ஸ்ரீவை,எம்எல்ஏயின் அமைச்சர் பதவி பறிக்கப்பட்டு ஸ்ரீவைகுண்டத்துக்கு கிடைத்த விஐபி அந்தஸ்தும் பறிக்கப்பட்டது

தமிழக அமைச்சரவையில் இந்து அறநிலையத்துறை அமைச்சராக இருந்த ஸ்ரீவைகுண்டம் எம்எல்ஏ சண்முகநாதன் உட்பட ஆறு பேர் திடீரென நீக்கப்பட்டுள்ளனர்.

தூத்துக்குடி மாவட்டத்தில் சண்முகநாதன் இரண்டு முறை அமைச்சராக இருந்துள்ளார். தேர்தல் நேரத்தில் அதிமுக வெற்றிக்காக கடுமையாக உழைத்த சண்முகநாதனுக்கு இந்த முறை ஜெ. இந்து அறநிலையத்துறை அமைச்சராக வாய்ப்பளித்தார்.

இதன் மூலம் ஸ்ரீவைகுண்டத்துக்கு விஐபி தொகுதி அந்தஸ்து கிடைத்தது.ஆனால் அது 5 மாதத்தில் பறிக்கப்பட்டது.இதை போல் 2001 ஆண்டும் ஸ்ரீவைக்கு விஐபி தொகுதி அந்தஸ்து கொடுத்து 9 மாதத்திலேயே பின் பறிக்கப்பட்டது


கடந்த 2001ம் ஆண்டிலும் இதே ஸ்ரீவைகுண்டம் தொகுதியில் இருந்து தேர்ந்தெடுக்கப்பட்டவர் சண்முகநாதன். அப்போது அவருக்கு கைத்தறி துறை அமைச்சர் பதவி வழங்கப்பட்டது. ஆனால் 9 மாதத்திலேயே சண்முகநாதனின் பதவி பறிக்கப்பட்டது. பின்னர் அமைச்சர் பதவி கொடுக்கப்படவில்லை. 2006 – ம் ஆண்டுவரை எம்எல்ஏவாகவே பதவிக்காலத்தை நிறைவு செய்தார்.

ஸ்ரீவை., ஆஸ்பத்திரியில் பிறந்த குழந்தைகளுக்கு தங்க மோதிரம்

ஸ்ரீவைகுண்டத்தில் அரசு ஆஸ்பத்திரியில் ஜெ.,பிறந்தநாளை முன்னிட்டு பிறந்த குழந்தைகளுக்கு தங்கமோதிரம் வழங்கினர்.விழாவிற்கு பள்ளத்தூர் முருகேசன் தலைமை வகித்தார். மாவட்ட அவைத்தலைவர் மணிமொழியன் முன்னிலை வகித்தார்.

மாவட்ட கவுன்சிலர் திருப்பாற்கடல் மோதிரம் வழங்கினார். விழாவில் மாவட்ட பொறுப்பாளர் ஜெனிபர்சந்திரன், ஒன்றிய செயலாளர்கள் ஸ்ரீவைகுண்டம் ஆறுமுகநயினார், கருங்குளம் சிவசுப்பிரமணியன், பெருங்குளம் செல்லத்துரை, நகர செயலாளர்கள் ஸ்ரீவைகுண்டம் பால்துரை, நகர அவைத் தலைவர் ராஜேந்திரன், துணைச் செயலாளர் மந்திரமூர்த்தி, ஒன்றிய பொருளாளர் ராஜாராமன், பாசறை துணை செயலாளர் மற்றும் தொண்டர்கள் கலந்து கொண்டனர்.

செய்தி: தினமலர்

அனிதா ராதாகிருஷ்ணன் அமோக வெற்றி: திமுகவினர் கொண்டாட்டம்

திருச்செந்தூர் இடைத் தேர்தலில் அதிமுக வேட்பாளர் அம்மன் டி நாராயணனை விட 46,861 வாக்குகள் அதிகம் பெற்று, திமுக வேட்பாளர் அனிதா ராதாகிருஷ்ணன் வெற்றி பெற்றுள்ளார். திமுகவினர் இந்த வெற்றியை பட்டாசு வெடித்தும் இனிப்பு வழங்கியும் கொண்டாடி வருகின்றனர்.

திருச்செந்தூர் தொகுதியில் இதுவரை அதிமுக வேட்பாளராக வெற்றி பெற்று தமிழகத்தில் அமைச்சராக வலம் வந்தவர் அனிதா ராதாகிருஷ்ணன். அதிமுக தலைமைக்கும் அனிதா ராதாகிருஷ்ணனுக்கும் ஏற்பட்ட மோதலில் அக்கட்சியிலிருந்து அவர் நீக்கப்பட்டார். பின்னர் தனது தொண்டர்கள் 10 ஆயிரம் பேருடன் அதிரடியாக திமுகவில் இணைந்தார்.

திமுக தலைவர் கருணாநிதி, அனிதாவிற்கு திருச்செந்தூர் தொகுதியையும் அமைச்சர் பதவியும் தருவதாக வாக்குறுதி அளித்தார். அதன் அடிப்படையில் அனிதா தனது எம்எல்ஏ பதவியை ராஜினாமா செய்தார். இதனையடுத்து திருச்செந்தூர் தொகுதயில் போட்டியிட அவருக்கு வாய்ப்பளிக்கப்பட்டது.

கடந்த 19ம் தேதி நடந்த திருச்செந்தூர் இடைத் தேர்தலின் வாக்கு எண்ணும் பணி இன்று காலை துவங்கியது. துவங்கியதிலிருந்தே அனிதா ராதாகிருஷ்ணன் முன்னிலை வகித்து வந்தார். மொத்தம் 14 சுற்றுகளாக வாக்கு எண்ணிக்கை நடந்தது. இதில் 14வது சுற்றின் முடிவில் திமுக 75,223 வாக்குகளும், அதிமுக 28,362 வாக்குகளும், தேமுதிக 4186 வாக்குகளும் பெற்றன.

இதனையடுத்து அனிதா ராதாகிருஷ்ணன், அதிமுக வேட்பாளரை விட 46,861 வாக்குகள் அதிகம் பெற்று வெற்றிபெற்றுள்ளார். திருச்செந்தூர், உடன்குடி, ஆறுமுகநேரி, காயல்பட்டினம் ஆகிய பகுதிகளில் திமுக நிர்வாகிகளும், அனிதா ஆதரவாளர்களும் பட்டாசு வெடித்தும் , இனிப்பு வழங்கியும் தங்களது வெற்றியை கொண்டாடி வருகின்றனர்.

செய்தி : தூத்துக்குடி வெப்சைட்

ஸ்ரீவையில், பா.ம.க தலைவர் ராமதாஸ் தலைமையில் ஆர்ப்பாட்டம்

ஸ்ரீவைகுண்டம் அணைக்கட்டுக்கு மேல்புறம் ராட்சத குழாய் அமைத்து தூத்துக்குடியிலுள்ள தொழிற்சாலைகளுக்கு தண்ணீர் கொண்டு செல்வதை தடுத்து நிறுத்தக் கோரி,பாமக நிறுவனர் டாக்டர் ராமதாஸ் தலைமையில் திங்கள்கிழமை ஆர்ப்பாட்டம் நடைபெற்றது.

ஸ்ரீவைகுண்டம் தெற்கு ரதவீதியில் இந்த ஆர்ப்பாட்டம் நடைபெற்றது.மருதூர்,ஸ்ரீவைகுண்டம்
அணைக்கட்டை தூர்வார வேண்டும், மணல் கொள்ளையை தடுத்து நிறுத்த வேண்டும், புதிய தடுப்பணைகள் கட்ட வேண்டும், ஆற்றை தூய்மைப்படுத்த வேண்டும் என்பன உள்ளிட்ட கோரிக்கைகள் வலியுறுத்தப்பட்டன.

பாமக தலைவர் கோ.க.மணி, உழவர் பேரியக்க தலைவர் இல.சடகோபன்,தனித் தமிழர் சேனை நிறுவனர் நகைமுகன்,மாநில இளைஞரணி செயலர் அன்பழகன்,தாமிரபரணி நதிநீர் பாதுகாப்பு பேரவை அமைப்பாளர் நயினார் குலசேகரன்,பாமக மாநில பொதுச்செயலர் உஜ்ஜல்சிங்,மாவட்ட செயலர் இசக்கியப்பன்,ஒன்றிய செயலர் வள்ளி நாயகம்,நகர செயலர் பழனி உள்ளிட்டோர் கலந்துகொண்டனர்.

இதற்கான ஏற்பாடுகளை பாமக மாநில கொள்கை விளக்க அணி செயலர் அ.வியனரசு செய்திருந்தார்.

இடைத்தேர்தல் பிரச்சாரத்தில் வைகோ- கனிமொழி நேருக்குநேர் சந்திப்பால் திடீர் பரபரப்பு!

