சவுதி அரேபியாவில் வேலைவாய்ப்பு: ஆக. 29, 30-ல் நேர்முகத் தேர்வு

சவுதி அரேபியாவில் பணியாற்ற விரும்பும் கட்டுமானத் தொழிலாளர்களுக்கான நேர்முகத் தேர்வு நாகர்கோவிலில் இம் மாதம் 29, 30 ஆகிய தேதிகளில் நடைபெற உள்ளது.

இதுகுறித்து தமிழக அரசின் அயல்நாட்டு வேலைவாய்ப்பு நிறுவனத்தின் தலைவர் மற்றும் நிர்வாக இயக்குநர் செவ்வாய்க்கிழமை வெளியிட்டுள்ள செய்திக் குறிப்பு விவரம்:

சவுதி அரேபியாவில் உள்ள ஒரு முன்னணி கட்டுமான நிறுவனத்தில் பணியாற்ற கட்டுமானத் தொழிலாளர்கள் தேவைப்படுகின்றனர். வளைகுடா நாடுகளில் 4 ஆண்டுகள் பணி அனுபவம் பெற்று ஐ.டி.ஐ. பயின்ற எலக்ட்ரீசியன்கள், பிளம்பர்கள், 2 ஆண்டுகள் பணி அனுபவம் பெற்ற ஐ.டி.ஐ. தகுதி அல்லாத ஸ்பிரே பெயிண்டர்கள், டைல்ஸ் பொருத்துபவர்கள், மேசன்கள், சட்டரிங் கார்பெண்டர்கள், ஸ்டீல் பிக்ஸ்சர்கள் மற்றும் பினிசிங் கார்பெண்டர்கள் அதிக அளவில் தேவைப்படுகின்றனர்.

எனவே, தகுதி உள்ளவர்கள் தங்களின் கல்வி, அனுபவம், பாஸ்போர்ட் மற்றும் இரண்டு புகைப்படத்துடன் நாகர்கோவில் கோணம் அரசு தொழிற்பயிற்சி நிலையத்தில் இம் மாதம் 29, 30-ம் தேதிகளில் காலை 9 மணி முதல் நடைபெறும் நேர்முகத் தேர்வில் கலந்துகொள்ளலாம். மேலும் விவரங்களுக்கு 93818 00181, 94446 90026, 044-24464269 ஆகிய தொலைபேசி எண்களில் தொடர்பு கொள்ளலாம் என்றார்.

8 ம் வகுப்பு மாணவர்களுக்கு அரசு உதவித் தொகை

விண்ணப்பிக்க கடைசி நாள்: ஆகஸ்ட் 31.2009

சென்னை ,ஆகஸ்ட் 12 : எட்டாம் வகுப்பு படிக்கும் மாணவர்கள் அரசு உதவித்தொகையைப் பெறுவதற்கு ஆகஸ்ட் 31ம் தேதிக்குள் விண்ணப்பங்களைச் சமர்ப்பிக்க வேண்டும்.

இது தொடர்பாக அரசுத் தேர்வுகள் இயக்கம் புதன் கிழமை வெளியிட்ட செய்திக் குறிப்பு:

உதவித் தொகையை பெறுவதற்கு மாணவர்களைத் தேர்ந்தெடுக்கும் தேர்வு நவம்பர் 8 ம் தேதி நடைபெறுகிறது.


விண்ணப்பங்களை WWW.tn.gov.inldge மற்றும் WWW.pallikalvi.in ஆகிய இணையதளங்களில் இருந்தும் பதிவிறக்கம்(down load) செய்து கொள்ளலாம்.

தேர்வுக் கட்டணம் ரூ.50. இதை அரசு கருவூலகத்தில் செலுத்த வேண்டும். பூர்த்தி செய்த விண்ணப்பங்களை ஆகஸ்டு 31ம் தேதிக்குள் சமர்ப்பிக்க வேண்டும். தேசியத் திறனாய்வுத் தேர்வு விண்ணப்பங்களை தொடர்புடைய மண்டல அலுவலகத்திலும், தேசிய வருவாய்வழி தேர்வுக்கான விண்ணப்பங்களை சம்பந்தப்பட்ட மாவட்ட கல்வி அலுவலரிடமும் சமர்ப்பிக்க வேண்டும்.

