயர்நீதிமன்றம் அருகேயுள்ள ராமகிருஷ்ணா லஞ்ச் ஹோம், அம்பீஸ் கபே போன்ற உணவு விடுதிகள் மிகப் பிரபலம். ஒரு அணாவுக்கு இரு போண்டாவும், இரண்டு அணாவுக்கு தோசையும், 1 ரூபாய்க்கு சாப்பாடும், 2 ரூபாய்க்கு கேரியர் சாப்பாடும் கிடைக்கும். 16 அணா ஒரு ரூபாய் ஆகும். பஜ்ஜி, மைசூர் பாகு, ஜாங்கரி, கேசரி போன்ற பலகாரங்கள் மிகப் பிரபலம்.

இந்தியா சுதந்திரம் அடையும் வரை, மதராஸில் பொழுதுபோக்க மெரினா பீச்சும், சினிமா தியேட்டரும் உண்டு. மாலை நேரத்தில் பீச்சுக்கு சென்றால் மிக சுத்தமாக இருக்கும். இங்கு பெரியவர்கள் இந்திய சுதந்திரத்தைப் பற்றியே பேசிக் கொண்டிருப்பார்கள். சினிமா தியேட்டரில் படம் பார்க்க கட்டணம் 25 காசு. ஹிந்தி, ஆங்கிலப் படம் அதிகம் போடுவார்கள். அண்ணா சிலை எதிர்புறம் மாடியில் நியூ எல்பில்ஸ்டன் தியேட்டர் உண்டு. 50 பேர் உட்கார்ந்து படம் பார்க்கலாம். ஆங்கிலேயர்கள் சாரட் வண்டியில் இங்கு படம் பார்க்க வருவார்கள்.

ஆங்கிலேயர்கள் ஆதிக்கம் அதிகமிருந்த காலம் அது. அதனால் நம் மக்கள் நாட்டு விடுதலையைப் பற்றிப் பகிரங்கமாக பேசமாட்டார்கள். போலீசார் தடியடிப் பிரயோகம் செய்வார்கள் என்ற பயம் அவர்களுக்கு இருந்தது.

"வந்தே மாதரம்' என்று சொல்லக் கூட அஞ்சினார்கள். செய்திப் பத்திரிக்கைகளில் கூட பிரிட்டிஷ் அரசுக்கு எதிராக பெரிய அளவில் செய்திகள் அவ்வளவாக போடுவதில்லை.

ஆனால் "தினமணி' நாளிதழ் ஆரம்பித்த உடன் இரண்டு தேசியக் கொடிகளை பத்திரிகையின் சின்னமாகத் துணிந்து பயன்படுத்தினார்கள். ராம்நாத் கோயங்கா தீவிர தேசபக்தர். அந்த உணர்வை அப்படியே தினமணி பிரதிபலித்தது. தேசிய நாளேடு என்ற தகுதியை வாசகர்களிடையே அப்போதே பெற்றது.

சில நாடக நடிகர்களுக்கு தேச பக்தி உணர்ச்சி இருந்தாலும் அவற்றை மேடைகளில் வெளிப்படுத்த முடியாமல் நாடகங்கள் போட்டு வந்தார்கள். டி.கே.எஸ். சகோதரர்கள் "தேச பக்தி' என்ற நாடகத்தை மேடை ஏற்றினார்கள். பாஞ்சால சிங்கம் பகத் சிங் வாழ்க்கையை மறைமுகமாக வெளிப்படுத்திய இந்த நாடகத்தைப் போட்டபோது அதற்கு போலீசார் தடை விதித்து விட்டார்கள். நமது நாடு விடுதலை அடைந்த பிறகு மீண்டும் அந்த நாடகத்தை அவர்கள் நடத்தினார்கள்.

1947 ஆகஸ்ட் 15-ல் நாடு விடுதலை அடைந்தபோது தெருக்களில் ஒரு புதிய விழிப்புணர்வு ஏற்பட்டதை காணமுடிந்தது. பெரும்பாலான வீடுகளில் தீபாவளி கொண்டாடுவதுபோல் எண்ணெய் தேய்த்து குளித்து கதரில் புத்தாடை அணிந்து தெருக்களில் வெடி வெடித்து மகாத்மா காந்திக்கு ஜே என்று ஆரவாரம் செய்தார்கள். மயிலாப்பூரில் வசித்த தேசபக்த நடிகர் கே. சாரங்கபாணி போன்ற நடிகர்கள் மயிலாப்பூர், ராயப்பேட்டை பகுதிகளில் ஊர்வலமாக வந்து கொண்டாடினார்கள்.