திருச்செந்தூர் இடைத்தேர்தல் பிரச்சாரத்தில் மதிமுக பொதுச்செயலாளர் வைகோவும், கனிமொழி எம்.பியும் நேருக்குநேர் சந்தித்ததால் பரபரப்பு ஏற்பட்டது.

திருச்செந்தூர் சட்டமன்ற தொகுதியில் வருகிற 19ம் தேதி இடைத்தேர்தல் நடைபெறுவதையொட்டி அதிமுக வேட்பாளர் அம்மன் நாராயணனை ஆதரித்து மதிமுக பொதுச்செயலாளர் வை.கோ கிராமம் கிராமமாக சென்று தேர்தல் பிரச்சாரம் செய்துவருகிறார்.

இதுபோல் திமுக வேட்பாளர் அனிதா ராதாகிருஷ்ணனை ஆதரித்து கனிமொழி எம்.பி. தேர்தல் பிரச்சாரம் செய்துவருகிறார். தேர்தல் பிரச்சாரம் சூடு பிடித்துள்ள நிலையில் அதிமுக – திமுகவினர் எந்த நேரத்திலும் மோதும் சூழ்நிலை உருவாகும் நிலை ஏற்பட்டுவருவதால் தூத்துக்குடி மாவட்ட போலீஸ் எஸ்.பி. செந்தில்குமார் தலைமையில் போலீசார் கிராமம் கிராமமாக 24 மணி நேரமும் ரோந்து பணியில் ஈடுபட்டுள்ளனர்.

இந்நிலையில் மதிமுக பொதுசெயலாளர் வைகோ, அதிமுக வேட்பாளர் அம்மன் நாராயணனை ஆதரித்து திருச்செந்தூர், மணப்பாடு பிரச்சாரம் செய்துவிட்டு பரமன்குறிச்சிக்கு தேர்தல் பிரச்சாரம் செய்ய வேனில் வந்துகொண்டிருந்தார். அப்போது திமுக வேட்பாளரை ஆதரித்து கனிமொழி எம்.பி. பரமன்குறிச்சியில் தேர்தல் பிரச்சாரம் செய்துகொண்டிருந்தார்.

இதை தொடர்ந்து அதிமுக – திமுகவினர் மோதுவதை தடுக்க பரமன்குறிச்சிக்கு வந்துகொண்டிருந்த வைகோவிடம் போலீசார் மாநாடு கிராமத்தில் அவரது வேனை நிறுத்தி கனிமொழி எம்.பி பிரச்சாரம் செய்துகொண்டிருப்பதால் தாங்கள் 10 நிமிடம் நின்று செல்லுமாறு கேட்டுக்கொண்டனர். இதற்கு ஒத்துழைப்பு கொடுத்த வை.கோ காட்டுப்பகுதியில் நிறுத்தி வேனுக்குள் அமர்ந்திருந்தார்.

வைகோ வேனை போலீசார் நிறுத்தியதை கண்டித்து மதிமுகவினர் கொந்தளித்து அதிமுகவினருக்கு தகவல் தெரிவித்தனர். இதைதொடர்ந்து அதிமுகவினர் சுமார் 20க்கும் மேற்பட்ட கார்களில் மாநாடு கிராமத்திற்கு விரைந்து வந்து வைகோ வேனை தங்களது பாதுகாப்பு வளையத்திற்குள் கொண்டுவந்து வைகோவுக்கு பாதுகாப்பாக நின்று கொண்டனர்.

இதற்கிடையில் பரமன்குறிச்சியில் தேர்தல் பிரச்சாரத்தை முடித்துக்கொண்டு கனிமொழி எம்.பி மாநாடு கிராமம் வழியாக திருச்செந்தூர் சென்றார். அப்பொழுது வை.கோ.வும் கனிமொழி எம்.பியும் நேருக்குநேர் சந்திக்கும் சூழ்நிலை உருவானதால் அங்கு பதட்டம், பரபரப்பு ஏற்பட்டது. போலீசார் குவிக்கப்பட்டனர்.

இந்நிலையில் கனிமொழி எம்.பி வைகோ வேன் அருகே வந்ததும் இரு கை கூப்பி வை.கோ.வுக்கு வணக்கம் தெரிவித்தார். பதிலுக்கு வைகோவும் இரு கைகூப்பி வணக்கம் தெரிவித்தார். இருவரும் சிறு புன்னகையை சிந்திவிட்டு தேர்தல் பிரச்சாரத்திற்கு புறப்பட்டனர். வைகோவும், கனிமொழி எம்.பி.யும் நேருக்குநேர் சந்தித்து கொண்டதால் தேர்தல் களம் பரபரப்பாக காணப்பட்டது.

அதன்பின் பரமன்குறிச்சியில் நடந்த தேர்தல் பிரச்சாரக்குழுவில் வைகோ பேசும்போது, திமுகவினர் எது நடக்கும் என்று எதிர்பார்த்தார்களோ அது நடக்கவில்லை. தேர்தல் களம் என்பது அமைதியாக நடைபெற வேண்டியது. வன்முறைக்கு இடமில்லை. அதிமுக வேட்பாளர் வெற்றி உறுதியாகி விட்டது. இவ்வாறு வைகோ தெரிவித்தார்.

நன்றி :திரு. சக்திமுருகன், தூத்துக்குடி வெப்சைட்.

நெல்லை மனித நேய மக்கள் முன்னேற்றக் கழக நிர்வாகிகள் அறிவிப்பு

மனித நேய மக்கள் முன்னேற்றக் கழக திருநெல்வேலி மாவட்ட, மாநகர நிர்வாகிகள் நியமிக்கப்பட்டுள்ளனர்.

அமைப்பின் நிறுவனர் எஸ். முகம்து ரவி புதன்கிழமை வெளியிட்ட அறிக்கை:

தலைமை நிலையச் செயலராக ராஜா முகம்மது, தலைமை சட்ட ஆலோசகராக அப்துல் ஜப்பார், கொள்கைப் பரப்புச் செயலர்களாக முஸ்தபா, இமாம் முகம்து அலி, மாவட்டத் தலைவராக எஸ்.ஏ. ஷேக், வர்த்தக அணிச் செயலராக சுல்தான், மருத்துவ சேவை அணிச் செயலராக தாஹிர் ஒசாமா, திருநெல்வேலி மாநகரச் செயலராக மவுலானா, மாநகரப் பொருளாளர் மற்றும் செய்தித் தொடர்பாளராக எம்.ரிபாயி .

திருச்செந்தூர் இடைத்தேர்தல் ஜனவரி 30-ந் தேதிக்குள் நடத்தப்படும் தேர்தல் அதிகாரி நரேஷ்குப்தா தகவல்

தமிழக தலைமை தேர்தல் அதிகாரி நரேஷ்குப்தா இன்று வெளியிட்ட அறிக்கையில் கூறி இருப்பதாவது:-

திருச்செந்தூர் தொகுதியில் இருந்து சட்டசபைக்கு தேர்வு செய்யப்பட்ட அனிதா ராதாகிருஷ்ணன் தனது எம்.எல்.ஏ. பதவியை ராஜினாமா செய்ததால் சட்டசபையில் திருச்செந்தூர் தொகுதிக்கான இடம் 31-7-2009 முதல் காலியாக உள்ளது. இந்த காலி இடத்துக்கு 30-1-2010க்குள் இடைத்தேர்தல் நடத்தப்பட வேண்டும். தேர்தல் ஏற்பாடுகள் தொடங்கி விட்டது.

தூத்துக்குடி மாவட்ட தேர்தல் அதிகாரியான கலெக்டரிடம், திருச்செந்தூர் தொகுதி இடைத்தேர்தல் ஏற்பாடுகளை செய்ய உத்தர விடப்பட்டுள்ளது. தேர்தல் பணியாளர்கள் மற்றும் தகவல் தொடர்புக்கான எல்லா ஏற்பாடுகளையும் விரைவில் செய்து முடிக்க அறிவுறுத்தப்பட்டுள்ளது.

திருச்செந்தூர் தொகுதியில் உள்ள பதற்றமான ஓட்டுச்சாவடிகள் பற்றிய கணக்கெடுப்பை மாவட்ட தேர்தல் அதிகாரி நடத்தி உள்ளார். ஓட்டுப்பதிவுக்கு சிறப்பு ஏற்பாடுகள் செய்யப்பட்டு வருகின்றன.

இடைத்தேர்தலை நடத்துவது தொடர்பாக மாவட்ட கலெக்டர் அறிக்கை கொடுத்துள்ளார். அதன் அடிப்படையில் திருச்செந்தூர் தொகுதி வரைபடம் தயாரிக்கப்பட்டுள்ளது.

மாநிலத்தில் சமீபத்தில் 5 தொகுதிகளுக்கு இடைத்தேர்தல் நடந்த போது ஓட்டுப்பதிவை முழுமையாக இணையத்தளத்தில் காட்டினோம். அதே போன்று திருச்செந்தூர் தொகுதி இடைத்தேர்தல் ஓட்டுப்பதிவையும் இணையத் தளத்தில் நேரடியாக காணலாம்.