தகுதிகள்: தேசிய திறனாய்வுத் தேர்வுக்கு கடந்த கல்வி ஆண்டில் (ஏழாம்) 7-ம் வகுப்புத் தேர்வில் 60 சதவீதம் அல்லது அதற்கு மேல் மதிப்பெண் பெற்று, இப்போது 8-ம் வகுப்பு படிக்கும் மாணவர்கள், மாணவிகள் விண்ணப்பிக்கலாம்.

தேசிய வருவாய் வழி திறன் படிப்பு உதவித் தொகை தேர்வுக்கு, 2009-10ம் ஆண்டில் மாநில அரசு பள்ளிகள், மாநகராட்சி, நகராட்சி, அரசு நிதியுதவி பெறும் பள்ளிகளில் 8-ம் வகுப்பு படிக்கும் மாணவ மாணவிகள் விண்ணப்பிக்கலாம். ஆனால் இந்த மாணவர்களின் பெற்றோரின் குடும்ப வருமானம் ஆண்டுக்கு ரூ 1.50 லட்சத்துக்கு மிகாமல் இருக்க வேண்டும். மேலும் , எஸ்.சி., எஸ்.டி., பிரிவினர் 7-ம் வகுப்பு தேர்வில் 50 சதவீத மதிப்பெண்ணும், மற்ற பிரிவினர் 55 சதவீத மதிப்பெண்ணும் பெற்றிருக்க வேண்டும்.


31-க்குள் விண்ணப்பிக்கவும்: இத்தேர்வுகளுக்கான விண்ணப்பங்கள் பள்ளித் தலைமை ஆசிரியர், அரசுத் தேர்வுகள் தலைமை அலுவலகத்திலும் கிடைக்கும். மேலும், சென்னை, திருநெல்வேலி, மதுரை, கோவை, திருச்சி, கடலூர், வேலூர் மண்டல துணை இயக்குனர் அலுவலகங்கள், முதன்மை கல்வி அலுவலர் அலுவலகங்கள், மாவட்ட அலுவலகங்கள், கேந்திரிய வித்யாலயா மண்டல அலுவலகங்கள் ஆகியவற்றிலும் கிடைக்கும்.

ரமலானின் முதல் பத்து!

புனிதமும் கண்ணியமும் மிக்க அருள்மிகு மாதம் ரமலானின் வருகை, கடமையான நோன்புகளை நிறைவேற்ற நமக்கு வாய்ப்பளிப்பதோடு ரமலானின் 30 நாட்களும் அல்லாஹ்வின் பொருத்தத்தைப் பெற வேண்டிய நோக்கத்துடன் நம்முடைய உள்ளங்களிலும் நம்மைச் சுற்றி உலகெங்கும் வாழும் முஸ்லிம்களின் உள்ளங்களிலும் வாழ்விலும் நல்ல மாற்றங்களை ஏற்படுத்திவிடுகிறது,

நோன்பு நோற்றல், குர்ஆன் ஓதுதல், இறைவனை நினைவு கூர்தல், தர்மம் செய்தல், சொல்-செயல்-எண்ணங்கள் அனைத்திலும் இறையச்சத்தைப் பேணுதல் என நிம்மதியும் அமைதியும் நிறைந்த ஒரு சூழலை ரமலான் நம்மிடையே ஏற்படுத்தி விடுகின்றது. ரமலானின் முழுப் பலன்களையும் பெற்றிடும் விதத்தில் முஸ்லிம்கள் முயலும் விதத்தில் ஒவ்வோர் ஆண்டும் கழிகின்றது, அல்ஹம்துலில்லாஹ்! எல்லாப் புகழும் ரமளானை நமக்கு அருள் புரிந்த அல்லாஹ்வுக்கே.