சுகுண விலாஸ் நாடக சபா அப்போது பிரபலம். பம்மல் சம்பந்த முதலியார் நாடகங்களை அவர்கள்தான் போடுவார்கள்.

பிரபல நாடகக் கம்பெனிகளின் நாடகங்கள் தொடர்ந்து நடக்கும். பாய்ஸ் கம்பெனி நாடகங்களைப் பார்த்து வெளியூர்களிலிருந்து எல்லாம் வருவார்கள்.

தியாகராஜ பாகவதர்தான் அன்றைய சூப்பர் ஸ்டார். அவர் எப்போதாவது மவுண்ட் ரோடுக்கோ, ஜார்ஜ் டவுனுக்கோ கடைத் தெருவுக்குத் துணிமணி மற்றும் நகைகள் வாங்க வருவார். அப்படி வருவதாக இருந்தால் 15 நாள் முன்னதாக அவர் கமிஷனர் அலுவலகத்தில் தெரிவிக்க வேண்டும் என்று அரசு உத்தரவே போட்டது. மவுண்ட் ரோடின் இரண்டு பக்கங்களிலும் தடுப்புகள் வைக்கப்படும். அந்த அளவுக்குக் கட்டுக்கடங்காத ரசிகர் கூட்டம் அவரைப் பார்க்கக் கூடும்.

சிவாஜி, எம்.ஜி.ஆர். போன்றவர்கள் ஆயிரம் விளக்கு கபேயில் காபி சாப்பிட வந்து நான் பார்த்திருக்கிறேன். மூவிலாண்ட் என்கிற பெயர்ப் பலகையுடன் ஜெமினி ஸ்டூடியோ இருந்தது. ஸ்டூடியோ வாசலில் நடிகர்களை வேடிக்கை பார்க்க எப்போதும் ஒரு கூட்டம் நின்றபடி இருக்கும். இப்போதுபோல நடிகர்கள் பிகு பண்ணிக் கொள்ளமாட்டார்கள். பந்தாவே இல்லாமல் பழகுவார்கள்.

பிரபல நடிகைகள் தாங்களே காரை ஓட்டிக் கொண்டு போவதை வாயைப் பிளந்தபடி பார்க்கும் அப்பாவி ரசிகர்கள் கோடம்பாக்கம் லிபர்ட்டி தியேட்டர் அருகில் இருந்த ரயில்வே கேட்டில் தவமிருப்பார்கள். இப்போது அங்கே மேம்பாலம் வந்துவிட்டது.

மதராஸ் இன்று சென்னையாக மாறிவிட்டாலும் ஒரு சில அன்றுபோல் இன்றும் மாறாமல் உள்ளன. உயர்நீதிமன்றத்தின் சிவப்பு வண்ணம், ஐய்யே போன்ற பேச்சு மொழிகள். அன்றுபோல் இன்றும் நடைபெறும் குழாயடிச் சண்டை போன்றவைகள் மதராசில் தனித் தன்மைகள் போலும்.

ஓடாத ஆறு ஒன்று சென்னையில் அன்றும், இன்றும் உள்ளது. ஆறு என்றால் தண்ணீர் ஓடும். குளத்தில் தண்ணீர் தேங்கும். ஆனால் சென்னையில் உள்ள கூவம் ஆறு நான் பார்த்த நாள் முதலாய் அன்றும், இன்றும் சாக்கடை தேங்கியே உள்ளது.


-நவீனன்
அன்று அண்ணாசாலை இன்று அண்ணாசாலை



சென்னையில் முதல் ஆங்கிலேய மருத்துவமனை புனித ஜார்ஜ் கோட்டையில் கவர்னர் எட்வர்ட் வின்டர் என்பவரால் 1664 ஆம் ஆண்டு ஏற்படுத்தப்பட்டது. வாடகை இடத்தில் சிறியதாகத் தொடங்கப்பட்ட இந்த மருத்துவமனை அங்கே இங்கே என்று கோட்டைக்குள் சுற்றி, பிறகு ஆர்மேனியன் தெரிவில் (அரண்மனைக்கார தெரு) பல காலம் செயல்பட்டு வந்தது.