ஓட்டுப்பதிவு நிர்வாக வசதிக்காக எஸ்.எம்.எஸ். வசதியும் பயன்படுத்தப்படும். மத்திய தேர்தல் கமிஷன் திருச்செந்தூர் தொகுதி இடைத்தேர்தல் தேதியை அறிவித்ததும் மற்ற பணிகள் தொடங்கும்.

ஓட்டுப் பதிவுக்கு தேவையான பொருட்களை தயாராக வைத்திருக்க உத்தர விடப்பட்டுள்ளது. வாக்காளர் பட்டியல் மற்றும் வேட்பாளர்பட்டியலை வெளியிட தேவையான ஏற்பாடுகளை செய்து கொள்ளவும் அறி வுறுத்தப்பட்டுள்ளது.

கடந்த பாராளுமன்றத்தேர்தலின் போது தேர்தல் கமிஷன் மூலம் பெங்களூர் “பெல்” நிறுவனத்திடம் இருந்து மின்னணு எந்திரங்கள் வாங்கப்பட்டன. திருச்செந்தூர் இடைத்தேர்தலுக்கு அந்த மின்னணு எந்திரங்கள் பயன்படுத்தப்படும்.

வாக்காளர் பட்டியலை நிர்வாக வசதிக்காக ஒரே சர்வரில் கொண்டு வந்துள்ளோம். இதன் மூலம் போலி வாக்காளர்களை நீக்க முடியும். இது வரை 12 முதல் 15 சதவீத போலி வாக்காளர்கள் நீக்கப்பட்டுள்ளனர்.

வாக்காளர் பட்டியலை வீடு வீடாக சென்று சரி பார்த்து 100 சதவீதம் மிகச் சரியான வாக்காளர் பட்டியலை தயாரிக்க முடிவு செய்யப்பட்டுள்ளது. பெயர் இட மாற்றம் மற்றும் பெயர் நீக்குவது போன்ற பணிகள் நடத்தி முடிக்கப்படும். இந்த பணிகள் அடுத்த மாதம் (நவம்பர்) 2-வது வாரத்தில் தொடங்கி நடைபெற உள்ளது.

மின்னணு எந்திரங்களை ஓட்டுச்சாவடிக்கு கொண்டு செல்லும் போது, பெட்டிகளில் ஜி.பி.எஸ்.கருவி பொருத்தப்படும். இதன் மூலம் மின்னணு எந்திரங்கள் எங்கு உள்ளது? எந்த பகுதியில் சென்று கொண்டிருக்கிறது என்பத கண்காணித்து உறுதி செய்து கொள்ள முடியும்.

இவ்வாறு அந்த அறிக்கையில் நரேஷ்குப்தா கூறி உள்ளார்.

எம்பிபிஎஸ், பிஇ- முஸ்லீம் மாணவர் எண்ணிக்கை 72% அதிகரிப்பு

முஸ்லிம்களுக்கு தனி இடஒதுக்கீடு வழங்கப்பட்டதையடுத்து மருத்துவ படிப்பில் அந்த சமூக மாணவர்கள் சேருவது 74 சதவீதமும், பொறியியல் படிப்பில் இஸ்லாமியர்கள் சேருவது 72 சதவீதமும் அதிகரித்துள்ளது.

இது குறித்து முதல்வர் கருணாநிதி வெளியிட்டுள்ள அறிக்கை:

இஸ்லாமிய சமுதாயத்தினரோடு நமது திராவிட இயக்கமும், நானும் கொண்டுள்ள தொய்வில்லாத தொடர்பும், உறவும் இன்று நேற்று ஏற்பட்டதல்ல. 70 ஆண்டுகளுக்கு முன்பு, பள்ளி செல்லும் மாணவனாக இருந்தபோதே, திருவாரூரிலே நடைபெற்ற இந்திய யூனியன் முஸ்லிம் லீக் மாநாட்டிலேயே - நான் கொடிபிடிக்கும் சிறுவனாக, பச்சைப் பிறைக் கொடியை கையிலே ஏந்துகின்ற சிறுவனாக, அந்த மாநாட்டிலே கலந்து கொண்டேன் என்பதை நான் பெருமையோடு நினைவு கூர்கிறேன்.

மாணவப் பருவத்திலே என்னுள் முகிழ்த்த அந்த உறவும், உணர்வும் இன்றைக்கு செழித்துப் பசுமையாகப் பரவியிருக்கின்றன. எனவே நான், இளமைப் பருவத்திலேயே இஸ்லாமிய சமுதாயத்தினரின் எண்ணற்ற நிகழ்ச்சிகளில், கூட்டங்களில், மாநாடுகளில் கலந்து கொண்டிருக்கிறேன்.

நான் ஆட்சிப் பொறுப்பை ஏற்றபோதெல்லாம் அந்த சமுதாயத்தினருக்கு ஆற்ற வேண்டிய கடமைகளைத் தவறாது ஆற்றி வந்திருக்கிறேன்.

இளமைக் காலத்திலேயே இஸ்லாமிய சமுதாயத்தினர்மீது நான் கொண்டிருந்த மதிப்பின் தொடர்ச்சியாக காயிதே மில்லத் மீது நான் கொண்டிருந்த அன்புக்கும், பாசத்துக்கும் அடையாளமாக- இஸ்லாமிய சமுதாயத்தினருக்கு வாய்ப்பு கிடைத்திடும் போதெல்லாம் பல்வேறு நன்மைகளை வழங்கியிருக்கிறேன்.

1969ல் மீலாது நபிக்கு முதன் முதல் அரசு விடுமுறை; முந்தைய அதிமுக அரசு 2001ல் ரத்து செய்த மீலாது நபி அரசு விடுமுறையை 15.11.2006 ஆணை மூலம் மீண்டும் விடுமுறை நாளாக அறிவித்தது; 1973ல் உருது பேசும் லப்பைகள், தெக்கனி முஸ்லிம்கள் ஆகியோரைப் பிற்படுத்தப்பட்டோர் பட்டியலில் சேர்த்தது;

1974ல் சென்னை-அண்ணாசாலை அரசினர் மகளிர் கல்லூரிக்கு "காயிதே மில்லத் அரசு மகளிர் கல்லூரி'' எனப் பெயர் சூட்டியது; 1989- இஸ்லாமியர் உள்ளிட்ட சிறுபான்மையினர் சமுதாய மக்கள் பெரும்பயன் எய்திடும் வகையில் சிறுபான்மையினர் நல ஆணையம் உருவாக்கியது;

1999ல் வக்பு வாரியச் சொத்துக்களைப் பராமரிப்பதற்கென முதன்முறையாக 40 லட்ச ரூபாய் வழங்கியது, 1999ல் "தமிழ்நாடு சிறுபான்மையினர் மேம்பாட்டுக் கழகம்'' என ஒரு அமைப்பினை உருவாக்கியது;

2000ல் உலமா ஓய்வூதியத் திட்டத்தை தர்க்காக்களில் பணிபுரியும் முஜாவர்களுக்கும் நீட்டிப்பு செய்தது, 2000ல் இஸ்லாமியர்களின் நீண்டநாள் கோரிக்கை ஏற்கப்பட்டு, 21.7.2000 அன்று உருது அகடமியைத் தொடங்கியது;

2001ல் காயிதே மில்லத் மணிமண்டபம் சென்னையில் அமைத்திட 25.2.2001 அன்று அடிக்கல் நாட்டி, திறக்கப்பட ஆவன செய்தது; சென்னைப் பல்கலைக்கழகத்தில் இஸ்லாமிய ஆய்வு மையம் ஏற்படுத்தியது;

சிறுபான்மையினரின் நலனுக்கென தனி இயக்குநரகம் ஒன்றை 2007ல் அமைத்தது; உலமா மற்றும் பணியாளர்கள் நல வாரியம் என ஒரு வாரியத்தை 2009, மார்ச் திங்களில் ஏற்படுத்தியது என்று இஸ்லாமிய சமுதாயத்திற்கு கழக அரசு வழங்கியுள்ள சலுகைகளும், நன்மைகளும் கணக்கிலடங்காதவை.

1947ம் ஆண்டு இந்தியா சுதந்திரம் பெற்றபிறகு, 1947ம் ஆண்டு முதல் 1962ம் ஆண்டு வரையில், தமிழகத்தில் முஸ்லிம் சமுதாயத்தைச் சேர்ந்த யாரும் அமைச்சராக இல்லை. அண்ணா குரல் எழுப்பிய பின்னர் தான் 1962ல் கடையநல்லூர் மஜீத் காங்கிரஸ் அமைச்சரவையிலே இடம்பெற்றார். திமுக தான் முதன்முதலாக தமிழகச் சட்டமன்ற மேலவைக்கு முஸ்லிம் உறுப்பினர் ஒருவரை, அதாவது திருச்சி ஜானி பாயை நியமித்தது.