கடமையான ஐவேளை தொழுகைகளையே தொழாதவர்கள், பள்ளிகளில் சென்று ஜமாத்தோடு தொழாமல் வீடுகளில் தொழுது கொண்டிருந்தவர்கள், உரிய நேரத்தில் பள்ளிக்குச் சென்று ஜமாத்தோடு தொழவும் பள்ளிக்கு பாங்கு சொன்ன உடன் அல்லது பாங்கிற்கு முன்னரே வருகை புரிந்து தொழுகைக்குக் காத்திருந்து, பள்ளியில் குர்ஆன் ஓதிக் கொண்டும் உபரியான தொழுகைகள் தொழுது கொண்டும் கடமைத் தொழுகையை எதிர்பார்த்தவர்களாக இருக்கும் நிலையையும் காணலாம்.

இந்தப் பக்திப் பரவச நிலை புனித ரமலான் ஒரு மாதத்தில் மட்டுமின்றி தினந்தோரும் இருப்பதுபோல் அனைவரின் உள்ளத்திலும் இவ்வுணர்வு குடிகொண்டு, அதன் மூலம் வெளிப்படும் வணக்க வழிபாடுகளும் இதர அன்றாடச் செயல்பாடுகளும் அமைந்து விட்டால், இம்மைக்கும் மறுமைக்கும் நன்றன்றோ எனும் ஆவலும் எண்ணமும் நமக்கு ஏற்படுகின்றது. இந்நிலையை நமது வாழ்க்கையில் ரமலானில் மட்டுமின்றி ரமலானுக்கு பின்னரும் தொடர்ந்து கடைப்பிடித்திட அல்லாஹ் அருள் புரியவேண்டும்.

இந்த கண்ணிய மிக்க மாதத்தின் முப்பது நாட்களைப் பற்றி நபி(ஸல்) அவர்கள் கூறுகையில் அல்லாஹ் மூன்று முக்கிய அம்சங்களைக் கொண்ட பத்து நாட்கள் எனும் விதத்தில் வைத்திருப்பதாக அடையாளம் காட்டியுள்ளார்கள் என்று கீழ்க்காணும் ஹதீஸில் காணமுடிகிறது:

நபி (ஸல்) அவர்கள் கூறினார்கள் : ரமலானின் முதல் பத்து நாட்கள் அல்லாஹ்வின் 'ரஹ்மத்' எனும் அருட் கொடையாகவும் நடுப் பத்து நாட்கள் 'மக்ஃபிரத்' எனும் பாவமன்னிப்புக் குரியதாகவும் கடைசிப் பத்து நாட்கள் நரகத்திலிருந்து 'நஜாத்' மீட்சியளிக்கக் கூடியதாகவும் உள்ளது. அல் ஹதீஸ் ஆதார நூல் இப்னு குஜைமா பாகம் 3 எண் 191

இந்த ஹதீஸின் அடிப்படையையும் நாம் கவனத்தில் கொண்டு முதலாவது பத்து நாட்களில், அதிகமதிகமாக அல்லாஹ்விடம் துவாச் செய்து அவனால் வழங்கப்பட்ட உயிர், பொருள், இதர செல்வங்கள், கல்வி, அறிவு, ஆற்றல்கள், திறமைகள், பார்வை, செவி, புலன், நுகர்தல், உணர்தல் போன்ற அனைத்து விதமான அருட் கொடைகளையும் நினைவு கூரவும் அவற்றிற்கு முறையாக நன்றி செலுத்திடவும் அதன் மூலம் மேலும் அல்லாஹ்வின் பொருத்தத்தையும் அதிகமதிகமான அல்லாஹ்வின் அருட்கொடைகளைப் பெறவும் முயல வேண்டும்,

இவை எல்லாவற்றிற்கும் மேலாக நமக்கு அல்லாஹ்வினால் சிறப்பாக வழங்கப்பட்ட (ஈமான்) எனும் இறை நம்பிக்கை' என்ற அருட்கொடைக்கு மட்டுமே கோடி கோடி நன்றி செலுத்தினாலும் காலமெல்லாம் அவனைப் புகழ்ந்தாலும் ஈடாகாது. ஏனெனில் ஈமான் என்ற இணையற்ற அருட்கொடை இல்லா விட்டால் நாம் பெற்றுள்ள இதர எந்த வளமும் உண்மையில் அருட்கொடையில்லை எனலாம்.