அக்டோபர் 15, 1772ல் ஜான் சுல்லிவன் என்பவரால் எழுப்பப்பட்டதுதான் இன்றைய பொது மருத்துவமனை. 1859 மற்றும் 1893ல் இந்தக் கட்டடம் மேலும் விரிவுபடுத்தப்பட்டது. சென்னை பொது மருத்துவமனையில் இப்போதும் காணப்படும் பழைய கட்டடம் "செமினார் ஹால்' என்று அழைக்கப்படும் 1835 ஆண்டு கட்டப்பட்ட பகுதி மட்டுமே. ஏனைய இடங்கள் இடித்துக் கட்டப்பட்டவைதான்.

இந்தியாவின் முதல் ரயில் பாதை, சிந்தாதிரிப்பேட்டை பாலத்துக்கு அருகில்தான் 1836-ல் பரிசோதனைக்காகப் போடப்பட்டது. அடுத்த வருடமே, ஏ.பி. காட்டன் என்பவரால் ரெட் ஹில்ஸ் பகுதியிலிருந்து பரங்கிமலையை அடுத்த கல்குவாரிகள் வரை ஒரு ரயில் பாதை போடப்பட்டது. இந்த ரெட் ஹில்ஸ் ரயில்வே என்பது காற்றழுத்தத்தாலும், மனிதர்கள் தள்ளுவதாலும் இயக்கப்பட்டதாம்!

1845-ல் மெட்றாஸ் ரயில்வே கம்பெனி எனப்படும் நிறுவனம் இங்கிலாந்தில் தொடங்கப்பட்டது. 1849-ல் இன்னொரு நிறுவனமும் தொடங்கப்பட்டது. இந்த நிறுவனம்தான் தென்னகத்தின் முதல் ரயில்வே பாதையை நிறுவியது. 1853-ல் கர்னாடிக் நவாபுகளின் தலைநகரமான ஆற்காடையும், வாலாஜாபேட்டையையும் வட சென்னையிலுள்ள ராயபுரத்துடன் இந்த ரயில் பாதை இணைத்தது.

சென்ட்ரல் ரயில் நிலையம், 1873-ல் வியாசர்பாடி மெட்ராஸ் பாதை போடப்பட்டபோது நான்கே நடைமேடையுடன் கூடிய சிறிய ரயில்நிலையமாகத் தொடங்கப்பட்டது. 1907 வரை சென்னையின் தலைமை ரயில் நிலையமாகத் திகழ்ந்தது ராயபுரம்தானாம்.

இப்போதைய சென்ட்ரல் ரயில் நிலையக் கட்டடம் ஜார்ஜ் ஹார்டிங்ஸ் என்பவரால் வடிவம் கொடுக்கப்பட்டு சிஷோம் என்பவரால் பொலிவு ஏற்படுத்தப்பட்டது. ரயில் நிலையத்தில் இருக்கும் மணிகூண்டு தயாரிக்கப்பட்ட வருடம் 1874. கட்டடம் முழுமையான ஆண்டு 1900. அதற்குப் பிறகு பல மாற்றங்கள் அந்தக் கட்டடத்தில் செய்யப்பட்டன என்றாலும், ஜார்ஜ் ஹார்டிங்ஸ் கற்பனை செய்த அதே வடிவம் இப்போதும் மாறாமல் இருக்கிறது என்பதுதான் சென்ட்ரல் ரயில் நிலையத்தின் தனிச் சிறப்பு!