அப்துல் சமதுவை மாநிலங்களவை உறுப்பினராக ஆக்கியதும் திமுகதான். 1967ம் ஆண்டு திமுக சார்பில் பெரியகுளம் மேத்தா, நெல்லை கதிரவன், சாதிக்பாட்சா ஆகிய மூவர் முஸ்லிம் சமுதாயத்தின் சார்பில் சட்டப்பேரவை உறுப்பினர்களாக ஆனார்கள்.

2001 முதல் 2006 வரை அதிமுக ஆட்சிப் பொறுப்பில் இருந்தபோது, முதலில் ஒரு ஆறு மாதகாலம் முஸ்லிம் சமுதாயத்தின் பிரதிநிதியாக அன்வர்ராஜா இடம் பெற்றிருந்தார்; ஆனால் அதற்கு பிறகு முஸ்லிம் பிரதிநிதியே இல்லாமல்தான் அதிமுக அமைச்சரவை நடைபெற்றது.

தற்போது 2006ல் பொறுப்பேற்ற திமுக ஆட்சியில் இரண்டு முஸ்லிம்கள், அதாவது உபயதுல்லா, மைதீன்கான் ஆகியோர் அமைச்சர்களாக இருந்து வருகின்றனர். முஸ்லிம் சமுதாயத்தினருக்கு பிரதிநிதித்துவம் இல்லாத திமுக அமைச்சரவையே இதுவரை இருந்ததில்லை என்ற உண்மைகள் அனைத்தையும் அந்த சமுதாயத்தினர் நன்கறிவார்கள்.

சிறுபான்மை முஸ்லிம்களுக்கு கல்வி நிலையங்களிலும், அரசுப் பணிகளிலும் தனியே இடஒதுக்கீடு வேண்டுமென்ற கோரிக்கை நீண்டகாலமாகவே இருந்து வந்தது. அதை ஏற்று, அண்ணாவின் 99ம் ஆண்டு பிறந்தநாள் பரிசாக, பிற்படுத்தப்பட்டோருக்கான 30 சதவீத இடஒதுக்கீட்டிலிருந்து, தமிழ்நாடு அரசின் பிற்படுத்தப்பட்டோர் பட்டியலில் இடம்பெற்றுள்ள முஸ்லிம்களுக்கு 3.5 சதவீதம் தனி இடஒதுக்கீடு வழங்கி, 15.9.2007 அன்று அவசரச் சட்டம் பிறப்பிக்கப்பட்டது.

மருத்து படிப்பில் 74 சதவீதம்:

இப்படி இஸ்லாமியர்களுக்கு தனி இடஒதுக்கீடு வழங்கியதன் காரணமாக, கல்வி நிலையங்களில் அவர்கள் பெற்றுள்ள இடங்களின் எண்ணிக்கை பெருமளவுக்கு அதிகரித்துள்ளன.

எம்.பி.பி.எஸ். மருத்துவப் பட்டப்படிப்பைப் பொறுத்தவரை, இஸ்லாமியர்களுக்கு தனி இடஒதுக்கீடு வழங்கப்பட்டதற்கு முன்; அதாவது, 2006-2007ம் ஆண்டில் அவர்கள் பெற்ற இடங்களின் எண்ணிக்கை 46.

2007-2008ம் ஆண்டில் அவர்களுக்கு கிடைத்த இடங்கள் 57. ஆனால், அவர்களுக்கு தனி இடஒதுக்கீடு வழங்கப்பட்டதற்கு பிறகு- 2008-2009ம் ஆண்டில் கிடைத்து்ள இடங்கள் 78.

2009-2010ம் ஆண்டில் கிடைத்துள்ள இடங்கள் 80.

அதாவது, மருத்துவப் பட்டப்படிப்பைப் பொறுத்தவரை இஸ்லாமிய மாணவர்கள் தனி இடஒதுக்கீடு வழங்கப்பட்டதற்கு முன்பு பெற்றதைவிட 74 சதவீத அதிகமான இடங்களை தனி இடஒதுக்கீடு வழங்கப்பட்டதற்குப் பின்பு பெற்றிருக்கிறார்கள்.

பொறியியல் படிப்பில் 72 சதவீதம்:

அதைப் போலவே, பி.இ. பொறியியல் பட்டப்படிப்பைப் பொறுத்தவரை, இஸ்லாமியர்களுக்கு தனி இடஒதுக்கீடு வழங்கப்பட்டதற்கு முன், அதாவது, 2007-2008ம் ஆண்டில் அவர்களுக்கு கிடைத்த இடங்கள் 2,125.

ஆனால், இஸ்லாமியர்களுக்கு தனி இடஒதுக்கீடு வழங்கப்பட்டதற்கு பிறகு- 2008-2009ம் ஆண்டில் அவர்களுக்கு கிடைத்த இடங்கள் 3,288.

2009-2010ம் ஆண்டில் அவர்களுக்கு கிடைத்த இடங்கள் 3,655.

அதாவது, பொறியியல் பட்டப்படிப்பைப் பொறுத்தவரை இஸ்லாமிய மாணவர்கள் தனி இடஒதுக்கீடு வழங்கப்பட்டதற்கு முன்பு பெற்றதைவிட 72 சதவீதத்திற்கு அதிகமான இடங்களை தனி இடஒதுக்கீடு வழங்கப்பட்டதற்கு பின்பு பெற்றிருக்கிறார்கள்.

இஸ்லாமியர்களுக்கு கழக அரசு வழங்கிய தனி இடஒதுக்கீட்டின் காரணமாக இப்பொழுது அவர்கள் பெற்றுள்ள வெற்றி, எதிர்காலத்தில் அவர்கள் பெறவேண்டிய பல வெற்றிகளுக்கு அடிப்படையாக அமைந்திட வேண்டுமென்பதே எனது ஆசை.

சிறுபான்மையினர் என்பதால் இஸ்லாமியர்களிடம் நாம் கொண்டிருக்கும் அக்கறையின் காரணமாக, அவர்களுக்கு பல்வேறு நன்மைகளைச் செய்திருந்தாலும்; இப்போதும் நான் சொல்லுகின்றேன்- எல்லாவற்றையும் நாம் செய்து முடித்து விடவில்லை.

அவர்களது மேம்பாட்டுக்கு நாம் ஆற்றிட வேண்டியது இன்னும் நிறைய இருக்கிறது!. நம்மைப் பொறுத்தவரையில், சமூக நீதிக்கான பயணம் என்பது "நீதிக்கட்சி'' காலத்திலேயே தொடங்கிய நெடிய பயணமல்லவா!.

இவ்வாறு கருணாநிதி கூறியுள்ளார்.

ரம்ஜான்: காயல்பட்டினத்தில் மின் தடையை தவிர்க்க தேமுதிக கோரிக்கை

ரம்ஜான் பண்டிகையன்று காயல்பட்டினத்தில் மின் தடையை தவிர்க்க வேண்டுமென தேமுதிகவினர் வேண்டுகோள் விடுத்துள்ளனர்.

இது தொடர்பாக அதன் நகரச் செயலர் எம்.எச்.எம். சதக்கத்துல்லாஹ் மின் வாரிய அதிகாரிகளுக்கு அனுப்பிய மனு:

நோன்பு முடிவு பெறும் ரம்ஜான் பண்டிகையன்று ஏற்கெனவே அறிவித்துள்ள 2 மணி நேர மின்தடையை தவிர்த்து அன்று முழுவதும் சீரான மின் விநியோகம் வழங்க நடவடிக்கை எடுக்க வேண்டும் என்றார் அவர்.

இப்தார் நோன்பு திறப்பு நிகழ்ச்சியில் விஜயகாந்த்

தே.மு.தி.க. சார்பில் இப்தார் நோன்பு திறக்கும் நிகழ்ச்சி சென்னை துறைமுகம், மரைக்காயர் தெருவில் உள்ள ஆஷா மண்டபத்தில் நேற்று மாலை நடைபெற்றது.

இந்த நிகழ்ச்சிக்கு தே.மு.தி.க. நிறுவன தலைவர் விஜயகாந்த் தலைமை தாங்கி, நோன்பு கஞ்சி குடித்தார். மத்திய சென்னை மாவட்ட செயலாளர் க.செந்தாமரைக்கண்ணன், பகுதி செயலாளர் விசாகன்ராஜா, கவுன்சிலர் சர்தார் ஆகியோர் முன்னிலை வகித்தனர்.

கவுன்சிலர்கள் பிரபாகரன், சரவணன், நிர்வாகிகள் கமாலுதீன், ஆயிரம் விளக்கு கோவிந்தன், திருவல்லிக்கேணி முன்னா செல்வக்குமார், அயன்புரம் செல்வம், முகமதுபாபு, ரமேஷ் உள்பட பலரும் இந்த நிகழ்ச்சியில் கலந்து கொண்டு நோன்பு கஞ்சி குடித்தனர்.