இறை நம்பிக்கை இல்லாத நிலையில் செல்வம் எனும் அருட் கொடை அதிகமானால் அவனை அது வழி கேட்டிற்கும் தீமைகளுக்கும் இட்டு சென்று விடும் வாய்ப்புகள் உண்டு.

கல்வி மற்றும் அறிவு எனும் அருட்கொடைகள் ஆக்கத்தையும் அழிவையும் பிரித்துணராமல் கேடாக அமைந்திட வழிவகுக்கும் அபாயம் உண்டு. உடல் அழகு, வலிமை, திறமை, ஆற்றல்கள், அதிகாரம் போன்றவை ஈமான் எனும் இறை நம்பிக்கையில்லாத நிலையில் கிடைக்கப் பெற்றால் அவற்றைத் தவறான வழியில் மனோ இச்சையின்படி ஈடு படுத்திட அதன் மூலம் தமக்கும் தம்மை சுற்றியிள்ளோருக்கும் கேடும் இழப்பும் ஏற்படுத்திட வாய்ப்புகள் அதிகம். ஈமான் (இறைநம்பிக்கை) மற்றும் இறையச்சம் என்பதுதான் உண்மையில் அருட்கொடை.

Thanks To Mr. Jalal Rahman

Web 3.0 டெக்னாலஜி

Web 3.0 டெக்னாலஜியாம் விரைவில் இணைய உலகை ஆளப்போகிறதாம். இதற்கு முன்னாடி அதாவது தற்போது Web 2.0 அதற்கு முன்னாடி Web 1.0 எனும் தொழில்நுட்பங்கள் இருக்கின்றனவாம், இருந்ததாம். இப்படி அள்ளி விட்டுக்கொண்டு Web 3.0 எனும் புதிய தொழில்நுட்பத்தை பற்றி கொள்கை ரீதியாக(theoritically) பேசிக்கொண்டிருக்கின்றது ஒரு கூட்டம். உண்மையில் Web 1.0, Web 2.0 என்ற தொழில்நுட்பங்கள் இருக்கின்றனவா என பார்த்தால் இவையெல்லாம் வியாபார உத்திகள் போன்றே தோன்றுகிறது. காரணம் தற்போது இணையம் பாவித்து கொண்டு இருப்பதாக சொல்லப்படும் Web 2.0 தொழில்நுட்பம் தனது தனித்துவமான இயல்புகளாலேயே அதாவது முக்கியமாக comments, feedback என்ற இரு இயல்புகளாலேயே அடையாளம் காணப்பட்டது. Web 2.0 கண்டுபிடிக்கபட்டதும் அதற்கு முன்னால் இருந்த தொழில்நுட்பம் அதாவது இணையத்தில் publishing only என்ற தொழில்நுட்பம் Web 1.0 என சொல்லப்பட்டது. எல்லாம் இணையத்தில் கொட்டிக்கிடக்கும் அல்லது கொட்டுவதற்கு தயாரக இருக்கும் பணத்துக்காகவே இந்த புதிய புதிய தொழில்நுட்பங்களின் கண்டுபிடிப்புகள். ஒரு புதிய தொழில்நுட்பம் என்றவுடன் கையில் பெட்டியை வைத்துக்கொண்டு பலபேர் பார்த்துக்கொண்டிருக்கிறார்கள் அவர்களுக்காகவே இந்த Web 3.0.