தகவலுக்கு நன்றி : தினமணி ஆசிரியர்

ரமழான் சிறப்பு நிகழ்ச்சிகள்

ரமலான் முழுவதும் இரவு 10.30 மணி முதல் 11.00 மணிவரை தமிழன் டி.வி.யில் ''திருக்குர்ஆனின் தேன்துளிகள்'' என்ற தலைப்பிலும்,

அதிகாலை (ஸஹர்) 4.00 மணி முதல் 4.30 மணி வரை ''தமிழன்'' டி.வி.யிலும், 4.30 மணி முதல் 5.00 மணி வரை ''மக்கள்'' தொலைக்காட்சியிலும் பிரபல மார்க்க அறிஞர்களும், ஆலிமாக்களும், குழந்தைகளும் பங்கேற்கும் பல்சுவை மார்க்க நிகழ்ச்சிகளும், சொற்பொழிவுகளும் ஒளிபரப்பாகும் இன்ஷாஅல்லாஹ்


ரமலான் முழுவதும் ஒளிபரப்பாகும் நிகழ்ச்சிகளில் வர்த்தக விளம்பரங்கள், வாழ்த்து அட்டைகள் வரவேற்கப்படுகின்றன. தொய்வின்றி நிகழ்ச்சிகள் தொடர பொருளாதார உதவிகளையும் தாராளமாக வழங்கிட கேட்டுக்கொள்கிறோம்.

தொடர்புக்கு..

பிளாக் & ஒயிட் கம்யூனிகேஷன்ஸ்
7, வடமரைக்காயர் தெரு,
மண்ணடி, சென்னை - 600 001.
போன் : 044 25241200

நம்ப முடிகிறதா? சென்னைக்கு வயது 370

தமிழகத்தின் தென்கோடியில் இருந்து வரும் மக்களானாலும், அண்டை மாநிலங்களான ஆந்திரா, கேரளா, கர்நாடக மாநிலத்தைச் சேர்ந்தவர்களானாலும் சென்னையில் வந்து வசிப்பதைப் பெருமையாகக் கருதுகிறார்கள்.

அதற்கெல்லாம் காரணம் தமிழக தலைநகரம் சென்னையின் கட்டமைப்பு வளர்ச்சி, மேம்பாலங்கள், சாலை போக்குவரத்து, புறநகர் ரயில் சேவைகள், கடற்கரை அழகு, வணிக வளாகங்கள், ஐ.டி. பூங்காக்கள், சிறந்த ஒளி-ஒலி வசதியைக் கொண்ட திரையரங்குகள், மல்டி-பிளக்ஸ் என எண்ணற்ற காரணங்களைச் சொல்ல முடியும்.

ஆனால், இன்று ஒரு மெட்ரோ நகரமாக உருவெடுத்து வியாபித்திருக்கும் சென்னை தோன்றி எவ்வளவு ஆண்டுகள் ஆகின்றன தெரியுமா? ஆகஸ்ட் 22ஆம் தேதி சென்னைக்கு 370ஆவது பிறந்த நாள்.

ஆம். கடந்த 1,639ஆம் ஆண்டில் மீன்பிடி கிராமமாக விளங்கிய சென்னையில் சிறிய, சிறிய குடிசைகள் மட்டுமே வீடுகளாக இருந்தன.

சென்னை துறைமுகத்தை ஒட்டிய பகுதிகளில் தான் மக்கள் வசித்தார்கள். மீன்பிடி கிராமமாக இருந்த இந்நகரை சென்னப்ப நாயக்கர் என்பவர் நிர்வகித்ததாக வரலாறு கூறுகிறது.

அவரது பெயரைக் கொண்டே சென்னை என்ற பெயர் வைக்கப்பட்டது.

சென்னை துறைமுகத்திற்கு அருகே `சென்னைப் பட்டணம்' என்ற நகரைக் கட்டுவதற்கு சென்னப்ப நாயக்கரிடம் இருந்து அப்போதைய பிரிட்டிஷ் நிர்வாகியான ஃபிரான்சிஸ் டே என்பவர் அனுமதியைப் பெற்று சில பகுதிகளை உருவாக்கினார். இத்தகவல் பிரிட்டிஷாரின் தகவல்களில் இருந்து தெரிய வருகிறது.

`மெட்ராஸ் டே' என்ற பெயரில் சென்னை தோன்றிய தினம் ஒரு வார காலம் கொண்டாடப்படுகிற்து.

சென்னையின் பாரம்பரியம், இலக்கிய செயல்பாடுகள், முக்கிய இடங்கள் மற்றும் அடையாளச் சின்னங்கள் குறித்த கண்காட்சிகள் ஆங்காங்கே நடைபெறுகின்றன.