நிகழ்ச்சியில் தே.மு.தி.க. நிறுவன தலைவர் விஜயகாந்த் பேசிசும்போது, "கானூரில் நான் தர்கா கட்டி கொடுத்து இருக்கிறேன். நான் எப்போது எல்லாம் அமைதியில்லாமல் இருக்கிறோனோ அப்போதெல்லாம் நான் அந்த தர்க்காவிற்கு சென்று விடுவேன். என் வீட்டு பூஜையறையில் எல்லா மத கடவுள்களின் படமும் இடம் பெற்று உள்ளது. இந்த நிகழ்வில் கலந்து கொள்வதில் உண்மையிலே எனக்கு சந்தோஷமாக இருக்கிறது'' என்றார்.

'அரசியல் ரீதியாக எந்த முடிவும் எடுக்க முடியாத நிலையில் உள்ளேன்!' - விஜய்

சென்னை: இப்போதைக்கு அரசியல் ரீதியாக எந்த முடிவும் எடுக்க முடியாத நிலையில் நான் இருக்கிறன், என நடிகர் விஜய் இன்று கூறியுள்ளார்.

இன்று சென்னையில் தனது கல்யாண மண்டபகத்தில் அனைத்துப் பத்திரிகையாளர்களையும் சந்தித்தார் விஜய்.

இந்த சந்திப்பில் தனது அரசியல் நிலைப்பாட்டை அறிவிப்பதாகக் கூறியிருந்ததால் நூறுக்கும் மேற்பட்ட பத்திரிகை, இணையதள, தொலைக்காட்சி செய்தியாளர்கள் குழுமிவிட்டனர்.

இந்த சந்திப்பில் விஜய் கூறியதாவது:

கடந்த சில தினங்களாகவே எந்தப் பத்திரிகையைத் திறந்தாலும் எனது அரசியல் பிரவேசம் பற்றிய செய்திதான் முதலில் நிற்கிறது. உண்மையைச் சொன்னால் நான் அந்தளவுக்குப் பெரிய ஆள் கிடையாது.

ராகுல் காந்தியை டெல்லியில் நான் சந்தித்தது உண்மை. எனது திரைப்படங்கள், நான் செய்துவரும் மக்கள் பணிகளைப் பற்றிதான் நிறைய பேசினார். அரசியல் பற்றியும் பேசினோம். ஆனால், அதை இப்போது சொல்வது நாகரீகமாக இருக்காது.

அவரை சந்தித்தபோது அவர் என்னை நடத்திய விதம் எனக்கு மிக்க பிடித்திருந்தது. நானும், காங்கிரசும் இளைஞர்களை அணுகுவதில் ஒரே அணுகுமுறை தான் கொண்டுள்ளோம்.

இந்தியாவையே மாற்றிக் காட்ட வேண்டும் எனும் வேட்கையில் செயல்பட்டுக் கொண்டிருக்கும் நம்பிக்கை நட்சத்திரமான அவருடன் உரையாடியது எனக்கு மிகுந்த மகிழ்ச்சியைத் தந்தது. இது தமிழக மக்களுக்கும் என் ரசிகர்களுக்கும் கிடைத்த பெருமை(!?) என்பேன்.

எதிர்கால இளைஞர்களை அரவணைத்து ஒருங்கிணைத்துச் செல்லும் பொறுப்பு எனக்கிருக்கிறது. எனவே இப்போதைக்கு எந்த அரசியல் முடிவையும் நான் எடுக்கவில்லை, எடுக்க முடியவில்லை. இப்போதைக்கு மக்கள் இயக்கத்தைச் சிறப்பாகத் தொடரப் போகிறேன்.

அரசியல் குறித்து உடனடியாக எந்த ஒரு முடிவும் எடுக்க முடியாத நிலையில் நான் உள்ளேன் என்பதே உண்மை.

தமிழக மக்களுக்கும், உலகத் தமிழர்களுக்கும் நல்லது நடக்க வேண்டும். அதற்காக களத்தில் இறங்கிப் போராடுவேன். தொலைநோக்குப் பார்வையோடு ஒரு வளமான, வலிமையான அரசாங்கத்தை உருவாக்க எநதக் கட்சி முனைகிறதோ அவர்களோடு நான் கை கோர்ப்பது பற்றி முடிவு எடுப்பேன்.

வாழ்க தமிழ்.... வெல்க பாரதம் என்றார் விஜய் .

முதல்வர் கருணாநிதி மற்றும் துணை முதல்வர் மு.க.ஸ்டாலின் பொறுப்புகள் என்னென்ன?

சென்னை: முதல்வர் கருணாநிதி மற்றும் துணை முதல்வர் மு.க.ஸ்டாலின் ஆகியோரது கட்டுப்பாட்டின் கீழ் வரும் பணிகள், பொறுப்புகள் என்ன என்பது குறித்த அரசாணை வெளியிடப்பட்டுள்ளது.

அரசாணையில் கூறப்பட்டுள்ளதாவது:

முதல்வரின் பொறுப்புகள்

1. அமைச்சரவை கூட்ட ஏற்பாடுகள்,

2. கொடியேற்று விழா,

3. இந்திய ஆட்சிப் பணி,

4. ஓய்வூதியம்,

5. மாநில பாதுகாப்பு,

6. அரசியல் குற்றங்கள்,

7. அமைச்சர்களுக்கான பொறுப்புகள் ஒதுக்கீடு,

8. அமைச்சர்கள் நியமனம்,

9. அரசு விமானம் மற்றும் ஹெலிகாப்டர்,

10. சம்மன்,

11. சட்டமன்றத்தை கூட்டுதல் மற்றும் கலைத்தல்,

12. சட்டமன்ற விதிகள்,

13. அமைச்சர் அலுவலக ஊழியர்கள்,

14. அரசியல் குற்ற நடவடிக்கைகள்,

15. சாதி, மத பிரச்சினைகள்,

16. குண்டர் சட்டம், பயங்கரவாத செயல்கள் தடுப்பு,

17. கள்ளச்சாராயம், போதை மருந்துகள்,

18. வனக்குற்றங்கள்,

19. விபசாரம், மணல் கடத்தல், திருட்டு வீடியோ போன்ற குற்றத் தடுப்பு,

20.வெளி விவகாரங்கள்,

21. இந்திய பாதுகாப்பு, பொது அமைதி, கைதிகள் மற்றும் குற்றவாளிகள் பரிமாற்றம்,

22. ராணுவம் மற்றும் முன்னாள் ராணுவத்தினர், வீரதீர விருதுகள், முப்படையின் பணிகள்,

23. உயர்நீதிமன்ற நீதிபதிகள் நியமனம், கவுரவ விருதுகள், பிற மாநில உறவுகள்,

துணை முதல்வரின் பொறுப்புகள்

1. இந்திய குடிமைப் பணி அதிகாரிகள் தவிர்த்த சிவில் பிரதிநிதிகள்,

2. பொது ஆலோசனைக்குழு, குழுக்கள் மற்றும் கருத்தரங்குகள்,

3. மாவட்ட நீதிபதிகள், கீழ்நிலை பணியாளர்கள்,

4. தினக்கூலி ஊழியர் பணிவரன்முறை, குற்ற மேல்முறையீடுகள்,

5. மாவட்ட வருவாய் அதிகாரிகள், பொதுத் துறை பிரிவு அதிகாரிகள்,

6. உதவி பிரிவு அதிகாரிகள், உதவியாளர்கள், சுருக்கெழுத்தர்-தட்டச்சர்கள்,

7. கருணை அடிப்படை பணி நியமனம், தியாகிகள் ஓய்வூதியம்,

8. அரசு விருந்தினர் இல்லம், விடுமுறைகள், மனித உரிமைகள்,

10. சென்னை ஐகோர்ட்டு, மதுரை ஐகோர்ட்டு கிளை ஆகியவற்றுக்கு அட்வகேட் ஜெனரல், சட்ட அதிகாரிகள் நியமனம், அவர்களுக்கான சிறப்பு கட்டணம்,

11. சட்டப்பேரவை செயலகம், அரசு ஊழியர்கள் மீதான சட்ட நடவடிக்கைகள், எந்த துறைக்கும் ஒதுக்கப்படாத பொதுவான பணிகள், ரகசிய அறிக்கைகள்,

12. அரசியல் மற்றும் நிர்வாகம் பற்றிய முக்கியத்துவம் வாய்ந்த அறிக்கைகள், தலைமைச் செயலகம்,

13. பொதுத்துறை (தபால்), மத்திய ஆவணப் பிரிவு, நூலகம், மாநில விழாக்கள், நிர்வாக கட்டுப்பாட்டில் உள்ள கட்டிடங்கள், பொது சொத்து பாதுகாப்பு,

14. முப்படை அதிகாரிகள் வருகை, சிவில் பாதுகாப்பு சட்டங்கள்,

15. ராணுவத்திற்கான நில ஆர்ஜிதம்,

16. மக்கள் தொகை கணக்கெடுப்பு, பதவியேற்பு விழாக்கள்,

17. சிறப்பு தபால்தலைக்கான பரிந்துரை, வெளிநாட்டவர், ரெயில்வே நிலங்கள் அதிகாரவரம்பு,

18. வெளிநாட்டு தூதர்கள், இந்திய, வெளிநாட்டு போர்ப்படை கப்பல்கள், பிற மாநில கவர்னர்கள், உயர் அதிகாரிகள்.