இணையமானது இதுவரை இரு தொழில்நுட்பங்களை கண்டுள்ளது. நான் முன்பு சொன்னது போல் Web 1.0, Web 2.0 என்பன தான் அவை. இதில் Web 1.0 என்ன செய்ததென்றால் இணையத்தில் பதிக்க மட்டுமே வழி செய்தது அதாவது இணையத்தில் நீங்கள் தேடும் தகவல்கள் விதவிதமான தளங்களில் கொட்டிக்கிடக்கும் நீங்கள் அவற்றை தேடி படித்தீர்கள். அவை சரியா, தவறா என சொல்லக்கூட உங்களுக்கு வழி இருக்கவில்லை. அடுத்து வந்த Web 2.0 தொழில்நுட்பம் இந்த குறையை தீர்த்தது இப்போது நீங்கள் ஒரு தகவலை பார்த்தால் அதைப்பற்றி உங்களுக்கு தெரிந்தவற்றையும் சொல்கிறீர்கள். முன்பு இருந்த Web 1.0 ல் குறிப்பிட்ட காரை வாங்க வேண்டுமென்றால் அது தொடர்பான தளங்களை தேடி தேடி அந்த கார் உங்களது தேவையை தீர்க்குமா என்று தெரியாமலேயே வாங்க வேண்டியிருக்கும், ஆனால் Web 2.0 ல் உடனே facebook, Twitter போன்ற சமூக வலைதளங்களுக்கோ அல்லது வலைப்பூக்களுக்கோ செல்கிறீர்கள் அங்கே நீங்கள் இப்படி ஒரு காரை வாங்க விரும்புவதாக சொல்கிறீர்கள் உங்கள் நண்பர்கள் உங்களுக்கு தேவையான அந்த காரைப் பற்றிய சகல விடயங்களையும் டீடெய்லாக சொல்வார்கள். எப்படியான இடத்தில் எவ்வளவு பெற்றோல் குடிக்கும் என்பது வரையிலான தகவல்களை தெரிந்து கொண்டு நீங்கள் காரை வாங்கலாம். Web 2.0 வின் மிக மிக லேட்டஸ்ட்டான வடிவமே இந்த Facebook போன்ற சமூகவலைத்தளங்களும் tweetter ம். இந்த வடிவங்கள் நம்மை முழுதாக வந்தடையாத. அலுத்துவிடாத நிலையிலேயே அடுத்த இணைய தொழில்நுட்பத்தை பற்றிய பேச்சு அடிபடுகின்றது.

Web 3.0 ல் முக்கியமான இயல்பாக சொல்லப்படுவது அதன் intelligent ஆன தேடும் முறை தான். இந்த தொழில்நுட்பத்தில் அமைந்த இணையமானது உங்களது தனிப்பட்ட உதவியாளர் போன்று உங்களின் விருப்பு வெறுப்பு அறிந்து செயல்படும். Web 1.0 ல் இணையம் ஒரு நூலகம் மாதிரி உங்களுக்கு தேவையான தகவலை நீங்களே தேடி எடுத்து கொள்ள வேண்டும். Web 2.0 ல் இணையம் உங்களது நண்பர் கூட்டம் போன்றது உங்களுக்கு தேவையான தகவலை உங்களுக்கு தேவையான வடிவத்தில் நண்பர்கள் தேடி தருவார்கள். Web 3.0 ல் இணையமே உங்களுக்கு தேவையான தகவலை தேடி எடுத்து தரும். Web 3.0 கால இணையம் SEMANTIC WEB என சொல்லப்படுகிறது. இது முழுக்க முழுக்க metadata எனப்படும் தகவல்களின் தகவல்களால் ஆனது. உதாரணமாக ஒரு கைக்குட்டையை பார்க்கிறீர்கள் அது நீங்கள் உங்கள் காதலிக்கு பரிசாக கொடுத்த கைக்குட்டையை போன்ற ஒன்று அதை பார்த்ததும் உங்களுக்கு உங்களின் காதலியின் ஞாபகம் வரலாம் உடனே நேற்று காதலிக்கு தெரியாமல் கடலை போட்ட காதலியின் நண்பியின் ஞாபகமும் வரலாம் நீங்களும் அந்த கைக்குட்டையை படமெடுத்து facebook ல் போட்டு உங்கள் காதலியின் பெயரை tag ம் பண்ணுகிறீர்கள். அதே போல்தான் இணையமும், இப்போ உங்கள் காதலி உங்களை அல்லது உங்கள் Facebook profile ஐ இணையத்தில் தேடினால் உங்கள் facebook profilம் அந்த கைக்குட்டை படமும் காதலியின் நண்பியின் facebook profile ம் முடிவாக வரலாம். உங்களுக்கு பிடித்த, தேவையான தகவல்களை மட்டுமே தந்து நேரத்தை மீதப்படுத்துவதே Web 3.0 இன் முக்கியமான நோக்கம். உங்களது தொடர்ச்சியான இணைய தேடல்களின் மூலம் இணையம் உங்களை பற்றி அறிந்துக் கொள்ளும். RSS எனப்படும் இணைய செயலி மூலமாக இப்போது உங்களுக்கு பிடித்த தளங்களில் இருந்து புதிய தகவல்களை பெற்றுக்கொள்ள முடிகிறது இதே RSS, Web 3.0 ல் உங்களுக்கு பிடித்த தளத்தில் உங்களுக்கு பிடித்த தேவையான தகவலை மட்டும் உங்களுக்கு தெரிவிக்கும். உங்களது தொடர்ச்சியான இணைய தேடல் இதை சாத்தியமாக்கும்.