பள்ளி பரிமாற்ற நிகழ்ச்சிகள், பேச்சு மற்றும் கட்டுரைப்போட்டிகள், கர்நாடக இசை நிகழ்ச்சிகள், வினாடி-வினா, உணவுத் திருவிழாக்கள், பேரணிகள், புகைப்படக் கண்காட்சிகளும் நடத்தப்படுகின்றன.

தற்போது சென்னையில் வசிக்கும் பெரும்பாலானோர் சென்னையைப் பற்றி அறிந்திராத தகவல்களும் இந்த ஒரு வார கால கொண்டாட்டத்தின் போது வெளிப்படுத்தப்படுவது சிறப்பம்சமாகும்.

சரி, சென்னையின் பிறந்த நாளுக்கு அந்த மாநகரில் வசிக்கும் நாமும் வாழ்த்துக்களை தெரிவிப்போம்.

சென்னையில் முதலில் குடியேறியவர்கள் முஸ்லீம்கள்

மயிலாப்பூர் என்றால் உடனே நினைவுக்கு வருவது பிராமண சமூகத்தினர்தான். ஆனால் ஒரு காலத்தில் அங்கு பெரும்பான்மையாக வசித்தவர்கள் முஸ்லீம்கள் என்றால் நம்ப முடிகிறதா?. நம்பித்தான் ஆக வேண்டும் என்கிறார் ஆற்காடு இளவரசர் நவாப் முகம்மது அப்துல் அலி.

13வது நூற்றாண்டின் தொடக்கத்திலேயே சென்னை நகரில் முஸ்லீம்கள் குடியேறி விட்டனராம். மெட்ராஸ் முஸ்லீம்கள் மற்றும் மசூதிகள் என்ற பெயரில் ஒரு ஆவணப்படம் தயாரிக்கப்பட்டுள்ளது. இதை இயக்கியிருப்பவர் எஸ்.அன்வர். இந்த டாக்குமென்டரி குறித்து அன்வரும், ஆற்காடு நவாப்பும் செய்தியாளர்களிடம் கூறுகையில், வெனிஸ் நகரத்து வியாபாரியான மார்க்கோபோலா, தனது சுற்றுலா கையேட்டில் அந்தக் காலத்து சென்னை நகர வாழ்க்கை குறித்து தெளிவாக குறிப்பிட்டுள்ளார்.

அதில், 13வது நூற்றாண்டில் மயிலாப்பூர் பகுதியில் முஸ்லீம்கள் பெருமளவில் வாழ்ந்ததாக அவர் கூறியுள்ளார். இயேசுநாதரின் சீடரான புனித தாமஸை, அவர்கள் துறவியாக வணங்கினராம்.

போர்ச்சுகீசியரான டுவார்ட் பார்போசா தனது நூலில் கூறுகையில், 16வது நூற்றாண்டின் தொடக்கத்தில், மயிலாப்பூரில் உள்ள புனித தாமஸின் கல்லறையை (இப்போது சாந்தோம்) அங்குள்ள முஸ்லீம்கள்தான் பாதுகாத்து, பராமரித்து வந்தனராம்.

மதரசா பட்டனம் என்பதுதான் உருமாறி மதராஸ் என்று வந்திருக்கலாம் என்றும் ஒரு கருத்து உள்ளது.

சைதாப்பேட்டை ஆன சைதாபாத்...

அதேபோல இன்று அழைக்கப்படும் சைதாப்பேட்டை முன்பு சைதாபாத் என்ற பெயரில் அழைக்கப்பட்டு வந்துள்ளது. அங்கு 18வது நூற்றாண்டின் தொடக்கத்தில், ஆற்காடு நவாப் சதாத்துல்லா கான் ஒரு மசூதியைக் கட்டி அந்தப் பகுதிக்கு சைதாபாத் என்று பெயரிட்டார்.

அதேபோல சென்னையின் முதல் மசூதியைக் கட்டியவர் ஒரு இந்து வியாபாரி என்பது சுவாரஸ்யமான விஷயம். அவரது பெயர் காசி வீரண்ணா. மூர் தெருவில் 1670களில் அவர் ஒரு மசூதியைக் கட்டினார். காசி வீரண்ணாவுக்ுக கோல்கண்டா சுல்தான்களுடன் நல்ல தொடர்பு இருந்தது.