முதல்வர் மற்றும் துணை முதல்வர் ஆகிய இருவரின் கட்டுப்பாட்டின் கீழ் உள்ள பொறுப்புகள்:

1. வெளிநாட்டு தூதரகங்கள்,

2. வெளிநாட்டு தொடர்புகள்,

3. வெளிநாட்டு முக்கிய பிரமுகர்கள், தூதர்கள், வர்த்தக பிரதிநிதிகள்,

4. வெளிவிவகாரம் தொடர்புடைய கைதிகள், ஜனாதிபதி, துணை ஜனாதிபதி, பிரதமர் வருகை.

இவ்வாறு அரசாணை கூறுகிறது.

நெல்லையில் பீடி சுற்றும் பெண்களிடம் கலந்துரையாடிய ராகுல்

ராகு‌ல் கா‌ந்‌தி, ‌இ‌ன்று பி‌ற்பக‌லி‌ல் நாக‌ர்கோ‌வி‌‌லி‌ல் ‌நிக‌ழ்‌ச்‌சியை முடி‌த்து‌‌‌வி‌ட்டு ஹெ‌லிகா‌ப்ட‌ர் மூல‌ம் நெல்லை பாளையங்கோட்டை ஆயுதப்படை மைதானத்தில் வந்து இறங்கினார்.

அ‌ங்கு அவருக்கு நெல்லை, தென்காசி, தூத்துக்குடி மாவட்டத்தைச் சேர்ந்த காங்கிரஸ் கட்சியின் நிர்வாகிகள், நாடாளுமன்ற உறுப்பினர்கள், சட்ட மன்ற உறுப்பினர்கள், இளைஞர் காங்கிரசார் சிறப்பான வரவேற்பு அளித்தனர்.

பின்னர் அவர், பாளை நூற்றாண்டு மண்டபத்தில் நெல்லை மாவட்டத்தைச் சேர்ந்த பீடி சுற்றும் பெண்களிடமும், மாணவிகளிடமும் கலந்துரையாடினார். இதனையடுத்து பாளை சாரால் டக்கர் பள்ளியில், தூத்துக்குடி, நெல்லை நாடாளுமன்றத் தொகுதிகளைச் சேர்ந்த இளைஞர் காங்கிரசாரை சந்தித்தார்.

ராகுல்காந்தியின் வருகையொட்டி, நெல்லையில் பலத்த பாதுகாப்பு ஏற்பாடுகள் செய்யப்பட்டிருந்தது. அவரது தந்தை ராஜீவைப் போலவே இவரும் குழந்தைகளுக்கு கைகொடுத்தும், தனக்கு அளித்த பொன்னாடைகளை முதியவர்கள், பொதுமக்களுக்கு வழங்கினார்.

தமிழகத்தில் காங்கிரஸ் ஆட்சி: ராகுல் நம்பிக்கை

இளைஞர் காங்கிரûஸ பலப்படுத்தினால் தமிழகத்தில் ஆட்சியைக் கைப்பற்ற முடியும் என்று நம்பிக்கை தெரிவித்தார் அகில இந்திய காங்கிரஸ் கட்சியின் பொதுச்செயலர் ராகுல் காந்தி.

திருநெல்வேலி, தூத்துக்குடி, தென்காசி மக்களவைத் தொகுதிகளில் இளைஞர் காங்கிரஸ் நிர்வாகிகள் தேர்தலில் போட்டியிட விரும்புகிறவர்களுடன் பாளையங்கோட்டை சாராள் தக்கர் மேல்நிலைப் பள்ளியில் அவர் செவ்வாய்க்கிழமை கலந்துரையாடினார். அப்போது இந்த நம்பிக்கையை வெளியிட்டார்.

பத்திரிகையாளர்கள் அனுமதிக்கப்படாத இந்தக் கூட்டத்தில் பங்கேற்றவர்கள், கூட்ட நிகழ்வு குறித்து பின்னர் நிருபர்களிடம் தெரிவித்தனர்.

ராகுல் காந்தி பேசியதாக அவர்கள் தெரிவித்ததாவது:

"இளைஞர் காங்கிரஸ் தேர்தல் ஜனநாயக முறைப்படி நடைபெற உள்ளது. இத் தேர்தலில் யார் வேண்டுமானாலும் போட்டியிடலாம். இதில் தேர்ந்தெடுக்கப்படுபவர்கள் எந்தக் கோஷ்டியைச் சேர்ந்தவராகவும் இருக்கமாட்டார்.

இதனால் கட்சியில் கோஷ்டிப் பூசல் ஏற்பட இனி வாய்ப்பில்லை. அதிக உறுப்பினர்களை இளைஞர் காங்கிரஸில் சேர்ப்பவர்கள், நிர்வாகிகளாகத் தேர்ந்தெடுக்கப்படும் வாய்ப்பு உள்ளது.

இளைஞர் காங்கிரஸின் உண்மையான தொண்டனாகவும், உண்மையாகவும் உழைத்தால், தேர்தலில் பணம் செலவழிக்கத் தேவையில்லை. உங்களை நம்பி தொண்டர்கள் வாக்களிப்பார்கள். கட்சிக்காக கடுமையாகப் பாடுபடுகிறவர்களை, கட்சி கண்டிப்பாக அங்கீகரிக்கும்.

இளைஞர் காங்கிரஸ் தேர்தல் முடிந்த பின்னர், கட்சித் தலைமையைத் தொண்டர்கள் எளிதாகத் தொடர்புகொள்ள முடியும்.

கிராமங்கள்தோறும் கிராமக் கமிட்டி அமைக்கப்படும். இக் கமிட்டியில் 5 பேர் நிர்வாகிகளாக இருப்பர். இவர்கள்தான் காங்கிரஸ் கட்சி சார்பில் சட்டப் பேரவைத் தேர்தலில் போட்டியிடுகிறவரையும், மக்களவைத் தேர்தலில் போட்டியிடுகிறவரையும் தேர்ந்தெடுப்பார்கள்.

தமிழகத்தில் இப்போது இருக்கும் அரசியல் நிலைமையை உடனடியாக நம்மால் மாற்ற முடியாது.

நாம் இப்போது அதிமுக, திமுக போல் இல்லாமல், இளைஞர் காங்கிரஸ் தேர்தலை ஜனநாயக முறைப்படி நடத்துகிறோம். இதனால் இளைஞர் காங்கிரஸ் கீழ்மட்டத்தில் இருந்து மேல்மட்டம்வரை பலமாக உருவாகும். இது எதிர்காலத்தில் நாம் ஆட்சியைப் பிடிக்க உதவும். இளைஞர் காங்கிரûஸ பலப்படுத்தினால், நாம் தமிழகத்தில் ஆட்சியைக் கைப்பற்ற முடியும்; தமிழகத்தில் காங்கிரஸ் ஆட்சி என்பது நிச்சயமாக சாத்தியம்' என்றார் ராகுல் காந்தி.

அகில இந்திய இளைஞர் காங்கிரஸ் தலைவர் அசோக் தன்வர், தமிழக காங்கிரஸ் கட்சியின் தலைவர் கே.வீ. தங்கபாலு, அகில இந்திய காங்கிரஸ் செயலர் ஜிதேந்தர் சிங், திருநெல்வேலி மாவட்ட இளைஞர் காங்கிரஸ் தேர்தல் பொறுப்பாளர் கே.டி. பென்னி ஆகியோர் இக் கூட்டத்தில் பங்கேற்றனர்.

ஆந்திர முதல்வர் ராஜசேகர ரெட்டி ஹெலிகாப்டர் விபத்தில் மரணமடைந்தார்

ஆந்திர முதல்வர் ராஜசேகர ரெட்டி உள்ளிட்ட ஐந்து பேரும் பலியாகி விட்டதாக அதிகாரப்பூர்வமாக அறிவிக்கப்பட்டுள்ளது.

கர்னூல் மாவட்டம் ரொல்லபென்டா என்ற இடத்தில் முதல்வர் ராஜசேகர ரெட்டி பயணித்த ஹெலிகாப்டர் மலைக் குன்றின் மீது நொறுங்கிய நிலையில் இன்று காலை கண்டுபிடிக்கப்பட்டது.

கர்னூலிலிருந்து 74 கிலோமீட்டர் தொலைவில் அந்த மலைக் குன்று உள்ளது.

ஹெலிகாப்டர் மலை மீது மோதி விழுந்துள்ளதாகவும், முற்றிலும் எரிந்து போன நிலையில் அது காணப்படுவதாகவும் தகவல்கள் வெளியாகின. அதில் பயணித்த யாரும் உயிருடன் இருக்க வாய்ப்பி்ல்லை என்றும் செய்திகள் கூறின.