ஒருவரின் Search history ஐ கொண்டு அவரை பற்றியே தெரிந்து கொள்ளும் இந்த தொழில்நுட்பம் பாவனைக்கு வந்தால் எதிர்காலத்தில் திருமண பொருத்தங்கள், வேலைக்கு ஆள் தேடுதல் என்பன இணையத்திலேயே முடிந்துவிடும் அதே நேரம் நீங்கள் ஷகிலாவை பற்றி தேடியிருந்தால் அதுவும் உங்களை பற்றிய தகவலாக, நீங்கள் ஷகிலா ரசிகர் என்று தேடலில் தெரிவிக்கப்படும். முழுக்க முழுக்க Web 1.0 போன்று தகவல்களுக்கே முக்கியத்துவம் கொடுக்கும் இந்த தொழில்நுட்பத்தை பற்றிய பேச்சுகள் ஆரம்பித்திருக்கும் நிலையில் இப்போதே Web 4.0 க்கான குறிசொல்லல்கள் தொடங்கிவிட்டன. அதாவது Web 1.0 தகவல்களுக்கு முக்கியத்துவம் வழங்கியனிலையில் Web 2.0 ஆனது தகவல்களை சிறப்பாக பெற்றுக்கொள்ளும் web applications களுக்கு வழிசமைத்தது தற்போது Web 3.0 ஆனது தகவல்களை சிறப்பன வடிவத்தில் சேமிக்கவும் பெற்றுக்கொள்ளவும் உதவும் என சொல்லப்படும் நிலையில் Web 4.0 ஆனது தற்போது இருக்கும் Facebook, Tweetter தளங்களின் மேம்படுத்தப்பட்ட பதிப்புகளை தரும் என சொல்லப்படுகிறது. ஆனால் இப்பொது கொள்கை அளவிலேயே இருக்கும் இத்தொழில்நுட்பம் வருவதற்கு கொஞ்ச காலம் ஆகும் போலத்தான் தெரிகிறது.

அக்டோபர் 1ம் தேதி முதல் தட்கல் கட்டண குறைப்பு அமல்

ரயிலில் தட்கல் முன்பதிவுக்கான கட்டணக் குறைப்பு வரும் அக்டோபர் 1ம் தேதி முதல் அமலாகிறது.

