தூத்துக்குடி மாவட்டத்தில் வேலைவாய்ப்பற்றோர் உதவித் தொகை பெற இம் மாதம் 29ம் தேதிக்குள் விண்ணப்பிக்க வேண்டும் என வேலை வாய்பு அலுவலர் கலைச் செல்வன் அறிவித்துள்ளார்.
வேலைவாய்ப்பு அலுவலகத்தில் பதிவு செய்து, 5 ஆண்டுகள் முடிவுற்ற பதிவுதாரர்களுக்கு 10ம் வகுப்பு கல்வித் தகுதிக்கு ரூ.150, 12ம் வகுப்பு கல்வித் தகுதிக்கு ரூ. 200, பட்டதாரிகளுக்கு ரூ 300 மாதாந்திர உதவித் தொகையாக வழங்கப்படுகிறது.
இத்திட்டத்தின் கீழ், உதவித் தொகை பெற விரும்பும் 1.4.2004-க்கு முன்பாக தங்களது கல்வித் தகுதியை மாவட்ட வேலைவாய்ப்பு அலுவலகத்தில் பதிவு செய்து நாளது தேதி வரை பதிவைப் புதுப்பித்துள்ள மனுதாரர்கள் 29.5.2009 வரை மாவட்ட வேலைவாய்ப்பு அலுவலகத்தில் விண்ணப்பம் அளிக்கலாம்.
விண்ணப்பம் மாவட்ட வேலைவாய்ப்பு அலுவலகத்தில் இலவசமாக வழங்கப்படுகிறது. மனுதாரர் அனைத்து ஆவணங்களுடன் விண்ணப்ப படிவத்தை அனைத்து வேலை நாள்களிலும் காலை 10 மணி முதல் பிற்பகல் 2 மணி வரை பெற்றுக் கொள்ளலாம்.
விண்ணப்பத்துடன் வருவாய் ஆய்வாளரிடம் பெறப்பட்ட தகுதிச் சான்று, அரசுடமையாக்கப்பட்ட வங்கிகளில் புதிதாக தொடங்கப்பட்ட வங்கி கணக்கு புத்தகம், வேலைவாய்ப்பு அலுவலக பதிவு அட்டை ஆகியவை இணைக்கப்பட வேண்டும்.
1.4.2007 முதல் 31.5.2007 வரை மற்றும் 1.4.2008 முதல் 31.5.2008 வரை வேலைவாய்ப்பற்றோர் உதவித் தொகை பெற விண்ணப்பம் இவ்வலுவலகத்தில் அளித்தவர்கள் சுய உறுதி ஆவணத்தை 29.5.2009-க்குள் அளிக்க வேண்டும்.
அவ்வாறு அளிக்காதவர்களுக்கு தொடர்ந்து உதவித் தொகை வழங்க இயலாது. பயனாளிகள் அனைவருக்கும் 1.1.2009 முதல் 31.3.2009 வரை உள்ள காலத்திற்கு உதவித் தொகை அவர்களது வங்கிக் கணக்கில் வரவு வைக்கப்பட்டுள்ளது.
இதுவரை விண்ணப்பம் அளித்து உதவித் தொகை கிடைக்கப் பெறாதவர்கள், தங்களது வேலைவாய்ப்பு அலுவலக பதிவட்டை மற்றும் வங்கி புத்தகத்தில் நாளது தேதி வரையிலான குறிப்புகளுடன் மாவட்ட வேலைவாய்ப்பு அலுவலகத்தை உடனடியாக தொடர்பு கொள்ள வேண்டும். எனவே, இந்த திட்டத்தில் பயன் பெற தகுதியும், விருப்பமும் உடைய பதிவுதாரர்கள் இம் மாதம் 29-ம் தேதிக்கு முன்பாக விண்ணப்பிக்க வேண்டும்.
பிளஸ் 2 கல்விச் சான்றிதழ் பதிவு செய்ய சிறப்பு முகாம்
பிளஸ் 2 கல்விச் சான்றிதழை மாவட்ட வேலைவாய்ப்பு அலுவலகத்தில் பதிவு செய்வதற்கான சிறப்பு முகாம் மே 25 முதல் 27 வரை கோவில்பட்டி வ.உ.சி. அரசினர் ஆண்கள் மேல்நிலைப் பள்ளியிலும், திருச்செந்தூர் அரசினர் ஆண்கள் மேல்நிலைப் பள்ளியிலும் நடத்த ஏற்பாடு செய்யப்பட்டுள்ளது. இந்த பதிவு முகாம்களிலும் வேலைவாய்ப்பற்றோர் விண்ணப்பப் படிவங்கள் பெற்றுக் கொள்ளலாம். மேலும், உதவித் தொகை புதுப்பித்தல் விண்ணப்பங்களையும் கொடுக்கலாம்
கருத்துகள் இல்லை:
கருத்துரையிடுக