ஹெலிகாப்டர் நொறுங்கிய நிலையில் கண்டுபிடிக்கப்பட்டதை இந்திய விமானப்படை அதிகாரி சாகர் பாரதி உறுதி செய்துள்ளார். விமானப்படை ஹெலிகாப்டர்கள்தான், ரெட்டி பயணித்த ஹெலிகாப்டரைக் கண்டுபிடித்ததாகவும் அவர் தெரிவித்தார்.

மேலும் ஹெலிகாப்டர் கண்டுபிடிக்கப்பட்ட இடம் அடர்ந்த வனப்பகுதியில் உள்ள மலைக் குன்று என்பதால் விமானப்படை ஹெலிகாப்டர்களால் அங்கு இறங்க முடியாத நிலை இருப்பதாகவும் அவர் தெரிவித்தார்.

ஹெலிகாப்டர் இறங்க முடியாத நிலையில் இருப்பதால் விமானப்படை பாராசூட் பிரிவு கமாண்டோக்கள் அனுப்பப்பட்டனர்.

அவர்கள் சற்று முன்னர் மலைப் பகுதியில் இறக்கி விடப்பட்டனர். இதையடுத்து ஹெலிகாப்டரை நெருங்கிய அவர்கள், அங்கு ஐந்து உடல்கள் இருப்பதாக தெரிவித்ததைத் தொடர்ந்து ரெட்டி உள்ளிட்ட ஐவரும் உயிரிழந்தது உறுதி செய்யப்பட்டது.

ரெட்டி மரணச் செய்தி அதிகாரப்பூர்வமாகவும் அறிவிக்கப்பட்டுள்ளது.

விபத்தில் உயிரிழந்தவர்கள் விவரம்...

முதல்வர் ராஜசேகர ரெட்டி

சுப்ரமணியம்- முதல்வரின் முதன்மைச் செயலாளர்.

வெஸ்லி - முதல்வரின் முதன்மை பாதுகாப்பு அதிகாரி.

கேப்டன் எஸ்.கே.பாட்டியா - ஹெலிகாப்டர் கேப்டன்.

கேப்டன் எம்.எஸ். ரெட்டி- ஹெலிகாப்டர் துணை கேப்டன்.

இடைக்கால முதல்வர் ரோசய்யா

முதல்வர் ராஜசேகர ரெட்டி அகால மரணம் அடைந்ததைத் தொடர்ந்து மூத்த அமைச்சரும், நிதியமைச்சருமான கே.ரோசய்யா இடைக்கால முதல்வராக அறிவிக்கப்பட்டுள்ளார்.

ஸ்ரீவைகுண்டம் தொகுதியில் எம்.எல்.ஏ. நன்றி தெரிவிப்பு

ஸ்ரீவைகுண்டம் தொகுதியில் எம்.பி. சுடலையாண்டி எம்.எல்.ஏ வெள்ளிக்கிழமை வாக்காளர்களுக்கு நன்றி தெரிவித்தார்.

ஸ்ரீவைகுண்டம் சட்டப்பேரவைத் தொகுதி இடைத்தேர்தலில் வெற்றிபெற்ற காங்கிரஸ் வேட்பாளர் சுடலையாண்டி, ஸ்ரீவைகுண்டம் தொகுதி வாக்காளர்களுக்கு நன்றி தெரிவித்து அவர் வெள்ளிக்கிழமை சுற்றுப்பயணம் செய்தார்.

பழையகாயலில் மாலை 5 மணிக்கு சுடலையாண்டி தனது சுற்றுப்பயணத்தை தொடங்கினார். தொடர்ந்து புல்லாவெளி, கோவங்காடு, மஞ்சள்நீர்காயல், அகரம், மாரமங்கலம், இடையர்காடு, முக்காணி, உமரிக்காடு, வாழவல்லான், கொற்கை ஆகிய பகுதிகளில் திறந்த ஜீப்பில் சென்று வாக்காளர்களுக்கு நன்றி தெரிவித்தார்.

அப்போது, ஸ்ரீவைகுண்டம் தொகுதியில் அனைத்து அடிப்படை வசதிகளையும் மேம்படுத்த நடவடிக்கை எடுப்பேன் என அவர் உறுதியளித்தார்.

அவருடன் தூத்துக்குடி தெற்கு மாவட்ட காங்கிரஸ் தலைவர் எஸ். ஜஸ்டின், ஒன்றியக் குழு உறுப்பினர் இளங்கோ, பொட்டல் ஆறுமுகம், ராயப்பன் உள்ளிட்டோர் உடன் சென்றனர்.

ஸ்ரீவைகுண்டம் கா‌ங்‌கிர‌ஸ் ச‌ட்டம‌ன்ற உறு‌ப்‌பின‌ர் பத‌வி ஏ‌ற்பு

அண்மையில் நடந்து முடிந்த ஸ்ரீவைகு‌ண்டம்,தொண்டாமுத்தூர் ச‌ட்ட‌ம‌ன்ற தொகு‌தி‌யி‌ல் வெ‌ற்ற‌ி பெ‌ற்ற கா‌ங்‌கிர‌ஸ் உறு‌ப்‌பின‌ர்க‌ள் நேற்று பத‌வி ஏ‌ற்று‌க் கொ‌ண்டன‌ர்.

சமீபத்தில் நடந்த 5 சட்டம‌ன்ற தொகுதிகளுக்கான இடைத்தேர்தலில் கம்பம், இளையான்குடி, பர்கூர் ஆகிய தொகுதிகளில் தி.மு.க. வெற்றி பெற்றது.தொண்டாமுத்தூர், ஸ்ரீவைகுண்டம் தொகுதிகளில் காங்கிரஸ் வெற்றி பெற்றது. தி.மு.க. சார்பில் வெற்றி பெற்ற உறு‌ப்‌பின‌ர்க‌ள் ராமகிருஷ்ணன், சுப.மதியரசன், நரசிம்மன்ஆகியோர் கடந்த 25ஆ‌‌ம் தேதி பதவி ஏற்றுக் கொண்டனர்.

இ‌ந்த ‌நிலை‌யி‌ல் இடைத்தேர்தலில் வெற்றி பெற்ற காங்கிரஸ் ச‌ட்டம‌ன்ற உறு‌ப்‌பின‌ர்க‌ள் கந்தசாமி (தொண்டாமுத்தூர்), சுடலையாண்டி (ஸ்ரீவைகுண்டம்) ஆகியோர் நேற்று
முதலமைச்சர் கருணாநிதி முன்னிலையில் பதவி ஏற்று கொண்டனர். அவை‌த் தலைவ‌ர் அறையில் நடந்த நிகழ்ச்சியில் அவர்கள் இருவருக்கும் அவை‌த் தலைவ‌ர் ஆவுடையப்பன் பதவிப் பிரமாணம் செய்து வைத்தார்.

இ‌ந்த ‌நிக‌ழ்‌ச்‌சி‌யி‌‌ல் துணை முதலமைச்சர் மு.க.ஸ்டாலின், அமைச்சர்கள் ஆற்காடு வீராசாமி, பொன்முடி, வீரபாண்டி ஆறுமுகம், கே.கே.எஸ்.எஸ்.ஆர். ராமச்சந்திரன், தமிழ்நாடு காங்கிரஸ் தலைவர் தங்கபாலு, சட்டமன்ற காங்கிரஸ் தலைவர் சுதர்சனம், ச‌ட்டம‌ன்ற உறு‌ப்‌பின‌ர்க‌ள் யசோதா, பீட்டர் அல்போன்ஸ் ஆ‌கியோ‌ர் கலந்து கொண்டனர்.

நன்றி : சக்திவேல்,சென்னை

ஸ்ரீவைகுண்டம்:அடிப்படை வசதிகளுக்கு பாடுபடுவேன்- சுடலையாண்டி

ஸ்ரீவைகுண்டம் தொகுதியில் அடிப்படை வசதிகளை செய்து கொடுப்பேன் என்று வெற்றி பெற்ற காங் வேட்பாளர் சுடலையாண்டி தெரிவித்துள்ளார்.

ஸ்ரீவைகுண்டம் தொகுதி இடைத் தேர்தலில் காங்கிரஸ் வேட்பாளர் சுடலையாண்டி 31,359 வாக்குகள் வித்தியாசத்தில் வெற்றி பெற்றார். இதையடுத்து அப்பகுதியில் காங்கிரஸ் தொண்டர்கள் பட்டாசு வெடித்து மகிழ்ச்சியை கொண்டாடினர்.

வெற்றி குறித்து சுடலையாண்டி நிருபர்களிடம் கூறுகையில்,

இது மத்திய, மாநில அரசுகளின் சாதனைக்கு கிடைத்த வெற்றி. ஸ்ரீவைகுண்டம் பகுதி மக்களின் அடிப்படை தேவைகள் மற்றும் உரிமைகளை பெற்று தர விரைந்து நடவடிக்கை எடுப்பேன்.