மக்களவையில் தாக்கல் செய்யப்பட்ட ரயில்வே நிதிநிலை அறிக்கையில், தட்கல் முன்பதிவுக்காக வசூலிக்கப்படும் கட்டணம் குறைக்கப்படும் என்று ரயில்வே அமைச்சர் மம்தா பானர்ஜி அறிவித்திருந்தார்.இந்த கட்டணக் குறைப்பு அக்டோபர் 1ம் தேதி முதல் அமலுக்கு வருகிறது.

அதன்படி, தூங்கும் வகுப்புக்கான தட்கல் கட்டணம் ரூ.150ல் இருந்து ரூ.100 ஆக குறைக்கப்படுகிறது. ஏ.சி. சேர் கார் வகுப்புக்கு இதுவரை ரூ.150 ஆக இருந்து வந்த தட்கல் கட்டணம் தற்போது ரூ.75 ஆக குறைக்கப்படுகிறது.மற்ற வகுப்பு ஏ.சி. பயணங்களுக்கு இதுவரை வசூலிக்கப்பட்டு வந்த ரூ.300 கட்டணம், ரூ.200 ஆக குறைகிறது.

உட்கார்ந்து பயணம் செய்யும் 2வது வகுப்பு பயணத்துக்கான தட்கல் கட்டணம் ரூ.15ல் இருந்து ரூ.10 ஆகிறது. ரயில்வே அமைச்சகம் வெளியிட்டுள்ள செய்திக் குறிப்பில் இந்த தகவல் தெரிவிக்கப்பட்டுள்ளது.

செந்தூர் விரைவு ரயிலை தினமும் இயக்க நடவடிக்கை

திருச்செந்தூர்-சென்னை செந்தூர் விரைவு வாராந்திர ரயிலை தினமும் இயக்க நடவடிக்கை எடுத்து வருவதாக தூத்துக்குடி எஸ்.ஆர். ஜெயதுரை எம்.பி. திங்கள்கிழமை தெரிவித்தார்.

திருச்செந்தூர் ரயில் நிலையத்திலிருந்து நெல்லை விரைவு ரயிலுக்கு இணைப்பு ரயிலான பயணிகள் ரயில் (வண்டி எண் 736) சேவையை திருச்செந்தூரில் திங்கள்கிழமை அவர் கொடியசைத்துத் தொடக்கிவைத்தார்.

நிகழ்ச்சியில் திருச்செந்தூர் ஊராட்சி ஒன்றிய துணைத் தலைவி பேச்சியம்மாள், ஒன்றிய கவுன்சிலர்கள் மாரிமுத்து, அமுதாதல்மேதா, ரயில் நிலைய மேலாளர் வீரமணி, போக்குவரத்து ஆய்வாளர் ஜான்சான், நிலைய அலுவலர் முத்தையா, திமுக வழக்கறிஞர் ஜெ.எஸ்.டி. சாத்ராக் உள்ளிட்ட பலர் கலந்துகொண்டனர்.

நிகழ்ச்சிக்குப் பின்னர் ஜெயதுரை எம்.பி. செய்தியாளர்களிடம் கூறியதாவது:

செந்தூர் விரைவு ரயிலை தினமும் இயக்க நடவடிக்கை எடுக்க வேண்டும் என மத்திய ரயில்வே அமைச்சரிடமும், ரயில்வே அதிகாரிகளிடம் நேரில் வலியுறுத்தியுள்ளேன்.

இதுகுறித்து நடவடிக்கை எடுத்து வருவதாகவும், அக்டோபர் மாதத்திலிருந்து மயிலாடுதுறை வழியாக செந்தூர் விரைவு ரயிலை தினசரி இயக்க நடவடிக்கை எடுக்கப்படும் என்றும் அவர்கள் தெரிவித்தனர்.

மேலும், தூத்துக்குடியிலிருந்து பெங்களூர் மற்றும் சென்னைக்கு கூடுதலாக ஒரு விரைவு ரயில் இயக்க கோரிக்கை வைத்துள்ளேன். இதுகுறித்தும் பரிசீலிப்பதாக ரயில்வே அமைச்சர் தெரிவித்துள்ளார் என்றார் ஜெயதுரை.