ஆங்கிலேயர்கள் நமது நாட்டுக்கு வந்தபோது நமது நாட்டில் நிலவிய சமூக நல்லிணக்கத்தை அவர்களால் புரிந்து கொள்ள முடியவில்லை. காரணம், அப்போது மக்கள் மத ரீதியாகவ பிரிந்து கிடக்கவில்லை. அனைவரும் ஒன்றாக, நல்லிணக்கத்துடன் வசித்து வந்தனர்.

உதாரணத்திற்கு, முஸ்லீம் மன்னர்கள் இந்துக்களை உயர் அதிகாரிகளாக வைத்திருந்தனர். விஜய நகர மன்னர்கள், முஸ்லீம்களை உயர் பதவிகளில் வைத்திருந்தனர்.

இந்தியாவின் ஆத்மாவாக அப்போதே மதச்சார்பின்மை இருந்து வந்துள்ளது. அப்போது அனைத்து மதத்தினரும் சம உரிமைகளுடன், சம அந்தஸ்துடன் வாழ்ந்து வந்துள்ளனர்.

ஆற்காடு நவாப் வம்சத்தினர் ஏராளமான கோவில்களுக்கும், சர்ச்சுகளுக்கும் பெருமளவில் நிலங்களை, நிதியை தானமாக அளித்துள்ளதே நல்லிணக்கத்திற்கு நல்ல சான்றாகும்.

இவையெல்லாம் நமது நாட்டின் அருமையான மத நல்லிணக்கத்திற்கு சான்றுகள் ஆகும் என்றனர்.

முதல்வர் இல்லம் முற்றுகை-3000 தவ்ஹீத் ஜமாத் அமைப்பினர் கைது

ராமநாதபுரத்தில் பள்ளிவாசல் ஒன்று சீல் வைக்கப்பட்டதை கண்டித்து சென்னையில் முதல்வரின் இல்லத்தை முற்றுகையிட முயன்ற தமிழ்நாடு தவ்ஹீத் ஜமாத் அமைப்பை சேர்ந்த 3,000பேர் கைது செய்யப்பட்டனர்.

ராமநாதபுரம் எஸ்.வி. பட்டின, சோழகன்பேட்டையில் உள்ள பள்ளிவாசலில் தொழுகை நடத்துவது தொடர்பாக இரு பிரிவு முஸ்லிம்கள் இடையே தகராறு ஏற்பட்டது.

இது தொடர்பாக நடந்த சமாதானப் பேச்சுவார்த்தையால் பலன் ஏற்படாததையடுத்து கடந்த 31ம் தேதி மாவட்ட வருவாய்த்துறை அதிகாரிகளும், போலீஸாரும் பள்ளிவாசலை பூட்டி சீல் வைத்தனர்.

மேலும், அங்கு தொழுகைக்கு வந்திருந்தவர்களையும் கைது செய்யப்பட்டனர். இதற்கு தமிழ்நாடு தவ்ஹீத் ஜமாத் கடும் கண்டனம் தெரிவித்தது.

பள்ளிவாசல் சீல் வைக்கப்பட்டதைக் கண்டித்து, சென்னை கோபாலபுரத்தில் உள்ள முதல்வர் கருணாநிதியின் இல்லத்தை தவ்ஹீத் ஜமாத் அமைப்பின் மாநிலத் தலைவர் பக்கீர் முகமது, பொதுச் செயலாளர் அப்துல் அமீது ஆகியோர் தலைமையில் சுமார் 3,000 பேர் முற்றுகையிட முயன்றனர்.

நேற்று அண்ணா சாலை ஆயிரம் விளக்கு மசூதி அருகே திரண்ட அவர்கள் கோபாலபுரம் நோக்கி ஊர்வலமாகச் செல்ல முயன்றபோது போலீஸார் தடுத்து நிறுத்தி கைது செய்தனர்.

அவர்கள் பஸ்கள், வேன்களில் பல்வேறு சமுதாயக் கூடங்களில் தங்க வைக்கப்பட்டு மாலையில் விடுவிக்கப்பட்டனர்.