எனது வெற்றிக்கு உறுதுணையாக இருந்த முதல்வர், துணை முதல்வர், மத்திய அமைச்சர் அழகிரி , தமிழக காங்கிரஸ் தலைவர் தங்கபாலு , அமைச்சர்கள் கீதா ஜீவன், சுரேஷ்ராஜன், தங்கம் தென்னரசு, பூங்கோதை, மாவட்ட செயலாளர்கள் என் பெரியசாமி, மற்றும் கூட்டணி கட்சி தலைவர்கள், தொண்டர்கள் அனைவருக்கும் நன்றியை தெரிவித்துக் கொள்கிறேன் என்றார்

ஸ்ரீவைகுண்டத்தில் எம்ஜிஆர் தொண்டர்களின் வாக்குகளை வென்ற தேமுதிக

ஸ்ரீவைகுண்டம் தொகுதியில் தே.மு.தி.க. வெற்றிவாய்ப்பை இழந்த போதிலும், எம்.ஜி.ஆர். தொண்டர்களின் வாக்குகளை வெல்லும் போட்டியில் அக்கட்சி மிகப்பெரிய வெற்றியை பெற்றுள்ளது.

இது தே.மு.தி.க. தொண்டர்கள் மத்தியில் மிகுந்த மகிழ்ச்சியையும், நம்பிக்கையையும் ஏற்படுத்தியுள்ளது.

இத் தொகுதி இடைத்தேர்தலில் 53,827 வாக்குகள் பெற்று காங்கிரஸ் வேட்பாளர் எம்.பி. சுடலையாண்டி வெற்றிபெற்றுள்ளார்.

அவருக்கு அடுத்தபடியாக தே.மு.தி.க. வேட்பாளர் மா. செüந்திரபாண்டியன் 22,468 வாக்குகள் பெற்றுள்ளார்.

இந்த தேர்தலில் அ.தி.மு.க. போட்டியிடாமல் புறக்கணித்தது. இதனால், இத்தொகுதியில் உள்ள எம்.ஜி.ஆர். தொண்டர்களின், அதாவது அ.தி.மு.க. ஆதரவாளர்களின் வாக்குகள் யாருக்கு என்பது மிகப்பெரிய கேள்வியாக இருந்தது.

எம்.ஜி.ஆர். தொண்டர்களின் வாக்குகள் தங்களுக்குத் தான் என தி.மு.க., இந்திய கம்யூனிஸ்ட், தே.மு.தி.க. ஆகிய மூன்று கட்சிகளுமே கூறி வந்தன.

ஆனால், எம்.ஜி.ஆர். தொண்டர்களின் வாக்குகள் யாருக்கு என்ற போட்டியில் உண்மையில் வெற்றிபெற்றிருப்பது தே.மு.தி.க. தான்.

காங்கிரஸ் கட்சிக்கு கடந்த தேர்தலைவிட (2006) கூடுதல் வாக்குகள் கிடைத்திருக்கிறது. 2006 தேர்தலில் அக்கட்சி சார்பில் வெற்றி பெற்ற டி. செல்வராஜ் 38,188 வாக்குகள் பெற்றிருந்தார். அப்போது பதிவான மொத்த வாக்குகள் 93,648.

ஆனால், இம்முறை காங்கிரஸ் வேட்பாளர் 53,827 வாக்குகள் பெற்றிருக்கிறார். பதிவான மொத்த வாக்குகள் 84,480 தான்.

காங்கிரஸ் கட்சிக்கு அ.தி.மு.க. ஆதரவு ஓட்டு குறிப்பிட்ட சதவிகிதம் கிடைத்திருப்பதை மறுப்பதற்கில்லை.

ஆளும் கூட்டணிக் கட்சிக்கு இடைத்தேர்தலில் அதிக வாக்குகள் கிடைப்பது வழக்கம்தான் என்கின்றனர் அரசியல் பார்வையாளர்கள்.

அதேநேரத்தில் அ.தி.மு.க. தேர்தலைப் புறக்கணித்துள்ள சந்தர்ப்பத்தைத் தங்களுக்கு சாதகமாகப் பயன்படுத்தி, எம்.ஜி.ஆர். தொண்டர்களின் வாக்குகளைப் பெறுவதில் தே.மு.தி.க. வெற்றி பெற்றிருக்கிறது.

அந்த கட்சி வேட்பாளர் மா. செüந்திரபாண்டியன் 22,468 வாக்குகள் பெற்றுள்ளார். கடந்த 2006 சட்டப்பேரவைத் தேர்தலில் அக்கட்சி சார்பில் இந்த தொகுதியில் போட்டியிட்ட எஸ். சத்தியசீலனுக்கு 3,166 வாக்குகள்தான் கிடைத்தன. அப்போது தே.மு.தி.க.வுக்கு இந்த தொகுதியில் 4-வது இடம் தான் கிடைத்தது. மேலும், டெபாசிட் தொகையையும் இழந்தது.

தொடர்ந்து கடந்த மே மாதம் நடைபெற்ற மக்களவைத் தேர்தலில் தூத்துக்குடி மக்களவைத் தொகுதியில் போட்டியிட்ட தே.மு.தி.க. வேட்பாளர் எம்.எஸ். சுந்தருக்கு ஸ்ரீவைகுண்டம் சட்டப்பேரவைத் தொகுதியில் 8,347 வாக்குகள் கிடைத்தன.

இந்த இடைத்தேர்தலில் கூடுதலாகக் கிடைத்துள்ள வாக்குகள் எம்.ஜி.ஆர். தொண்டர்களின், அதாவது அ.தி.மு.க. ஆதரவு வாக்குகள் தான் என்பதை தே.மு.தி.க.வினரே ஒப்புக்கொண்டுள்ளனர்.

தி.மு.க.வினர், வாக்குகளுக்கு பணம் கொடுக்கவில்லை என்றால், காங்கிரஸ் வேட்பாளருக்கு கிடைத்த எம்.ஜி.ஆர். தொண்டர்களின் மற்ற வாக்குகளும் தங்களுக்குத் தான் கிடைத்திருக்கும் என தே.மு.தி.க. மாவட்ட நிர்வாகி ஒருவர் தெரிவித்தார்.

இடைத்தேர்தலில் வெற்றி வாய்ப்பை இழந்த போதிலும், எம்.ஜி.ஆர். தொண்டர்களின் வாக்குகளை எங்கள் பக்கம் இழுத்ததில் மிகுந்த மகிழ்ச்சி. இம்முறை எங்களுக்கு வாக்களித்த எம்.ஜி.ஆர். தொண்டர்கள் வரும் தேர்தல்களிலும் எங்களுக்கே வாக்களிப்பார்கள் என்ற நம்பிக்கை ஏற்பட்டிருக்கிறது என்றார் அவர்.

அதேவேளையில் எம்.ஜி.ஆர். தொண்டர்கள் தங்களுக்குத் தான் வாக்களிக்க வேண்டும். அது அவர்களது தார்மிகக் கடமை என்று கூறி வந்த இந்திய கம்யூனிஸ்ட் கட்சிக்கு பலத்த பின்னடைவு ஏற்பட்டுள்ளது. அக்கட்சி வேட்பாளர் ஞா. தனலெட்சுமி வெறும் 3,407 வாக்குகள் மட்டுமே பெற்றுள்ளார். இதன் மூலம் இந்த தொகுதியில் கம்யூனிஸ்ட் கட்சிகளின் பலம் திட்டவட்டமாகத் தெரிய வந்துள்ளது.

இதேபோன்று மற்றொரு தேசிய கட்சியான பா.ஜ.க.வுக்கும் இந்த தொகுதியில் பலத்த பின்னடைவு ஏற்பட்டுள்ளது. கடந்த 2006 சட்டப்பேரவைத் தேர்தலில் இந்த தொகுதியில் போட்டியிட்ட பா.ஜ.க. வேட்பாளர் பி.எம். பால்ராஜுக்கு 2,719 வாக்குகள் கிடைத்தன. ஆனால், தற்போது அதுவும் குறைந்து 1797 வாக்குகள் மட்டுமே கிடைத்துள்ளன

இளையாங்குடியில் திமுக வெற்றி

இளையாங்குடி தொகுதியில் திமுக வேட்பாளர் சுப.மதியரசன் 41,456 வாக்குகள் வித்தியாசத்தில் வெற்றி பெற்றார்.

இத்தொகுதியை திமுக தக்க வைத்துக் கொண்டுள்ளது.

இத்தொகுதியில் வேட்பாளர்கள் பெற்ற வாக்குகள்

சுப.மதியரசன் (திமுக) - 61,084

அழகு பாலகிருஷ்ணன் (தேமுதிக) - 19,628

ராஜேந்திரன் (பாஜக) - 1487


இங்கும் பாஜகவுக்கு டெபாசிட் காலியாகியுள்ளது