நெல்லை விரைவு ரயிலுக்கு இணைப்பாக இயக்கப்படும் இந்த பயணிகள் ரயில் (வண்டி எண்736) திருச்செந்தூரிலிருந்து தினமும் மாலை 4.10 மணிக்கு புறப்பட்டு மாலை 5.55 மணிக்கு திருநெல்வேலியை சேரும்.

அதேபோல, சென்னையிலிருந்து திருநெல்வேலிக்கு வரும் நெல்லை விரைவு ரயிலுக்கு இணைப்பாக (வண்டி எண் 735) காலை 9.30 மணிக்கு திருநெல்வேலியிலிருந்து புறப்பட்டு பிற்பகல் 11.15 மணிக்கு திருச்செந்தூருக்கு வரும்.

நெல்லையப்பர் கோயில் நுழைவுக் கட்டணத்தில் சலுகை

திருநெல்வேலி சுவாமி நெல்லையப்பர் கோயில் சுவாமி சன்னதியில் அர்த்த மண்டபம் செல்வதற்கு செவ்வாய்க்கிழமை (ஆகஸ்ட் 25) முதல் குறிப்பிட்ட நேரத்துக்கு நுழைவுக் கட்டணம் கிடையாது என்று அறங்காவலர்கள் தெரிவித்தனர்.

கடந்த இரண்டு ஆண்டுகளாக அறங்காவலர்களாக இருந்த சோம. திருநாவுக்கரசு, மு. செல்லையா, இரா. சிந்தா சுப்பிரமணியம், சு. தெய்வபகவதி, மு. கணேசன் ஆகியோர் மீண்டும் தேர்வு செய்யப்பட்டுள்ளனர்.

மூன்றாவது முறையாக அவர்கள், அறங்காவலர் உறுப்பினர் பொறுப்பை திங்கள்கிழமை ஏற்றுக் கொண்டனர்.

இதையடுத்து, அறங்காவலர் குழுத் தலைவராக சோம. திருநாவுக்கரசு மீண்டும் தேர்ந்தெடுக்கப்பட்டார். பின்னர் அவர்கள் நிருபர்களுக்கு கூட்டாக அளித்த பேட்டி:

இக் கோயிலில் கடந்த மே மாதம் முதல் சுவாமி சன்னதி அர்த்த மண்டபத்துக்கு செல்வதற்கு ரூ. 3 கட்டணம் வசூலிக்கப்படுகிறது. இதற்கு பக்தர்கள் கடும் எதிர்ப்பு தெரிவித்து வருகின்றனர்.

அறங்காவலர் குழுவின் பதவிக் காலம் முடிந்த பின்னர்தான், இந்தக் கட்டணம் வசூலிக்கப்படுகிறது. இதனால், அறங்காவலர் குழுவினரால் அந்த கட்டணத்தை ரத்து செய்ய முடியவில்லை.

தற்போது புதிதாக பதவி ஏற்றுள்ள நாங்கள், சுவாமி சன்னதியின் அர்த்த மண்டபத்துக்கு பக்தர்கள் செல்ல காலை 7.30 முதல் 10.30 வரையும், மாலை 6 மணி முதல் இரவு 8.30 மணி வரையும் இலவசமாக சென்று சுவாமியை தரிசனம் செய்யும் வகையில் தீர்மானம் நிறைவேற்றியுள்ளோம்.

எனவே, பக்தர்கள் செவ்வாய்க்கிழமை முதல் குறிப்பிட்ட நேரத்தில் சுவாமியை எந்த கட்டணமும் செலுத்தாமல் தரிசிக்கலாம்.

அர்த்த மண்டபத்துக்கு நுழைவு கட்டணம் வசூலிக்கப்பட வேண்டும் என உத்தரவிட்ட இந்து அறநிலையத்துறை ஆணையருக்கு, அந்த உத்தரவை மறு பரிசீலனை செய்யக் கோரி மனு அனுப்பி இருக்கிறோம் என்றனர்